Supuniyas


Chapter 1
1 Seini ka igpepangguhud te Magbebaye ne Manama ki Supuniyas te timpu ne iyan mighari te Huda si Husiyas ne anak ni Amun. Si Supuniyas, anak ni Kusi wey apu ni Hidalyas, ne si Hidalyas, anak ni Amariyas, wey apu ni Isikiyas.
2 Migkahi ka Magbebaye, “Egdereetan ku iya ka langun ne kayi te tane.
3 Egdereetan ku ka me etew, ka me mananap, ka me manuk-manuk, wey ka me isda. Eglegparan ku ka me etew ne maddeet se hinimuwan, wey egguleen ku ka me etew kayi te ampew te tane,” kahi te Magbebaye.
4 “Egparusaan ku ka Huda, wey ka langun ne mig-ugpe te Hirusalim. Eg-aween ku ka nenasame ne migsimba te diyus-diyus ne si Baal, wey egkalingawan e ka me ngaran te me talagpanubad ne migpamakey te me diyus-diyus.
5 Eg-aween ku ka langun ne egmamaneyik te atep te me baley ran eyew egsimba te aldew, te bulan, wey te me bituen. Eg-aween ku degma ka langun ne egsimba keddi, wey ka migpanaad ne egtuman keddi, piru migpanaad degma ne egtuman ki Milkum ne diyus-diyus.
6 Egdereetan ku seeye se ware migpabulus mig-ikul keddiey, wey ware migparani wey ke migpangananey naa keddi.”
7 Peeneng-eneng kew diye te tangkaan te Magbebaye! Su mahaan e egginguma ka aldew te peglegpad din. Ne intahahe e te Magbebaye ka keet-etawan para te pegpakiggira iling te ayam ne igpanubad. In-alam din degma ka keet-etawan ne egpakiggira kandan.
8 “Te aldew ne egkeyitabu e sika,” kahi te Magbebaye, “Egparusaan ku ka me pangulu te keet-etawan wey ka me lukes ne anak te Hari, wey ka langun ne mig-ikul te me batasan te me etew ne ware mig-ila te Manama.
9 Te sika ne aldew, egparusaan ku ka migsimba te me diyus-diyus, wey seeye se migpanakew wey migpangimatey eyew te peggipenu te baley te diyus-diyus dan.”
10 Migkahi ka Magbebaye, “Te sika ne aldew, due egmanguleyi ne egkarineg diye te Hirusalim diye te gumawan ne egngaranan te Isda, wey due egmandalawit puun te Iyam ne Baad te siyudad, wey due egkarineg ne guhulubi ne egpuun te me bubungan.
11 Pandalawit kew te pegkalaggew niyu, sikaniyu se nangugpe diye te palingki ne egngaranan te Lesung ne diddiralem te siyudad su migpatey e ka langun ne egpamelegye, wey warad e ka langun ne egmanimbang te pelata.
12 “Te sikan ded ne timpu, egsusulu a ka eg-ayad-ayad egpamitew te me etew minsan hendei diye te Hirusalim, wey egparusaan ku ka me etew ne amana migsalig te pegkeetew ran, wey migkahi diye te geyinawa ran, ‘Kene ki egdereetan te Magbebaye wey ke eg-upianan naa.’
13 Egpanakawen ka me karatuan dan, wey egpangguhusen ka me baley ran. Egpangimu sikandan te me baley, piru kene dan egkeugpaan; egpamula sikandan te me paras, piru kene ne sikandan egpekeinum te binu.”
14 “Mahaan e ka makaaldek-haldek ne aldew te peglegpad te Magbebaye, wey mahaan e seini egginguma. Te sika ne aldew, mapeit-peit naan de iya ka ngangangan te me etew, wey minsan ka me bahani, egmanguleyi tenged te liyas.
15 Su sika ka aldew ne igpapitew te Manama ka langet din, aldew te kalaggew wey kasakitan, ka aldew te kasamuk wey karereetan, ka aldew te pegpaddusilem wey pegdaldaleet.
16 Aldew sika te pegparahing te trumpita wey pegpanguleyi te seeye se egmanlusud te maresen ne me siyudad wey te me matikang ne alad te siyudad.”
17 Migkahi ka Magbebaye, “Egbaybayaran ku ka me etew, wey egpekeiling sikandan te me butud ne eggipanew, su nakasale sikandan keddiey. Egparalanahen ku ka langesa ran iling te weyig, wey egkengamewu ka me lawa ran te minsan hendei.”
18 Te aldew ne igpapitew e ka langet te Magbebaye, kene egpakapangabang te me etew ka me seleppi dan wey ka me bulawan dan. Ne puun te egmangebel-ebel ne langet din, egkasilaban ka intiru ne kalibutan; egtigkawen din te egpangimatey ka langun ne nangugpe kayi te ampew te tane.

Chapter 2
1 Ne ingkahiyan ni Supuniyas ka me matig-Huda, “Libulung kew, sikaniyu se keet-etawan ne kene egkengeyilew ne eggimu te sale.
