5
Ka pegsahakeen ni Bilsasar
1 Te iyan e mighari si Bilsasar, migpasahakeen sikandin para te sabeka ne libu te me upisyal rin wey mig-inum sikandin duma kandan.
2 Taheed te egpangiinum e ensi Bilsasar duma te me upisyal rin, te me asawa rin, wey te me duwey rin, impaangey rin e ka me bulawan wey me pelata ne me ubab eyew eg-inuman dan. Seeye ne me ubab, nakuwa te apu din ne si Nibukadnisar puun diye te timplu te Hirusalim.
3 Purisu in-uyan e ka me bulawan wey pelata ne me ubab diye te kandin wey in-inuman dan e seeye.
4 Ne mig-iinum sikandan wey indeyrey ran ka me manama ne hinimu puun te bulawan, pelata, burunsi, putew, kayu, wey batu.
5 Ne sahuhune ne due belad te etew ne miglepew wey migsulat diye te alabat te palasyu ne diye te marani te tahuanan te sulu, wey nakita seeye te Hari.
6 Migmakalawag ka Hari wey naaldek-haldek sikandin. Migmahuye sikandin wey ingkelkel se buel.
7 Migpanguleyi sikandin ka egpangumew te me timbusawen, te me matagseb ne mammituen, wey te egmahehane. Ne ingkahiyan din ka me matagseb diye te Babilunya, “Ke hentew seeye se egpakabasa te nakasulat sika te alabat wey egpakahuhud te igpasabut due, egpasaluuban ku te mahal ne kumbale, egpabaliehan te bulawan, wey eggimuwen ku sikandin ne igkatelu ne labew ne talagmandu te migharian ku.”
8 Ne nangingume e diye te Hari ka langun ne me matagseb ne me etew, piru ware sabeka kandan ne egpakabasa wey ke egpakahuhud naa te Hari ke nekey ka igpasabut dutu.
9 Ne nasublaan pad ka kaaldek ni Hari Bilsasar wey migmakalawag pad sikandin ne subla. Ne nalibeg degma ka me upisyal rin.
10 Te pegkarineg te rayna te me guhuren dan, miggendiyad e sikandin te insahakeenan dan wey migkahi, “Mahal ne Hari, egkeuyag ka te ware egtamanan. Kene ka kabantali wey kene ka kaaldek.
11 Kayi te migharian nu, due sabeka ne etew ne diye te kandin ka panisingan te matulus ne me manama. Te timpu pad te apu nu ne si Hari Nibukadnisar, nakitaan seini ne etew te katagseb wey katuenan ne iling te katuenan te me manama. Inggimu sikandin te Hari ne pangulu te me talagbuwas ne egpakaluwas te taheinep, te me timbusawen, te egmahehane, wey te me mammituen.
12 Sikandin si Danyil ne ingngaranan te Hari ki Biltisasar. Due salabutan din wey katuenan ne kene egkeilingan, wey egkateu sikandin ne egluwas te me taheinep, wey egpangguhud te malised ne egnengnengan, wey egkasandihan te mallised ne me prublima. Ipeumew nu si Danyil wey pepangguhud ka kandin te kaluwasan te me lalag ne nasulat sika te alabat.”
13 Purisu impeumew e te Hari si Danyil. Ne migkahiyan sikandin te Hari, “Sikeykew bes si Danyil ne sabeka te me Hudiyu ne egpuun te Huda ne narakep wey in-uyan te apu ku ne si Nibukadnisar?
14 Nakarineg a ne due te keykew ka panisingan te me manama, wey due katuenan nu te pegnengneng, pegsabut, wey due katagseb nu ne kene egkeilingan.
15 Impeumew kud e ka me matagseb wey me timbusawen eyew igpabasa kandan wey igpaluwas ka nakasulat sika te alabat, piru ware sikandan nateu.
