26
Ka me halad puun te an-anayan ne baad te me uma
1 Ne ingkahiyan e man‑e ni Muwisis ka me kabuhalan ni Israil, “Ke egkaangken niyud ka tane ne igbehey kaniyu te Magbebaye ne Manama niyu isip egkapanunud niyu wey egmekeugpe kew e diye,
2 iteil niyu ka an-anayan ne baad puun te uma te langun ne pinamula niyu. Itahu niyu te baskit wey uyana niyu diye te inged ne eg-alamen te Magbebaye ne Manama niyu eyew egsimbaan niyu kandin.
3 Parani kew te talagpanubad ne migpamakey te sika te timpu, wey kahii niyu sikandin, ‘Pinaahi te seini ne halad, in-ila ku ne ka Magbebaye ne Manama ta ka mig-uyan keddi kayi te seini ne Inged ne Insaad din te me kaap-apuan ta.’
4 “Ne egkuen te talagpanubad ka baskit ne in-uyan niyu, wey igsabuk din seini diye te egkatangkaan te altar te Magbebaye ne Manama niyu.
5 Ne seini ka eglalahen niyu diye te tangkaan te Magbebaye ne Manama niyu: ‘Ka kaapuan ney ne si Hakub ne matig-Aram, ware nateil ne ugpaan dengan; miggendiye sikandin te Ihiptu wey diye mig-ugpe duma te me pamilya rin. Deisek de ubag sikandan dengan, piru nataman, migmasulug e ka kabuhalan dan wey neyimu e ne dakel ne nasud.
6 Piru indeeg-deeg key patamtamani te me Ihiptuhanen; impaantus key nikandan pinaahi te pegpatrabahu te mabbehat ne himu isip me uripen.
7 Ne migpangananey key te Magbebaye ne Manama te me kaap-apuan ney, wey narineg key nikandin. Nakita rin ka me peg-antus ney te mabbehat ne himu, wey ka me pegdeeg-deeg kanami.
8 Purisu impalihawang key te Magbebaye ne Manama puun te Ihiptu pinaahi te dakel ne geem din, wey te makaalat-halat, wey me kein-inuwan ne himu.
9 Ne in-uyan key nikandin kayi te seini ne inged, wey imbehey rin kanami ka seini se meupiya ne tane wey dakel se eg-uma.
10 Purisu in-uyan ku seini se an-anayan ne baad te an-anayan ne uma ne imbehey nu keddi, he Magbebaye ne Manama.’
“Ne isabuk niyu ka baskit diye te tangkaan te Magbebaye ne Manama niyu, wey simbaa niyu sikandin.
11 Ne gale-gale kew tenged te keupiya te Magbebaye ne Manama kaniyu, te me pamilya niyu, te me Libita, wey te me lapu ne mig-ugpe diye te me lungsud niyu.
12 “Tagse igkatelu ne leg‑un, ibehey niyu ka igkasapulu niyu puun te langun ne eg-uma te me pinamula niyu para te me Libita, me lapu, me ilu, wey te me balu, eyew due ubag degma egkengakeen dan.
13 Ne ampu kew diye te Magbebaye ne Manama niyu te egkahi, ‘He Magbebaye ne Manama ney, imbehey kud te me Libita, me lapu, me ilu, wey me balu ka matulus ne baad sumale te insuhu nu keddi; ware ku supaka wey ke inlingawan ku naa ka minsan nekey ne balaud nu.
14 Wara a migkeen te igkasapulu taheed te miglungku a wey ke migsamsam e naa kayi taheed te in-isip a ne malindit, wey ware ku seini ihalad diye te minatey. Magbebaye ne Manama, migtuman a keykew; inggimu ku ka langun ne insuhu nu keddi.
15 Purisu pantawa a ubag nikeykew puun te langit ne ugpaan nu, wey panalangini nu ka keet-etawan nu ne me kabuhalan ni Israil, wey ka imbehey nu kanami ne meupiya ne tane wey dakel se eg-uma, sumale te insaad nu te me kaap-apuan ney.’
16 “Ne kuntee, insuhu kew te Magbebaye ne Manama niyu ne egtumanen niyu te mapahetpet ka langun ne balaud din wey me suhu.
17 Impeila niyu kuntee ka Magbebaye ne Manama niyu, wey migsaad kew ne eg-ikulen niyu ka me balaud, wey ka langun ne me suhu din.
18 Ne impataha degma kuntee te Magbebaye ne Manama ne me keet-etawan kew nikandin sumale te insaad din kaniyu. Purisu keilangan ne egtumanen niyu ka langun ne balaud din.
19 Ne eggimuwen kew nikandin ne labew te langun ne nasud, wey egkarayan kew wey egkabantug. Ne egkeyimu kew ne matulus ne keet-etawan te Magbebaye ne Manama niyu sumale te insaad din.”