2 Libulung kew wey inniyuhi niyu ka me sale niyu te kene pad egginguma ka peggukum te Manama; Pasayu kew te kene pad egkataman ka aldew te pegbuyu te pasaylu su eglihad de sika ne aldew iling te ukaba ne eglayap te kalamag; te kene pad egginguma kaniyu ka aldew te mangune-kune ne langet din.
3 Parani kew te Magbebaye ne Manama, sikaniyu se me mapariralemen ne me etew wey migtuman te me suhu din. Pakannekal kew ne eggimu te meupiya wey pariralem kew, kema ke kene kew red eglegparan nikandin ke eggingume e ka aldew te mangune-kune ne langet din.”
4 “Eg-engkeran ka siyudad te Gasa wey warad degma me etew ne egmangugpe te Askalun. Ka nangugpe te Asdud, egpandeldelen ke egpekeuntud e ka aldew, wey egpangaween e ka mahinged te Ikrun.
5 Mekeyid‑u-hid‑u kew se nangugpe te ilis te dahat, mekeyid‑u-hid‑u kew me Kiritihanen. Sikaniyu se me Pilistihanen ne nangugpe te Kanaan, sikaniyu ka igkabelu te Magbebaye. Egpangimatayan kew nikandin taman te warad egkasame kaniyu.
6 Egkeyimu e ne panabtaban te me karniru wey kulungan te me ayam ka me inged ne diye te ilis te dahat ne in-ugpaan te me Kiritihanen.
7 Ne iyan e egpakakamuney te me inged ne diye te ilis te dahat ka me keet-etawan te Huda ne nenasame. Ne diye dan e egpepanabtaba ka me karniru ran; ne diyad e sikandan egpangirehe te me baley te Askalun ke marusilem. Ne egbulihan sikandan te Magbebaye ne Manama ran, wey egmatubungen din e man‑e ka peg-ugpe dan.”
8 Ne migkahi ka Magbebaye, “Narineg ku ka pegbaley-baley te me matig-Muwab, wey ka pegpanlemet te me Amunihanen te keet-etawan ku. Migpeggasal sikandan ne egkaahew ran ka inged te keet-etawan ku.
9 Purisu, puun su ware egpatayan ku, egdereetan ku iya ka Muwab iling te Suduma wey ka matig-Amun iling te Gumura. Egkeempet ka tane dan te me duhiyen ne me hilamunen wey egkengallungahan e te asin, sikan naa ka warad karuan te tane dan. Ne egpangahawen te keet-etawan ku ne nenasame ka me karatuan dan, wey iyan e egkamkamuney te me inged dan.” Sika ka ingkahi te Amana ne Maresen ne Magbebaye, ka Manama te Israil.
10 Iling due ka iglegpad kandan tenged te pegpaambug dan, su migpandali-di ma sikandan wey migpanlemet te keet-etawan te Amana ne Maresen ne Magbebaye.
11 Ne igpakita te Magbebaye ne Manama kandan ka mangune-kune ne geem din wey egdereetan din ka langun ne diyus-diyus te kalibutan. Ne sikandin e ka egsimbeen te keet-etawan te langun ne nasud diye te me inged dan.
12 Sikaniyu degma se matig-Itiyupiya, egpeyimatayan kew red degma te Magbebaye pinaahi te kampilan.
13 Ne egpakig-ehet ka Magbebaye diye te igkahibang ne balabahan dapit te igsile, wey egdereetan din ka Asirya pinaahi te geem din. Eggimuwen din ne mammara ne inged ka Ninibi wey kenad egkeugpaan wey egkeengkeran e.
14 Ne diyad egpangugpe ka me baka wey ka me karniru wey ka langun ne klasi te mananap, wey diyad egpangugpe te nahuhus ne me sungkaleg ka me banug wey ka me ambew. Diyad egmangekahi te me bintana ka me ekang. Egkagguhus ka me gumawan wey egkengaddeetan e ka me sidar ne alabat.
15 Iling due ka egkeyitabu te siyudad te Ninibi ne amana migpaambug ka me mahinged ne ware egpakatalu kandan wey migkahi, “Ware lein ne siyudad ne egpekeiling te kabantug te kanta ne siyudad.” Piru masumpit ka egkeyitabu te sika ne siyudad su egkeyimu e sika ne ugpaanan te me mahintalunan. Eglelemetan sika wey egdali-dian te minsan hentew ne eglihad kayi.

Chapter 3
1 Mekeyid‑u-hid‑u ka Hirusalim su in-ugpaan te me etew ne mallindit se egmangimuwen, masinupaken sikandan wey egmanleig-leig te me etew ka me pangulu ran.
2 Kene sikandan egpammineg ke eglalahan wey kene egpalintutuu ke egsaparan. Ware sikandan migsalig te Magbebaye ne Manama wey ware sikandan migparani te Manama ran.
