12
Ka pegpahunsiling te pegkarakep te me Israilita
1 Ne impanengneng ad man‑e te Magbebaye ne Manama,
2 “Etew, mig-ugpe ka duma te me masinupaken ne keet-etawan. Due me mata ran piru kene sikandan egmakakita, due me talinga ran piru kene sikandan egmakarineg, su me masinupaken ma sikandan.
3 “Sikan naa etew, panines ka te me kalaglahan nu ne iling ubag te narakep, wey hipanew ka peendiye te lein ne inged. Himuwa nu seini te maaldew taheed te egpamipitew ka me etew. Kema ke egkasuman-suman dan ded ne me masinupaken sikandan.
4 Ipalihawang nu ka intines nu ne me kalaglahan nu te maaldew eyew egkita sikandan, wey te marusilem, papitawa nu sikandan ne eggipanew ka iling te sabeka ne dinakep.
5 Ne taheed te egmanetengteng sikandan, lungahi nu ka matikang wey makepal ne alad ne batu, wey duen ka suleddu.
6 Ne papitpitawa nu sikandan keykew te eggipanew te marusilem, ne egpaniang te me kalaglahan nu. Bunbuni nu ka ulaula nu eyew kene ka egpakakita ke hendei ka egpabulus. Eggimuwen ku sikeykew ne tuus para te me Israilita.”
7 Purisu intuman ku ka insuhu keddi te Magbebaye. Te maaldew, impalihawang kud ka me kalaglahan ku, wey te pegkamarusilem, inlungahan ku ka alad. Ne taheed te migmanetengteng ka me etew, impaniang kud e ka me kalaglahan ku, wey miggipanew a te timpu te marusilem.
8 Te maselem e, impanengneng ad te Magbebaye,
9 “Etew, emun ke eg-inse ka me masinupaken ne keet-etawan te Israil ke nekey ka eggimuwen nu,
10 kahii nu sikandan te due iglalag ku te Hari diye te Hirusalim, wey te langun ne me Israilita.
11 Kahii nu sikandan: Ka inggimu ku, iyan sika tuus te egkeyitabu kaniyu. Egpandakepen kew iya.
12 Ne minsan ka Hari niyu, diyad egsuleddu te lungag te alad ne inlungahan te duma eyew egbayaan din te eggipanew te marusilem ne egpaniang te me kalaglahan din. Egbunbunan din ka ula-ula rin eyew kene sikandin egpakakita te egbayaan din.
13 Egsaklahen ku sikandin iling te mananap wey egsahad e sikandin kayi. Ne eg-uyanen ku sikandin diye te Babilunya, te tane te Kaldiya, piru kene sikandin egpakakita diye, taman te egpatey sikandin.
14 Ne ig-empet ku te langun ne nasud ka langun ne sakup din, ka me suluhuanen din, wey ka me sundalu rin. Ne egbalaharen kud e ne egpangimatayan sikandan.
15 Ne emun ke ig-empet kud sikandan diye te langun ne nasud, henduen pad ne egpekeila sikandan ne sikeddi ka Magbebaye.
16 Piru egtuhutan ku ne duen ded egkeuyag kandan puun te gira, bitil, wey dalu, eyew igpakapangguhud dan diye te me nasud ne egkeendiyaan dan ka mallindit ne me hinimuwan dan. Ne egpakanengneng e sikandan ne sikeddi ka Magbebaye.”
Ka pegpahunsiling te pegkaaldek
17 Ne migpabulus-bulus ka Magbebaye ne migpanengneng keddi,
18 “Etew, pakekelkel ka tenged te kaaldek, taheed te egkeen ka wey eg-inum.
19 Ne kahii nu naa ka keet-etawan te Israil, ‘Seini ka ingkahi te Magbebaye meyitenged te me mahinged te Hirusalim wey te Israil. Egmangeen sikandan wey egmanginum te weyig ne egpangelkelen de due tenged te pegkaaldek, su egpangahawen ma ka me kasangkapan te nasud dan te me kuntere dan tenged te mabbulut sikandan te me duma ran.
20 Egpangguhusen ka me siyudad dan, wey egkeyimu e ne ware mahinged. Ne egpakanengneng e sikandan ne sikeddi ka Magbebaye.’ ”
Ka Iyam ne me Lalag puun te Manama
21 Ne impanengneng ad man‑e te Magbebaye,
22 “Etew, mania te due me lalahen due te Israil ne miggenendue, ‘Masulug e ne me timpu ka miglihad, piru mania te ware natuman ka me panagne?’
23 Purisu kahii nu sikandan te migkahi a se Magbebaye, ‘Egtamanen kud ka sika ne me lalahen, wey kenad e sika egkalalag due te Israil.’ Kahii nu sikandan te, ‘Mahaan e egkatuman ka me panagne.’
24 Su egkataman en iya ka me ubat ne panagne wey igmakita due te keet-etawan te Israil.
25 Sikeddi ka Magbebaye, ke nekey ka eglalahen ku, egkatuman iya. Ne kenad egkaluhey, egkatuman e ka ingkahi ku meyitenged kaniyu te me masinupaken ne keet-etawan. Sikeddi se Magbebaye ka miglalag kayi.”
26 Ne impanengneng ad man‑e te Magbebaye,
27 “Etew, migkahi ka keet-etawan te Israil te mananey pad egkeyitabu ka immakita te Manama keykew wey ka impanagne nu te naluhey e ne timpu.
28 Purisu kahii nu sikandan te migkahi a se Magbebaye, ‘Kenad e egkaluhey ne egkatuman en iya ka inlalag ku. Sikeddi se Magbebaye ka miglalag kayi.’ ”