47
Ka weyig ne migtulayas puun te timplu
1 Ne impalibed ad e man‑e uyana te etew diye te gumawan te timplu. Ne diye te diddiralem te gumawan te timplu, due nakita ku ne weyig ne migtulayas peendiye te igsile su nakatangke ma ka timplu diye te igsile. Migtulayas ka weyig puun te diddiralem te kakiliran ne baad te timplu dapit te igkakawanan ne balabahan, wey nakalihad te igkakawanan ne balabahan te altar.
2 Ne in-uyan a te etew diye te lihawangan, wey diye key migbaye te gumawan ne dapit te igkahibang ne balabahan. Ne induma a nikandin te eglingut peendiye te bayaanan ne dapit te igsile. Ne nakita ku diye ka weyig ne migtulayas puun te igkakawanan ne balabahan te bayaanan.
3 Ne miggendiye key se daruwa te ilis te weyig dapit te igsile. Ne taheed te eggipanew key, migbunsud e degma sikandin ka egseked taman te nakaseked sikandin te lalimma ne gatus (500) ne mitrus. Ne induma a nikandin te eglapas te weyig wey taman de te buku-buku ku se karaleman dutu.
4 Ne migseked e man‑e sikandin te lein ne lalimma ne gatus (500) ne mitrus, wey induma ad e man‑e nikandin abayi te eglapas te weyig, wey taman e te buel ku se karaleman dutu. Ne migseked e man‑e sikandin te lein ne lalimma ne gatus (500) ne mitrus, wey induma ad e man‑e nikandin te eglapas te weyig, wey taman e te liwaraan ku se karaleman dutu.
5 Ne migseked pad iya man‑e sikandin te lein ne lalimma ne gatus (500) ne mitrus, wey migmaralem e ka weyig wey kenad e egkalapas te eggipanawen de gawas te eglumbuken e.
6 Ne ingkahiyan a te etew, “Etew, tantanuri nu ka nakita nu.”
Ne in-uyan ad e man‑e nikandin diye te gakapan.
7 Te nakahakap ad e, nakita ku ne duen e mule masulug ne kayu diye te tagse ilis te weyig.
8 Ne ingkahiyan a te etew, “Migtulayas ka seini ne weyig peendiye te tane ne dapit te igsile taman diye te me Napu te Hurdan, wey diye te Namatey ne Dahat. Ne egmananam e ka weyig diye te Namatey ne Dahat.
9 Minsan hendei seini egtulayas, masulug ne isda wey duma pad ne hinimuwan ne eglumbuk ka egmatapik kayi su egpakamananam ma seini te mapeit ne weyig.
10 Ne masulug e ka me mangngengalap ne egmangugpe diye te ilis te Namatey ne Dahat. Puun de iya te Inggadi taman te In-Iglaim ka egmamiyale su masulug man e ka nakalkalasi ne me isda diye iling te me isda te Dahat ne Miditiranyu.
11 Piru ka diye te ilis ne mabbabew re wey egmanlasak-lasak, egmapeit ded mule eyew egkaangayan te me etew te asin.
12 Ne ka tagse ilis te weyig, due migpanubu ne kayu ne egkakeen se me behas wey egpakabawi se me dewun. Ne kene egkallanes ka me dewun, wey kene egkaamin ka me behas. Egpamehas seini tagse bulan su egtulayasan ma te weyig ne egpuun te timplu.”
Ka me eletanan te tane
13 Ne migkahi ka Magbebaye, “Ne seini ka me eletanan te tane ne egba-baaren nu diye te me kabuhalan te sapulu wey daruwa (12) ne anak ni Israil. Daruwa ne baad ka para te me kabuhalan ni Husi.
14 Keilangan ne egmeg-ilingen niyu te egbaad-baad ka tane su migsaad a te me kabuybuyahan niyu ne igbehey ku seini kandan eyew egkapanunud niyu degma.
15 “Ne seini ka me eletanan. Ka eletanan te tane ne dapit te igkahibang ne balabahan, egbunsud te Dahat ne Miditiranyu peendiye te Hitlun, te Libu-Hamat, te Sidad,
16 te Biruta, te Sibarim ne marani te eletanan te Damasku, wey Hamat, taman diye te Hasir-Hatikun ne marani te eletanan te Hauran.
17 Purisu ka eletanan te tane ne dapit te igkahibang ne balabahan, egbunsud te Dahat ne Miditiranyu taman diye te siyudad te Inun ne eletanan te Damasku, wey eletanan te Hamat ne dapit te igkakawanan ne balabahan. Sika ka eletanan te tane ne dapit te igkahibang ne balabahan.
18 “Ne ka eletanan te tane ne dapit te igsile, egbunsud te eletanan te Damasku peendiye te Weyig ne Hurdan ne elat-elat te Gilyad wey te tane te Israil, peendiye te Namatey ne Dahat taman te Tamar. Sika ka eletanan te tane ne dapit te igsile.
19 “Ne ka eletanan te tane ne dapit te igkakawanan ne balabahan, egbunsud te Tamar peendiye te weyig te Kadis-Miriba peendiye man‑e te eletanan te Ihiptu taman diye te Dahat ne Miditiranyu. Sika ka eletanan te tane ne dapit te igkakawanan ne balabahan.
20 “Ne ka eletanan te tane ne dapit te iglineb, iyan ka Dahat ne Miditiranyu taman diye te egkatalipag te Libu-Hamat. Sika ka eletanan te tane ne dapit te iglineb.
21 “Purisu ay-ayari niyu te egbaad-baad ka tane diye te tagse tribu te Israil.
22 Sika ka egkapanunud niyu wey te me lapu ne mig-ugpe duma kaniyu wey neneetew se me anak diye te Israil. Isipa niyu sikandan ne me mahinged ne me Israilita, wey baari niyu degma sikandan te tane ne egkapanunud dan.
23 Ke hendei sikandan ne tribu mig-ugpe, diye degma sikandan egbaari te tane ne egkapanunud dan. Sikeddi se Magbebaye ka miglalag kayi.”