16 Nakarineg a ne egkateu ke kun ne egluwas wey egkasandihan ke kun degma te mallised ne me prublima. Ne kuntee, ke egkabasa nu wey ke egkaluwas ka igpasabut kayi, egpakumbalaan ku sikeykew te mahal ne kumbale, egpabaliehan te bulawan, wey eggimuwen ku sikeykew ne igkatelu ne labew ne talagmandu te migharian ku.”
17 Ne migtabak si Danyil, “Mahal ne Hari, keykew e sika se igdasag nu wey ibehey nud e te duma ka ig-unag nu keddi. Piru egbaseen ku red ka nasulat sika te alabat wey egguhuran ku sikeykew te igpasabut kayi.
18 “Mahal ne Hari, ka Amana ne Mabantug ne Manama iyan migbehey te apu nu ne si Nibukadnisar te migharian, kabantug, katelesan, wey karesen.
19 Ne puun te karesen ne imbehey te Manama kandin, nangelkel te kaaldek ka langun ne keet-etawan te nalein-lein ne tribu wey namuun te minsan hendei ne nasud wey linalahan. Eggimatayan din seeye se igkeupii rin te eggimatey wey egkeuyag seeye se igkeupii rin ne egkeuyag. Egbantuhen din seeye se igkeupii rin ne egbantuhen wey igpariralem din seeye se igkeupii rin ne igpariralem.
20 Piru te mighambuhen e sikandin wey migmakehal e se ulu, impepamaneug e sikandin puun te trunu rin wey in-awaan e sikandin te katelesan din.
21 Indeldel sikandin puun te keet-etawan wey nekeiling e te suman-suman te mananap ka suman-suman din. Ne nakalemung e sikandin te mahintalunan ne me asnu wey migpanabtab e sikandin iling te baka. Nasubid sikandin te demmug ne egpuun diye te langit taman te mig-ile e sikandin ne ka Manama bes ne Amana ne Mabantug iyan egbuut te migharian te me etew wey egpaharien din ka minsan hentew ne igkeupii rin.
22 “Ne sikeykew Bilsasar ne apu din, ware ka migmapariralemen minsan nakataha ka te seini se langun.
23 Nasi nu paambuhi ka Magbebaye ne Manama te langit. Impakuwa nu ka me ubab ne egpuun te timplu te Manama wey in-inuman niyu seini te me upisyal nu, te me asawa nu, wey te me duwey nu. Ne insaye nu ka me manama ne inggimu puun te pelata, bulawan, burunsi, putew, kayu, wey batu ne kene egpakakita, kene egpakarineg, wey kene egpakataha. Piru ware nu sayaa ka Manama ne miggen-gen te umul nu wey migbuut te langun ne eggimuwen nu.
24 “Ne diye migpuun te kandin ka belad ne nakita nu ne migsulat te seini ne me lalag,
25 Mini, Mini, Tikil, Parsin.
26 Seini ka igpasabut te sika ne me lalag: Ka Mini, iyan igpasabut se inseel e te Manama ka nasame ne me aldew te migharian nu wey neimpusan e seini.
27 Ka Tikil, iyan igpasabut se nakasuman-suman sikandin ne kene kad e ne eleg ne egmandu.
28 Ka Parsin, iyan igpasabut se imbaad-baad ka migharian nu wey imbehey e diye te Midiyan wey Pirsya.”
29 Seeye de iya, migsuhu si Bilsasar ne egpasaluuban si Danyil te mahal ne kumbale wey egpabaliehan te bulawan. Ne migsuhu si Bilsasar ne egpakahiyan ka me etew te si Danyil ka igkatelu ne labew ne talagmandu diye te migharian din.
30 Te seeye de ne karusileman, innimatayan e si Bilsasar ne Hari te Babilunya.
31 Ne si Daryu ne matig-Midiyan ne hen‑em e ne pulu wey daruwa (62) ne leg‑un se kabuyahi, iyan nakaahew te migharian.