3 Ka me pangulu te seini ne siyudad egpekeiling te egginihel ne liyun, wey egpekeiling ka me talewukum te me singgalung ne egmanggutasan amana ne egmambalbalen e wey ware egsameen te egkeenen dan taman te egkapawaan.
4 Me hambuhen wey kene egkasalihan ka me prupita; ware tahura te me talagpanubad ka timplu te Manama wey ware dan tumana ka me balaud din.
5 Piru matareng ka Magbebaye ne diye te siyudad dan, wey kene sikandin eggimu te mareet. Igpapitew rin ka katareng din te tagse maselem; eggimuwen din seini tagse aldew. Piru ka me etew ne maddeet se me hinimuwan, kene iya egkeyilew.
6 Ne migkahi ka Magbebaye, “Indereetan ku ka me nasud, wey ingguhus ku ka me alad te me siyudad. Indereetan ku ka me dalan, eyew warad etew ne eglihad. Nahuhus e ka me siyudad wey in-engkeran e, wey warad me etew ne nangugpe.
7 Sikan naa ka nakakahi a, ‘Egtahud e ka keet-etawan ku keddi, wey egpammineg e sikandan keddi ke egsaparan ku. Ne emun ke eggimuwen dan sika, kene kud e egdereetan ka me ugpaan dan wey kene kud e eglegparan sikandan.’ Piru nasi de iya sikandan nalelehet ne miggimu te maddeet ne hinimuwan.
8 “Sikan naa ka tahari niyu ka aldew ne eggukuman kud ka me etew te me nasud. Su nakasuman-suman ad ne eglibulungen ku ka me etew te me nasud wey te me migharian, eyew igpaneem-neem ku ka egpangebel-ebel ne langet ku kandan. Su egkasilaban ka intiru ne kalibutan tenged te egpangebel-ebel ne langet ku,” kahi te Magbebaye.
9 Migkahi pad man‑e sikandin, “Malehet iya ne te sika kangkuwa ne aldew eglinisan ku ka keet-etawan te me nasud, eyew egdawit e sikandan te ngaran ku wey egkasabeke e sikandan ka egpamakey keddi.
10 Ka migsimba keddi ne nenekegsuwey-suwey ne keet-etawan wey diye nangugpe te talipag te me weyig te Itiyupiya, egmanlepew ne egmanguyan te igmandasag dan.
11 Te sika kangkuwa ne aldew, kene kew e egkeyilew se keet-etawan ku tenged te pegsukul niyu keddi, su eg-aween kud puun kaniyu ka me hambuhen, wey warad e mapegpeggasal diye te matulus ne siyudad ku ne Hirusalim.
12 Ne iggaat ku diye te Hirusalim ka keet-etawan ku ne me mapariralemen. Egpangananey sikandan keddi wey egsalig keddi.
13 Ne seeye se nenasame diye te Israil, kenad e egmangimu te mareet wey kenad e egmanguubat, wey kenad e egmanlimbung. Egmatubung sikandan wey egmangibat ne warad igkangilam.”
14 Panaman-taman kew ulahing, keet-etawan te Siyun. Panguleyi kew, keet-etawan te Israil! Gale-gale kew ne egpuun te pusung niyu, keet-etawan te Hirusalim!
15 In-awe e te Magbebaye ka parusa rin kaniyu, wey indeldel rin e ka me kuntere niyu. Ne ka Hari te Israil, ne iyan ka Magbebaye ka egduma kaniyu, wey warad karereetan ne igkaaldek niyu.
16 Te sika ne aldew, egkahiyan kew ka matig-Hirusalim, “Kene kew kaaldek. Sikaniyu se mig-ugpe te Siyun, pakannekal kew.
17 Tenged su duma niyu ka Magbebaye, ne Manama niyu. Maresen sikandin ne Manama ne egpangabang kaniyu. Neele amana sikandin kaniyu, wey eglingawan din e ka mareet ne hinimuwan niyu tenged te geyinawa rin kaniyu. Egpanaman-taman sikandin eg-ulahing te pegkahale din kaniyu,
18 iling te pegkahale te etew ne migtambung te sahakeen.” Migkahi ka Magbebaye, “Kene kud sikaniyu egpeyingumaan te karereetan eyew kene kew e egkengeyilawan.
19 Te sika ne timpu, egparusaan ku ka langun ne migdeeg-deeg kaniyu. Ne eglibulungen ku ka keet-etawan ne natalagtag wey egpakalibed minsan ka pungku. Egdayanen e sikandan wey kenad e egpeyilawan, wey eggimuwen ku sikandan ne mabantug te intiru ne kalibutan.
20 Te sika ne timpu, eglibulungen ku sikaniyu wey igpalibed ku sikaniyu te me ugpaan niyu. Eggimuwen ku sikaniyu ne mabantug wey egdayanen kew te langun ne etew te intiru ne kalibutan. Egkeyitabu sika te timpu ne egmatubungen kud e man‑e sikaniyu.” Sika ka ingkahi te Magbebaye.