30
Ke eglibed te Manama ka me kabuhalan ni Israil
1 Ne ingkahiyan e man‑e ni Muwisis ka me kabuhalan ni Israil, “Emun ke egkeyitabu kaniyu ka panalangin wey ka dilus ne ingkahi ku kaniyu, wey egkasuman-suman niyu seini diye te me nasud ne eg-empetan kaniyu te Magbebaye ne Manama niyu;
2 ke eglibed kew wey ka me kabuhalan niyu diye te Magbebaye ne Manama niyu, wey egtumanen niyu te mapahetpet ka langun ne insuhu ku kaniyu kuntee,
3 egkeyimenawan kaniyu ka Magbebaye ne Manama, wey egpanguyanen kew e man‑e nikandin puun te me nasud ne in-empetan din kaniyu, wey egmatubungen kew e man‑e nikandin.
4 Minsan pad ke immandeldel kew te Magbebaye ne Manama niyu diye te maddiyu amana ne inged te kalibutan, eglibulungen kew red iya man‑e nikandin,
5 wey igmalibed kew diye te inged te me kaap-apuan niyu, eyew egkaangken niyu red man‑e seini. Ne egmatubungen wey egpamasuluhen kew pad man‑e nikandin labew te kaap-apuan niyu.
6 Ne egbalbalawan te Magbebaye ne Manama niyu ka me pusung niyu wey ka me pusung te me kabuhalan niyu eyew eggeyinawaan niyud sikandin te mapahetpet, wey egpakapabulus-bulus kew ne eg-ugpe te sika ne inged.
7 Ne iyan din e egpasalerepen te seini ne me dilus ka me kuntere niyu ne migdeeg-deeg kaniyu.
8 Ne eg-ikulen wey egtumanen niyud man‑e te mapahetpet ka langun ne suhu te Magbebaye ne Manama ne ingkahi ku kaniyu kuntee.
9 Ne egpalampusen kew te Magbebaye ne Manama niyu te langun ne eggimuwen niyu, wey egbehayan kew nikandin te masulug ne anak, masulug ne ayam wey dakel ne eg-uma; igkahale din ka pegpanalangin kaniyu, iling te kahale din te pegpanalangin din te me kaap-apuan niyu.
10 Piru keilangan ne egpamminehen niyu ka Magbebaye ne Manama niyu, wey egtumanen ka me suhu wey ka me tulumanen din ne nasulat te seini ne baseen te Balaud; libed kew te mapahetpet diye te Magbebaye ne Manama niyu.”
Ka pegkamalemu te Balaud te Manama
11 Ne migpabulus-bulus si Muwisis ka migkahi, “Kene ne malised ne egtumanen ka Balaud ne ingkahi ku kaniyu kuntee.
12 Ware seini diye te langit ne egpakakahi kew te, ‘Hentew‑a ka egpekeendiye te langit ne eg-angey kayi wey igpangguhud kanta eyew egtumanen ta?’
13 Ne ware degma seini diye te talipag te dahat ne egpakakahi kew te, ‘Hentew‑a ka egpakalapas te dahat ne eg-angey kayi wey igpangguhud kanta eyew egtumanen ta?’
14 Ka seini ne me lalag, duen ded te me be‑be wey pusung niyu, purisu egkatuman niyu seini.”
Ka peg-alam te umul
15 Ne migpabulus-bulus si Muwisis ka migkahi, “Kuntee ne aldew, alam kew te seini: umul wey ke kamatayen, katubung wey ke karereetan?
16 Egbanasalan ku sikaniyu kuntee ne aldew ne geyinawei niyu ka Magbebaye ne Manama niyu, wey tumana niyu ka me suhu wey ka me tulumanen din. Ke eggimuwen niyu sika, egpanalanginan kew nikandin diye te tane ne eggendiyaan wey eg-angkenen niyu; egmatubung kew wey egkeyimu ne dakel ne nasud.
17 Piru ke egsupaken niyu ka Magbebaye ne Manama wey kene kew egpammineg kandin, wey iyan niyud egsimbeen wey egpamakayen ka lein ne me manama,
18 igpanengneng ku kaniyu kuntee ne aldew ne egkahule kew iya; egmalepet de ka umul niyu diye te tane ne eggendiyaan wey eg-angkenen niyu, ne diye te talipag te Hurdan.
19 Kuntee ne aldew, egdawiten ku isip me talagpamalehet ka langit wey tane ke nekey ka eg-alamen niyu: umul wey ke kamatayen, katubung wey ke karereetan. Purisu alama niyu ka umul eyew egkeuyag kew wey ka me kabuhalan niyu.
20 Geyinawei niyu ka Magbebaye ne Manama niyu; tumana niyu sikandin wey palunggaat kew kandin, su eyew egpekeugpe kew wey egmalayat ka umul niyu diye te Inged ne Insaad din ne igbehey diye te me kaap-apuan niyu ne ensi Abraham, Isaak, wey si Hakub.”