22
Ka me sale te me matig-Hirusalim
1 Ne impanengneng ad man‑e te Magbebaye ne Manama,
2 “Etew, hukumi nud ka Hirusalim ne siyudad te me talaggimatey, wey ipanengneng nu kandin ka makalelanget ne hinimuwan te me mahinged diye te kandin.
3 Kahii nu sikandin te migkahi a se Magbebaye: He siyudad te me talaggimatey, eggingume e ka karereetan nu, su inlinditan nu ma ka pegkeetew nu pinaahi te pegpangimu nu te me diyus-diyus.
4 Dakel ka sale nu tenged te pegpangimatey nu, wey inlinditan nu ka pegkeetew nu pinaahi te me diyus-diyus ne inggimu nu. Ne tenged due, eggingume e ka karereetan nu. Ne egngingisiyan kad e wey egderali-dian kad e te langun ne duma ne nasud.
5 Egngingisiyan kad e te maddani wey maddiyu ne inged, tenged te mareet ne bansa nu wey me kahubut due te keykew.
6 “Inggamit te langun ne pangulu te Israil ka katenged dan, eyew te pegpangimatey.
7 Kenad e egtahud te me amey wey iney ka me mahinged due te keykew. Impaneleppian dan ka me lapu, wey immanleig-leig dan ka me balu wey me ilu.
8 Ware dan tahura ka matulus ne timplu ku, ka me kasangkapan ne inhalad e keddi, wey ka Aldew te Peggimeley.
9 Due degma me etew due te keykew ne egpamayung te duma eyew eggimatayan dan. Ne ka duma, egmangeen te inhalad diye te me diyus-diyus diye te me bubungan, wey eggimu te mareet.
10 Ne ka duma, egmangilabet te nenasunud ne iney ran, wey ka duma, egpamehes eggilabet te me malitan minsan eglangeseen.
11 Ne ka duma eggimu te malindit wey makalelanget ne hinimuwan, egmangilabet te asawa te senge-etew, egmangilabet te me ambey, wey ke me hari ran naa ne malitan te amey ran.
12 Ne ka duma, egpangimatey e eyew re egpakaseleppi, egmeutang ne dakel se tubu, wey egmanlimbung. Nalingew en iya sikandan keddi. Sikeddi se Magbebaye ka miglalag kayi.
13 “Purisu amana a nalangeti kaniyu tenged te pegpanlimbung wey pegpangimatey niyu eyew re egpakaseleppi kew.
14 Kahiyen niyu buwa ne egpakapanimbulut kew pad te timpu ne eglegparan kud sikaniyu? Sikeddi se Magbebaye ka miglalag kayi wey eggimuwen ku iya seini.
15 Egmegsusuwayen ku sikaniyu diye te nalein-lein ne me nasud, wey egkataman e ka maddeet ne hinimuwan niyu.
16 Ne egpakakita ka duma ne nasud te egkeyilawan kew, wey egpakanengneng kew e ne sikeddi ka Magbebaye.”
Ka sugnu te Manama
17 Ne migpabulus-bulus ka Magbebaye ne migpanengneng keddi,
18 “Etew, warad e karuan te me Israilita. Egpekeiling e sikandan te burunsi, lata, putew wey ke tingga naa ne nasame diye te sugnu ne inlenayan te pelata.
19 Purisu kahii nu sikandan te migkahi a se Magbebaye: Tenged su ware man e me karuan niyu, eglibulungen ku sikaniyu diye te taliware te siyudad te Hirusalim,
20 iling te etew ne egpanlimud te me pelata, burunsi, putew wey ke tingga naa, eyew eglenayen din diye te sugnu. Iling naa degma due ka eggimuwen ku kaniyu, eglibulungen ku sikaniyu diye te Hirusalim, wey eglegparan ku sikaniyu diye tenged te migpangebel-ebel ne langet ku.
21-22 Eglibulungen ku sikaniyu wey eglegparan tenged te migpangebel-ebel ne langet ku. Ne egkahule kew e iling te pelata ne egleney diye te sugnu. Ne egpakanengneng kew e ne sikeddi se Magbebaye ka migpaneem-neem te langet ku kaniyu.”
Ka me sale te me pangulu te Israil
23 Ne migpabulus-bulus ka Magbebaye ne migpanengneng keddi,
24 “Etew, kahii nu ka me Israilita te egpekeiling te ware nalinisi wey ke neurani naa ka siyudad dan te timpu te migpangebel-ebel ne langet ku.
25 Migplanu te mareet ka seeye se egpangulu kandan ne egpekeiling te migginihel ne liyun ne migbindas-bindas te narawi rin. Migpangimatey sikandan te me etew, migpangahew te me karatuan, wey te me mahal ne kasangkapan. Masulug ka nenabalu tenged te pegpangimatey ran.
26 Insupak te me talagpanubad ka balaud ku, wey inlinditan dan ka matulus ne me kasangkapan ku. Ware dan panulua ka me etew ke nekey ka in-isip ne malinis te Manama wey ke nekey ka in-isip din ne malindit, wey ware dan e linglingaa ka Aldew te Peggimeley. Te iling due ne paahi, wara a tahura nikandan.
27 Ka me igbuyag dan, egpekeiling te me leew ne asu ne migbindas-bindas te narawi ran. Egpangimatey e sikandan eyew re egpakaseleppi.
28 Imbunbunan te me prupita ka sale te me Israilita pinaahi te pegpanagne te ubat puun te kene ne mallehet ne igmakita. Migkahi sikandan te seeye kun ka ingkahi ku kandan minsan wara a migpakiglalag kandan.
29 Ne minsan ka me lerew ne etew, migmanlimbung degma wey migmanakew. Egmanleig-leig sikandan te egkengaayu-ayu, wey egmandeeg-deeg te me lapu.
30 Ne migpamitew a te etew due te kandan ne egpakaayad-ayad te matikang wey makepal ne alad ne batu wey egpakapataliware keddi wey te me etew, eyew kene ku red egdereetan ka siyudad, piru warad en iya nakita ku.
31 Purisu igpaneem-neem ku kandan ka migpangebel-ebel ne langet ku. Eglegparan ku sikandan tenged te maddeet ne hinimuwan dan. Sikeddi se Magbebaye ka miglalag kayi.”