23
Ka me etew ne igpasuwey
1 Ne ingkahiyan e man‑e ni Muwisis ka me kabuhalan ni Israil, “Kene niyu paapila te punduk te keet-etawan te Magbebaye ne Manama ka etew ne kinepun.
2 “Kene niyu paapila te punduk te keet-etawan te Magbebaye ne Manama ka etew ne naanak te migpeyilabetey ne kene ne alunggun, minsan ka me kabuhalan din taman te igkasapulu (10) ne kabuhalan.
3 “Kene niyu degma paapila te punduk te keet-etawan te Magbebaye ne Manama ka me Amunihanen wey me Muwabihanen taman te igkasapulu (10) ne kabuhalan
4 su ware kew ma nikandan pamehayi te egkakeen wey egkeinum te timpu ne migpangipanew kew puun te Ihiptu, wey nasi dan suuli si Balaam ne anak ni Biyur ne matig-Piyur ne sakup te Misuputamya, eyew te pegdilus kaniyu.
5 Piru ware linglingaa te Magbebaye ne Manama niyu si Balaam, ke kene, nasi din mule himuwa ne panalangin ka dilus perem kaniyu su inggeyinawaan kew ma te Magbebaye ne Manama niyu.
6 Ne kene kew himu te minsan nekey ne egpakameupiya wey ke egpakamatubung naa kandan.
7 “Upiani niyu ka me matig-Idum su me karumaan niyu ma sikandan, wey ka me Ihiptuhanen su me lapu kew ma dengan diye te tane dan.
8 Egkaayun mule ne egpaapilen niyu te punduk te keet-etawan te Magbebaye ne Manama ka me apu dan.”
Ka peglinis layun te kampu
9 Ne ingkahiyan e man‑e ni Muwisis ka me kabuhalan ni Israil, “Ke egkekampu kew te timpu te gira, pariyu kew te minsan nekey ne egpakamalindit kaniyu.
10 Ke due sabeka kaniyu ne inlihawangan te muntus din te peglipereng din, keilangan ne eglihawang sikandin te kampu wey kene pad sikandin eglibed egseled.
11 Ne te seup ne maapun, keilangan ne egpamanihus sikandin, wey te eglineb e ka aldew ne human pad man‑e sikandin egseled te kampu.
12 “Keilangan ne egteil kew te eg-indesan niyu diye te lihawangan te kampu.
13 Ne emun ke eg-indes kew diye te lihawangan, keilangan ne egkaliyan niyu ka eg-indesan niyu pinaahi te kayu wey ke panganiban naa. Ne emun ke egpekeimpus kew e ka eg-indes, bunbuni niyud man‑e te tane.
14 Su egleug-leug ma ka Magbebaye ne Manama niyu diye te kampu niyu eyew te pegbantey kaniyu wey te pegtalu te me kuntere niyu. Purisu keilangan ne layun malinis ka kampu niyu eyew ware egkiteen din ne malindit ne iyan egpuunan ne eg-engkeran kew nikandin.”
Ka pegsagman te uripen ne egpallahuy
15 Ne ingkahiyan e man‑e ni Muwisis ka me kabuhalan ni Israil, “Kene niyu peulia diye te ahalen din ka uripen ne migpallahuy wey mig-aput kaniyu,
16 ke kene, peugpaa niyu sikandin diye te minsan hendei ne me lungsud ne igkeupii rin. Ne kene niyu sikandin ay-ayuwa.
17 “Keilangan ne ware me kabuhalan ni Israil, lukes ma wey se malitan ne egpamelegye te lawa rin diye te timplu isip pegsimba te me manama.
18 Kene niyu gamita ka seleppi ne imbayad te malitan wey ke lukes ne migpamelegye te lawa, eyew igbayad niyu te insaad niyu diye te Magbebaye ne Manama niyu su igkalindit din sika ne himu.
19 “Kene niyu patubui ke egpasambey kew te seleppi wey ke egkakeen naa diye te duma niyu ne me kabuhalan ni Israil.
20 Egkaayun ne egpatubuan niyu ka egpasambayan niyu te me lapu, piru kene niyu re ka duma niyu ne me kabuhalan ni Israil. Himuwa niyu sika eyew egpanalanginan te Magbebaye ne Manama niyu ka langun ne eggimuwen niyu diye te tane ne eg-angkenen niyu.”
Ka me panaad diye te Manama
21 Ne ingkahiyan e man‑e ni Muwisis ka me kabuhalan ni Israil, “Ke egpanaad kew diye te Magbebaye ne Manama niyu, keilangan ne egtumanen niyu iya seini, su egsukutan kew iya te Magbebaye ne Manama niyu, wey egpakasale kew ke kene niyu seini egtumanen.
22 Piru ke kene kew egpanaad, kene kew red egpakasale.
23 Piru ka minsan nekey ne igsaad niyu diye te Magbebaye ne Manama niyu, keilangan ne egtumanen niyu iya.
24 “Ke eggendiye kew te parasan te duma niyu, egkaayun ne egkeen kew te behas kayi taman te igkeupii niyu, piru kene kew uyan diye te baley niyu,
25 wey ke eggendiye kew te triguwan te duma niyu, egkaayun ne egpangetu kew, piru kene niyu seini galaba.”