20
Ka me balaud te gira
1 “Ne emun ke egpakiggira kew e te me kuntere niyu, wey egkakita niyu ka me kudde dan, me karwahi, wey me sundalu ran ne masmasulug pad kaniyu, kene kew kaaldek kandan, su egdumaan kew te Magbebaye ne Manama niyu ne migpalihawang kaniyu puun te Ihiptu.
2 Te kene kew pad egbunsud ka egpakiggira te me kuntere niyu, egsasindeg diye te katangkaan niyu ka talagpanubad, wey egkahiyan din ka keet-etawan,
3 ‘Pammineg kew me kabuhalan ni Israil. Kuntee ne aldew, egpakiggira kew te kuntere niyu, piru kene kew kaaldek kandan. Panimbulut kew wey kene kew paliliyas,
4 su egdumaan kew te Magbebaye ne Manama niyu. Eglapihan kew nikandin; sikandin ka egpakig-ehet te me kuntere niyu wey egpepanaluwen kew nikandin.’
5 “Ne egkahiyan degma te me upisyal ka me sundalu, ‘Ke due kuntee sabeka kaniyu ne sikan pad nekeimpus te baley rin, wey ware din pad seini ihalad diye te Magbebaye ne Manama, peulia niyu pa sikandin su kema ke egkapatey sikandin diye te giraanan, wey iyan e mule eghalad te baley rin ka lein ne etew.
6 Ne ka seeye se migpamula te paras wey ware pad nakakeen te behas kayi, egkaayun ne eg-uli pad sikandin, su kema ke egkapatey sikandin diye te giraanan, wey lein e mule ne etew ka egpakakeen te behas kayi.
7 Ne ke hentew seeye se mahaan e egkasala, egkaayun ne eg-uli pad sikandin, su kema ke egkapatey sikandin diye te giraanan, wey lein e mule ne etew ka egpakapangasawa te eg-asaween din.’
8 “Ne egkahi pad man‑e ka me upisyal, ‘Ke hentew seeye se naaldek, egkaayun sikandin ne eg-uli su kema ke egkaaldek e degma kangkuwa ka me duma rin.’
9 Ne emun ke egpekeimpus e ka me upisyal ne eglalag te me sundalu, eg-alam e sikandan te me kumandir ne egpangulu te me sundalu.
10 “Ne emun ke eglusuran niyu ka sabeka ne siyudad, behayi niyu pa hun-eyi te timpu ne eggural ka me mahinged.
11 Ne emun ke eggural sikandan, wey eglukatan dan ka gumawan te siyudad, wey egpaseleren kew nikandan, himuwa niyu sikandan langun ne me suluhuanen niyu; pehesa niyu sikandan patrabahuwa para kaniyu.
12 Piru ke kene sikandan eggural su nasi egpakig-ehet kaniyu, palinguti niyu nasi sikandan te me sundalu.
13 Ne emun ke igbehey e sikandan te Magbebaye ne Manama kaniyu, pangimatayi niyu ka langun ne lukes,
14 piru pandakepa niyu ka langun ne malitan, me bate, wey panguripena niyu. Ne panuyuka niyu ka me ayam, wey pangua niyu ka langun ne karatuan dan. Gale-gale kew te langun ne naahew niyu puun te me kuntere niyu ne imbehey kaniyu te Magbebaye ne Manama niyu.
15 Sika himuwa niyu te langun ne me siyudad ne diye te mariyu, wey kene ne kaluahan te tane ne eg-angkenen niyu.
16 “Piru ke egkaahew niyud ka me siyudad diye te tane ne igbehey kaniyu te Magbebaye ne Manama niyu, keilangan ne egpangimatayan niyu ka langun ne etew wey me ayam.
17 Gulaa niyu ka me Hitihanen, me Amurihanen, me Kanaanen, me Pirisihanen, me Hibihanen, wey me Hibusihanen sumale te insuhu te Magbebaye ne Manama niyu,
18 eyew kene kew nikandan egkapanulu te pegsimba te me manama ran, wey eyew kene kew egpakasale te Magbebaye ne Manama niyu.
19 “Ne emun ke egkaluhey ka peglingut niyu te siyudad, kene niyu pamelera ka me kayu diye eyew egkakeen niyu ka me behas kayi; timul pad, kene ne kuntere niyu ka me kayu ne eleg ne egdereetan niyu.
20 Piru pamelera niyu mule ka me kayu ne kene egkakeen se me behas, wey himuwa niyu seini ne me kasangkapan te peglingut niyu te me kuntere niyu taman te egkaahew niyu ka siyudad.”