5
Ka suhu te Manama ne egpatetabuluhen si Isikil
1 Ne ingkahiyan a te Magbebaye ne Manama, “Etew, kuwa ka te mahalang ne kampilan wey tabuluhi nu ka bulbul nu wey kahisi nu ka sumpe nu. Ne timbanga nu naa ka bulbul wey sumpe nu, wey baara nu sika te tatelu ne baad.
2 Ne tutunga nu ka an-anayan ne baad due te taliware te siyudad ke egkeimpusan nud te egpahunsiling ka peglusud kayi. Ne ka igkarangeb ne baad, ipalingut nu itahu te siyudad wey panibbasa nu te kampilan. Ne ka igkatatelu ne baad, ipalayap nu te kalamag, su egmegsusuwayen ku ka keet-etawan ku pinaahi te kampilan.
3 Piru kuwa ke red te deisek ne bulbul, wey ihiket nu seini te sidsid te kumbale nu.
4 Ne kuwa ka te pila ne buuk ne bulbul wey tutunga nu seini. Ne puun due, egdalapdap ka hapuy ne egpakasilab te keet-etawan te Israil.”
5 Ne migpabulus ka Magbebaye ne Manama ne migkahi, “Sika ka pahunsiling ke nekey ka egkeyitabu te keet-etawan te Hirusalim, ka siyudad ne inggimu ku ne amana ne impurtanti ne nasud te kalibutan.
6 Piru insupak dan ka me suhu ku pinaahi te peggimu te maddeet, insamsamilian dan ka me balaud ku wey ware dan tumana ka me suhu ku, wey subla pad sikandan ne masinupaken du te duma ne nasud ne nakalingut kandan.
7 Purisu egkahi a se Magbebaye ne Manama te seini: Sikaniyu se me matig-Hirusalim, tenged te subla kew man e ne masinupaken du te duma ne nasud ne nakalingut kaniyu, wey insamsamilian niyu ma ka me balaud ku wey ware niyu tumana ka me suhu ku, minsan ka me suhu te me nasud ne nakalingut kaniyu,
8 purisu egpakig-ehet a kaniyu wey eglegparan ku sikaniyu. Ne egkiteen te me nasud ka peglegpad ku kaniyu.
9 Tenged te mallindit ne hinimuwan niyu, eggimuwen ku due te kaniyu ka ware ku re due ken‑u himuwa, wey kene kud e degma seini eg-abayan eggimuwa.
10 Egkekeenen e te amey wey iney ka me anak dan, wey egkekeenen e degma te me anak ka amey wey iney ran. Eglegparan ku iya sikaniyu, wey ka egkasame, egmegsusuwayen ku diye te minsan hendei.
11 “Purisu sikeddiey se Magbebaye ne Manama ne egkeuyag te ware egtamanan, igpahunlibet ku ne egguleen ku iya sikaniyu te ware pegkeyid‑u wey kenad egkabalbalawan ka suman-suman ku te peglegpad kaniyu su inlinditan niyu ma ka timplu ku pinaahi te pegsimba niyu te me diyus-diyus, wey tenged te mallindit ne hinimuwan niyu.
12 Egbaaren ku sikaniyu te tatelu. Ka hun‑a ne baad, egkammatey pinaahi te gutas wey dalu diye te seled te siyudad, ne ka igkarangeb ne baad, egkammatey pinaahi te gira diye te lihawangan te siyudad, wey ka igkatelu ne baad, egmegsusuwayen ku diye te intiru ne kalibutan, wey kene ku sikandan egpeen-enengan te egbayad-bayad.
13 “Ke egkeyitabu e seini, wey egpakasuli ad e kaniyu, egkabewu-bewu e ka langet ku. Ne egpakanengneng kew e ne sikeddi se Magbebaye ka miglalag kayi tenged te dakel ne geyinawa ku kaniyu.
14 Egguhusen ku ka siyudad niyu, wey egderali-dian kew e te me nasud ne nakalingut kaniyu, wey te seeye se egmanlihad te inged niyu.
15 Egderali-dian kew e wey egngingisiyan te me nasud ne nakalingut kaniyu. Egkengaaldek e sikandan ke egpakakita kaniyu. Ne te timpu ne eglegparan ku sikaniyu tenged te mangune-kune ne langet ku, egkeyimu kew e ne paney-paney kandan. Sikeddi se Magbebaye ka miglalag kayi.
16 Egpabitilan ku sikaniyu ne iling te tunud ne eggule kaniyu. Egkanasnasian ka gutas taman te warad iya egkakeen niyu.
17 Ne timul pad te gutas, egpeuyanan ku pad iya man‑e sikaniyu te mabbulut ne mananap ne egpangimatey te me anak niyu. Ne egkammatey kew degma te dalu, pegpangimatey wey te gira. Sikeddi se Magbebaye ka miglalag kayi.”