14
Ka ingkene ne eggimuwen ke eglungku
1 Ne ingkahiyan ni Muwisis ka me kabuhalan ni Israil, “Tenged su me anak kew ma te Magbebaye ne Manama niyu, kene niyu pamalpali-i ka me lawa niyu wey ke egtabuluhan niyu naa ka ampew-ampew te me buked niyu ke eglungku kew te minatey,
2 su me keet-etawan kew ma ne inlein te Magbebaye ne Manama niyu. Te langun ne keet-etawan te intiru ne kalibutan, sikaniyu ka in-alam te Magbebaye ne Manama eyew egkeyimu ne keet-etawan din mismu.”
Ka malindit wey malinis ne mananap
3 Ne ingkahiyan e man‑e ni Muwisis ka me kabuhalan ni Israil, “Ne kene kew keen te minsan nekey ne mananap ne in-isip ne malindit.
4 Seini re ka me mananap ne egkaayun ne egkeenen niyu: me baka, karniru, kambing,
5 usa, leew ne kambing, leew ne karniru, wey duma pad ne klasi te karniru.
6 Egkaayun kew ne egkeen te minsan nekey ne mananap ne naperi se sulu, wey egsepe ke egkeen.
7 Piru kene kew keen te mananap ne ware naperi se sulu minsan egsepe eg-abey ke egkeen, iling te kamil, rabit, wey ambew—isipa niyu sika ne malindit ne mananap.
8 Kene kew man‑e keen te babuy minsan naperi ka sulu ran, su kene ma sikandan egsepe ke egkeen, purisu malindit sikandan. Kene kew en iya keen te sika ne mananap minsan egsamsam de te namatey ne lawa ran.
9 “Egkaayun kew ne egkeen te langun ne klasi te isda ne due piyapis wey me engil,
10 piru kene kew keen te isda ne ware piyapis wey me engil su eg-isipen seini ne malindit.
11 “Egkaayun ne egkeen kew te me bayaku ne malinis,
12 piru kene kew keen te agila, banug, uwak,
13 kabugkul, kaliyawa,
14 langun ne klasi te uwak,
15 ekang, ustrits,
16 deisek wey dakel ne ekang, wey maangkag ne ekang,
17 me bayaku ne egdagmang te isda,
18 kabeg, wey kalapenit.
19 Ne kene kew degma keen te langun ne uled-uled ne due pakpak ne in-isip ne malindit.
20 Piru egkaayun kew ne egkeen te me uled-uled ne due pakpak ne in-isip ne malinis.
21 “Ne kene kew degma keen te mananap ne migpatey re due te kandin; egkaayun ne igbehey niyu seini te me lapu wey ke igbelegye niyu naa kandan. Piru sikaniyu mule, kene kew iya keen kayi su me keet-etawan kew ma ne in-alam te Magbebaye ne Manama niyu.
“Ne kene niyu hilutua ka nati te karniru wey ke kambing naa pinaahi te gatas te iney.
22 “Ne keilangan ne egteil kew te igkasapulu ne baad puun te langun ne eg-uma te me kamet niyu eyew ighalad niyu tagse leg‑un.
23 Ne uyana niyu diye te inged ne eg-alamen te Magbebaye ne Manama ka igkasapulu ne baad puun te me trigu niyu, binu, lana, wey ka me panganey te me ayam niyu. Ne diye niyu seini keena te inged ne egsimbaan niyu te Magbebaye ne Manama; himuwa niyu sika eyew egkateu kew ne egtahud layun te Magbebaye ne Manama niyu.
24 Ne emun ke mariyu te me ugpaan niyu ka sika inged, wey egkaliseran kew ne egpanguyan te me igkasapulu puun te me panalangin ne igbehey kaniyu te Magbebaye ne Manama,
25 egkaayun ne igbelegye niyu seini wey ka halin naan de uyana niyu diye te inged ne eg-alamen te Magbebaye ne Manama niyu.
26 Ne ibeli niyu ka seleppi te minsan nekey ne igkeupii niyu: baka, karniru, binu, wey te minsan nekey ne igkeupii niyu. Ne keena niyu naa seini, wey gale-gale kew duma te me pamilya niyu, diye te tangkaan te Magbebaye ne Manama niyu.
27 “Ne kene niyu balahara ka me Libita ne nangugpe diye te me lungsud niyu su ware ma ubag mule baad dan ne tane isip egkapanunud dan ne karatuan ne inggaat iling kaniyu.
28 Ne te katammanan te tagse igkatelu ne leg‑un, libulunga niyu ka langun ne igkasapulu puun te langun ne egkahaani niyu te sika ne leg‑un, wey panguyana niyu seini diye te me tinesanan ne diye te me lungsud niyu.
29 Ne ipamehey niyu seini te me Libita su ware ma ubag mule tane dan ne egkapanunud, wey diye te me lapu, me ilu, wey me balu ne nangugpe te me lungsud niyu eyew egpakakeen ubag degma sikandan wey egkengabulung. Emun ke eggimuwen niyu sika, egpanalanginan te Magbebaye ne Manama niyu ka langun ne eggimuwen niyu.”