33
Ka tubtubaren ni Muwisis para te me kabuhalan ni Israil
1 Ne seini ka me tubtubaren ni Muwisis ne etew te Manama, para te me kabuhalan ni Israil, te ware pad sikandin migpatey.
2 Migkahi sikandin,
“Migtupang ka Magbebaye ne Manama puun te Sinay,
wey puun te inged ne Idum, miglayag sikandin iling te aldew,
wey puun te Bubungan ne Paran, impapitew rin ka kabantug din;
migginguma sikandin duma te linibu ne me panalihan,
wey ka igkakawan ne belad din, inggen-gen din te egkanlabkanlab ne hapuy.
3 Inggeyinawaan iya te Magbebaye ne Manama ka keet-etawan din,
wey intamengan din ka langun ne immatulus din.
Purisu mig-ikul sikandan kandin, wey migtuman te me suhu din,
4 ne ingguhud ku kandan
isip egkapanunud te me kabuhalan ni Hakub.
5 Neyimu ne Hari te Israil ka Magbebaye ne Manama
te miglibulung ka langun ne tribu te Israil
wey ka me pangulu ran.”
6 Ne seini ka tubtubaren ni Muwisis meyitenged te me kabuhalan ni Rubin:
“Kene perem egkammatey ka me kabuhalan ni Rubin
minsan deisek de sikandan.”
7 Ne seini degma ka tubtubaren din meyitenged te me kabuhalan ni Huda:
“He Magbebaye ne Manama, pammineha nu ka pegpangananey te me kabuhalan ni Huda,
wey palemunga nu sikandan te keet-etawan nu.
Ne pinaahi te me belad nu,
pangabangi nu sikandan puun te me kuntere dan.”
8 Ne seini degma ka tubtubaren din meyitenged te me kabuhalan ni Libi:
“He Magbebaye ne Manama, ibehey nu ka Tumim wey ka Urim nu
diye te matinumanen ne me suluhuanen nu ne me kabuhalan ni Libi,
su neel-elehan nud ma sikandan diye te Masa
wey inlasey-lasey nud diye te weyig te Miriba.
9 Impapitew ran ne labew ka peg-unung dan keykew
du te me amey wey iney ran, me suled, wey me anak dan.
Intuman dan ka me suhu nu,
wey ka kasabutan nu.
10 Impanulu dan te me kabuhalan ni Israil ka me balaud
wey me suhu nu;
mighalad sikandan te insinsu
wey migtutung diye te altar nu te igpanubad.
11 He Magbebaye ne Manama, behayi nu sikandan te kanekal,
wey panalangini nu ka langun ne eggimuwen dan.
Ne gulaa nu ka me kuntere dan,
eyew kenad sikandan egpakapanlusud.”
12 Ne seini degma ka tubtubaren din meyitenged te me kabuhalan ni Binhamin:
“Inggeyinawaan te Magbebaye ne Manama ka me kabuhalan ni Binhamin,
wey impariyu din te me karereetan;
mig-ugpe sikandan wey intamengan din layun.”
13 Ne seini degma ka tubtubaren din meyitenged te me kabuhalan ni Husi:
“Egpanalanginan perem te Magbebaye ne Manama ka tane dan,
pinaahi te uran puun te aw-awangan,
wey te weyig puun te diralem te tane,
14 wey pinaahi te aldew, egpamasuluhen din perem ka me behas te me pinamula ran tagse bulan,
15 wey memeupiya perem ka egkahaani ran
wey eg-um-umambu ka eg-uma diye te kabubunganan,
16 duma te memeupiya ne eg-uma te tane wey te katubung kayi.
Ka seini ne me panalangin, egpuun te Manama
ne miglalag puun te taliware te nalegleg ne sapinit.
Egpalunggaat perem seini ne me panalangin diye te me kabuhalan ni Husi
su sikandin ma ka labew te langun ne suled din.
17 Manekal si Husi iling te panganey ne turu ne baka,
wey due me sungey ne iling te me sungey te leew ne turu ne baka.
Ne ka seini ne me sungey, iyan ka linibu ne me kabuhalan ni Ipraim,
wey me kabuhalan ni Manasis ne egtalu te langun ne nasud.”
18 Ne seini degma ka tubtubaren din meyitenged te me kabuhalan ni Sabulun wey ni Isakar:
“Eggale-gale ka me kabuhalan ni Sabulun te pegpamelegye dan diye te duma ne me nasud;
eggale-gale ka me kabuhalan ni Isakar su egmatubung sikandan diye te me ugpaan dan.
19 Egginggaten dan ka keet-etawan ne eggendiye te bubungan dan
eyew egtutung te eleg ne igpanubad diye te Manama.
Ne egpanlaglag sikandan te me karatuan puun te dahat
wey te impamunbunan ne karatuan diye te me lelanek diye te ilis.”
20 Ne seini degma ka tubtubaren din meyitenged te me kabuhalan ni Gad:
“Egdayanen ka Manama ne migbehey te maluag ne tane diye te me kabuhalan ni Gad;
eg-ugpe sikandan ne iling te liyun ne andam ne egbindas-bindas te ulu wey pamanayen te me kuntere dan.
21 In-alam dan ka amana ne meupiya ne baad te tane
ne intahahe para te me kumandir te me sundalu.
Ne te timpu ne migmanlibulung ka me pangulu te me kabuhalan ni Israil,
miggendiye sikandan wey impatuman dan te me kabuhalan ni Israil ka me balaud wey me suhu te Magbebaye ne Manama.”
22 Ne seini degma ka tubtubaren din meyitenged te me kabuhalan ni Dan:
“Ka me kabuhalan ni Dan, iling te anak te liyun
ne mig-um-umbetut puun te Basan.”
23 Ne seini degma ka tubtubaren din meyitenged te me kabuhalan ni Naptali:
“Dakel ka panalangin te Magbebaye ne Manama te me kabuhalan ni Naptali;
egkaangken dan ka tane dapit te igkakawanan ne balabahan, wey te iglineb.”
24 Ne seini degma ka tubtubaren din meyitenged te me kabuhalan ni Asir:
“Egpanalanginan perem ka me kabuhalan ni Asir labew te me suled dan;
igkahale perem sikandan te Manama labew te me suled dan,
wey egmasulug perem ka me behas te me ulibu ran,
eyew dakel ka lana ran ne egkaayun e ne eg-eleran te me paa ran.
25 Ne ware igkaaldek dan su me putew ma wey burunsi ka me pagul te gumawan dan;
egmalig‑en perem sikandan taman te egkengabuyag sikandan.
26 He me kabuhalan ni Israil, ware egpekeiling te Manama niyu ne mateles amana wey maresen
ne mig-untud te me gapun diye te langit ka egbulig kaniyu.
27 Iyan niyu aputanan ka Manama ne ware kapatayan;
eglig‑enen kew nikandin pinaahi te geem din,
wey egpandeldelen din ka me kuntere niyu,
wey egsuhu sikandin ne egpeyimatayan sikandan.
28 Purisu eg-ugpe ka me kabuhalan ni Hakub ne mariyu te karereetan,
diye te tane ne dakel se eg-uma ne trigu, wey iyam ne binu,
su egpabisbisan ma ka tane dan pinaahi te demmug puun te langit.
29 Meupiya kew keet-etawan te Israil
ne inluwas te Magbebaye ne Manama!
Ka Magbebaye ne Manama ka egpangabang kaniyu,
wey sikandin ka egpakig-ehet te me kuntere niyu.
Egmakapananap ka me kuntere niyu ne egparani kaniyu,
wey egpandi-diekan niyu ka me panubaran dan diye te me bubungan.”