8
Ka karniru wey kambing ne impakita ki Danyil
1 Te ikatelu ne leg‑un te peghari ni Bilsasar, duen e man‑e impakita te Manama keddi.
2 Diye te impakita keddi, diye e kun te ilis te weyig ne egngaranan te Ulay ne diye te Susa. Ka Susa ka iney ne siyudad ne sakup te prubinsya te Ilam.
3 Ne due nakita ku ne sabeka ne lukesan ne karniru ne migsasindeg diye te ilis te weyig. Due daruwa ne sungey kayi ne mallayat. Piru malmalayat ka dangeb ne sungey, wey malmalepet ka dangeb, ne ka malmalayat, namewuriyan migtubu.
4 Ne nakita ku ka karniru ne migdurula diye te iglineb, wey diye te igkahibang ne balabahan, wey diye te igkakawanan ne balabahan. Ne ware mananap ne egpakaatu wey ware egpakaawe puun te geem din. Purisu inggimu rin ka igkeupii rin wey migpegpeggasal meyitenged te pegkeetew rin.
5 Taheed te migsuman-suman a meyitenged dutu, sahuhune ne due miglepew ne lukesan ne kambing puun te iglineb. Innipanew rin ka intiru ne kalibutan ne ware nakaragket se paa te tane. Seeye ne kambing, due sabsabeka ne sungey diye te elat-elat te mata rin ne egpekeinniyat ne egpitawen.
6 Ne indula rin seeye se karniru ne daruwa se sungey ne nakita ku ne diye migsasindeg te ilis te weyig. Ne amana sikandin nabelu-belu te pegdula rin.
7 Te neumaan din e ka karniru, indula rin e patamtamani taman te nahepu e ka daruwa ne sungey kayi. Ne warad keseg te karniru te pegkuntere kandin wey napeled e seini diye te tane wey indi-diekan e te kambing. Warad iya sabeka ne nakapangabang te karniru puun te geem te kambing.
8 Ne amana migpegpeggasal te pegkeetew rin ka kambing. Piru te subla e sikandin ne migmaresen, natempug e ka sungey rin. Piru due lein ne hep‑at ne sungey ne migsubal migtubu ne egpekeinniyat ne egpitawen, wey diye nakatinuru te hep‑at ne pikungan te kalibutan.
9 Diye te sabeka ne sungey, due migtubu ne deisek ne sungey wey migmaresen amana diye te igkakawanan ne balabahan, wey diye te igsile, wey diye te tane te Israil.
10 Migmaresen pad iya seini taman te impangulug e kayi ka duma ne me sundalu diye te langit wey me bituen. Ne indi-diekan din e seini.
11 Migpeggasal sikandin ne madmaresen pad du te Pangulu te me sundalu diye te langit. Impasanggel rin ka aldew-aldew ne egtutungen ne pegpanubad wey indereetan din ka timplu.
12 Tenged te pegsupak din, imbehey e diye te kandin ka me sundalu diye te langit wey ka aldew-aldew ne pegpanubad. Ne insawile din ka kamalehetan wey miglampus sikandin te langun ne eggimuwen din.
13 Ne nakarineg a te daruwa ne panalihan ne migpalalahey. Ka sabeka mig-inse diye te dangeb, “Ken‑u buwa egkabunsuri egkeyitabu ka seeye se impakita te Manama wey kamenu buwa kaluhey? Ken‑u buwa egkeimpusi ka pegpasanggel te aldew-aldew ne pegtutung te igpanubad, wey te pegsupak ne egpakarereet, wey te peg-ahew te timplu, wey te pegleig-leig te me sundalu diye te langit?”
14 Ne migtabak kandin ka dangeb ne panalihan, “Eggingumaan seini seled te 2,300 ne aldew wey marusilem, ne egkataman eglinisan e ka timplu.”
Ka pegpasabut ni Gabril te taheinep ni Danyil
15 Taheed te egpipitew a te seeye se impakita te Manama keddi wey migpalemlem ke nekey ka igpasabut kayi, sahuhune ne due migsasindeg diye te tangkaan ku ne egpekeiling te etew.
16 Ne due laheng te etew ne narineg ku puun te Ulay ne weyig ne miggenendue, “Gabril, ipasabut nu kandin ke nekey ka igpasabut te impakita te Manama kandin.”
17 Ne migparani si Gabril keddiey, ne naaldek a wey miglangkeb a. Piru migkahiyan a nikandin, “Etew, keilangan ne egkasabut nu ne meyitenged te katammanan te kalibutan ka impakita te Manama keykew.”
18 Taheed te eglalag pad sikandin, warad kaligneepan ku te miglangkeb diye te tane. Piru inggen-genan a nikandin wey impasasindeg.
19 Ne ingkahiyan a nikandin, “Egnangenan ku sikeykew ke nekey ka egkeyitabu keureme ke igpaneem-neem e te Manama ka langet din, su ingkerew e sika te katammanan ne timpu.
20 “Ka lukesan ne karniru ne daruwa se sungey ne nakita nu, iyan impahunsilingan te me Hari te Midiyan wey Pirsya.
21 Ka lukesan ne kambing iyan ka Hari te Grisya, wey ka dakel ne sungey ne diye te elat-elat te mata rin iyan ka an-anayan ne Hari.
22 Ne seeye se hep‑at ne sungey ne migsubal migtubu te seeye se natempug ne sungey, iyan ka hep‑at ne migharian ne migpuun te nasud te an-anayan ne Hari. Piru kene iya egpekeiling ka karesen dan te an-anayan ne Hari.
23 “Te katammanan te peghari dan, te timpu ne suble e amana ka pegpakasale dan, eghari e degma ka sabeka ne Hari ne mabulut, mareet, wey mangngateu ne egpanlimbung.
24 Egkeyimu sikandin ne amana ne maresen piru kene ne tenged te kandin iya ne karesen. Ne makaaldek-haldek ka pegdereet din wey eglampus sikandin te langun ne eggimuwen din. Egdereetan din ka maresen ne me etew wey ka keet-etawan te Manama.
25 Tenged te katuenan din, eglampus sikandin te pegpanlimbung wey egdayanen din ka pegkeetew rin. Ne masulug ka me etew ne egtigkawen din egpangimatayi, wey eg-ehetan din ka Pangulu te me pangulu. Piru egdereetan sikandin, kene ne pinaahi te geem te etew, ke kene, te geem te Manama.
26 Egkatuman iya ka impakita te Manama keykew ne pegpeengked te maselem wey maapun ne pegpanubad, piru kene nu pa seini ipangguhud te minsan hentew su mananey mem pad seini egkeyitabu.”
27 Te neimpusan e seeye, sikeddi si Danyil, migmahuya a wey migderalu a te pila ne aldew. Te neulian ad, migpabulusan kud ka himu ne insalig te Hari keddi. Piru nabantalan a te impakita keddi te Manama wey ware ku seini nasabut.