10
Ka makaaldek-haldek ne impakita te Manama ki Danyil
1 Te ikatelu e ne leg‑un te peghari ni Hari Siru diye te Pirsya, due lalag ne impanengneng ki Danyil ne migngaranan ded ki Biltisasar. Malehet seeye wey meyitenged te dakel ne gubut. Nasabut seeye ni Danyil su impakita ma te Manama seeye kandin.
2 Te seeye ne timpu, sikeddi si Danyil, miglungku seled te tatelu ne simana.
3 Wara a migkeen te mananam ne egkakeen wey wara ad iya miggeram te ngalap wey ke binu naa. Wara a degma migpanahu te peemut diye te lawa ku seled te tatelu ne simana.
4 Te igkararuwa ne pulu wey hep‑at (24) ne aldew te an-anayan ne bulan, taheed te migsasindeg a diye te ilis te dakel ne Weyig ne Tigris,
5 due nakita ku ne etew ne migsaluub te hinabel wey migtetabed te neelin ne bulawan.
6 Egpekeiling ka lawa rin te mahal ne batu ne egngaranan te biril wey egpekeiling kasil‑ew te kilat ka ulaula rin. Ne ka mata rin egpekeiling te migsiha ne me sulu wey ka belad din wey ka paa rin egpekeiling te impasilak ne burunsi. Ka laheng din egpekeiling te laheng te masulug ne etew.
7 Sikeddi de ka nakakita te impakita te Manama wey ware mule ka me duma ku. Piru inningumaan sikandan te liyas, sikan naa ka namallahuy e sikandan wey miggeles.
8 Purisu sikeddi naan de ka nasame wey ka nakakita te kein-inuwan ne impakita te Manama. Ne dutu, nawaraan ad te keseg wey migmakalawag e ka ulaula ku.
9 Ne narineg ku ka etew ne miglalag. Taheed te migpammineg a kandin, napeled a wey warad kaligneepan ku te nakalangkeb diye te tane.
10 Ne dutu, due migsamsam keddi ne iyan egpuunan ne nakapanimbuel a wey nakatukud se me belad ku diye te tane ne egkelkelen pad.
11 Ne ingkahiyan a nikandin, “Danyil ne inggeyinawaan amana te Manama, sasindeg ka wey pammineha nu ay-ayari ke nekey ka iglalag ku keykew su impeuyan a kayi keykew.” Te peglalag din keddiey, migsasindeg ad ne egkelkelen pad.
12 Ne migkahi sikandin, “Kene ka kaaldek Danyil, su puun pad te an-anayan ne aldew te peggeram nu te pegsabut wey te pegpariralem te pegkeetew nu diye te tangkaan te Manama, indineg e ka pegpangananey nu. Miggendini a isip tabak te pegpanganey nu.
13 Imbalabahan a te mareet ne panalihan ne migbulig te Pirsya seled te daruwa ne pulu wey sabeka (21) ne aldew. Ne nataman, miggingume e si Migil ka egbulig keddi—sabeka sikandin te me pangulu te me panalihan. Ne in-engkeran ku sikandin diye duma te mareet ne panalihan ne migbulig te Pirsya.
14 Ne kuntee, miggendini a eyew te pegpasabut keykew meyitenged te egkeyitabu keureme te me karumaan nu te Israilita. Su meyitenged te egkeyitabu keureme ka impakita te Manama.”
15 Te peglalag din dutu, mig-usengul a wey neummew.
16 Ne due hendue te etew ne migsamsam te bibig ku, ne nakalalag ad e. Diye sikandin migsasindeg te tangkaan ku wey migkahiyan ku sikandin, “Ahalen, amana ne mareet ka eggeramen ku wey nawaraan a te keseg tenged te nakita ku.
17 Na, egmemenu e naa se suluhuanen nu ne egpakiglalag keykew te warad ma keseg ku wey hendue te kena ad egpakageheyinawa?”
18 Ne insamsam ad man‑e te seeye se hendue te etew wey imbehayan a nikandin te keseg.
19 Migkahi sikandin, “Inggeyinawaan ka amana te Manama, purisu kene ka kaaldek wey ka keupianan egduma keykew. Pakannekal ka wey bagget-bagget ka.”
Te nalalag din e seeye, migmanekal ad wey migkahi, “Lalag ke pa ahalen su imbehayan a nikeykew te keseg.”
20 Ne migkahi sikandin, “Keilangan ne eglibed a egpakig-ehet te mareet ne panalihan ne migbulig te Pirsya. Te egpekeimpus ad ka egpakig-ehet, egginguma ka panalihan ne migbulig te Grisya. Piru nakataha ke naa ke mania te miggendini a keykew?
21 Iyan ku innendini ka egnangen keykew ke nekey ka nasulat te libru te kamalehetan. Na, te timpu ne migpakig-ehet a te seeye se maddeet ne panalihan, warad iya lein ne migbulig keddi, ke kene, si Migil re iya—ka panalihan ne migtameng te Israil.