2
Ka peglegpad te Muwab
1 Ne seini ka ingkahi te Magbebaye ne Manama, “Layun egpakasale ka matig-Muwab. Sikan naa, eglegparan ku iya sikandan tenged su intutung dan ka tul‑an te Hari te inged ne Idum taman te neigmuk.
2 Sikan naa, egsilaban ku ka Muwab wey egtutungen ku ka me palasyu te Kiriyut. Ne egpamatey ka me matig-Muwab te mangune-kune ne gira, taheed te egmanagyawan sikandan wey egmarahing te me trumpita.
3 Eggimatayan ku ka Hari te Muwab wey egguleen ku ka langun ne pangulu te sika ne inged.” Sika ka ingkahi te Magbebaye ne Manama.
Ka peglegpad te Huda
4 Ne seini ka ingkahi te Magbebaye ne Manama, “Layun egpakasale ka me matig-Huda. Sikan naa, eglegparan ku iya sikandan su ware dan ikula ka me balaud ku wey ware dan tumana ka me suhu ku. Nalimbungan sikandan su migsimba sikandan te me diyus-diyus ne impamakey dengan te me kaap-apuan dan.
5 Sikan naa, egsilaban ku ka Huda wey egtutungen ku ka me palasyu te Hirusalim.”
Ka peglegpad te Manama te Israil
6 Ne seini ka inlalag te Magbebaye ne Manama, “Layun egpakasale ka me matig-Israil. Sikan naa, eglegparan ku iya sikandan. Su imbelegye dan ka matareng ne etew para te pelata, wey ka ware egkeyimu, para te sandal.
7 Impanleig-leig dan ka egkengaayu-ayu wey impangeyis dan ka ware egkengeyimu. Ne migpasaamuley ka amey wey anak te sabeka re ne malitan, wey sika ka nakalindit te matulus ne ngaran ku.
8 Nangibat sikandan diye te kakiliran te me altar ne nambebelat te manggad ne inggerentiya te nenekeutang kandan. Immultaan dan seeye se nenekeutang kandan wey nambebeli sikandan te binu ne in-inum dan diye te baley te diyus-diyus dan.
9 “Neyimu ran seini minsan migdereetan ku ka me matig-Amur ne egpekeiling kalayat te kayu ne sidar wey iling kakehal te kayu ne tehas. In-im-imuan ku sikandan dereeti iling te kayu ne warad sugpang wey warad tued.
10 Ne sikeddi ka migpalihawang kandan puun te Ihiptu wey indumaan ku sikandan diye te disirtu seled te hep‑at ne pulu (40) ne leg‑un. Inggimu ku sika eyew egkaangken dan ka tane te me matig-Amur.
11 In-alam ku ka duma ne me anak niyu ne me lukes eyew egkeyimu ne prupita, wey ka duma ne me kanakan inggimu ku ne Nasariyu. Me Israilita, kene naa ne malehet seini?”
Sika ka ingkahi te Magbebaye ne Manama.
12 “Piru impeinum niyu te binu ka me Nasariyu wey ware niyu pepangguhura ka me prupita te igpalalag ku kandan.
13 Purisu eglegparan ku sikaniyu due te inged niyu eyew kene kew e egpakapallahuy, wey egpekeiling kew e te kerumata ne egkatami te mabehat ne indulan.
14 Kene egpakaalihu ka meiyal ne egpallahuy, wey egkaawaan te keseg ka me mannekal, wey ka me bahani kene egpakapangabang minsan te kandan ne pegkeetew.
15 Egpallahuy ka tummawan ne egpane, wey kenad egpakapallahuy ka me meiyal ne egpallahuy, wey kene degma egpakaawe ka migpangudde.
16 Ne minsan ka me bahani, egpallahuy ne kenad egpakakukumbale te seeye kangkuwa ne aldew.” Sika ka ingkahi te Magbebaye ne Manama.