8
Ka keet-etawan ne nekeuli puun te pegkarakep
1 Ne seini ka me pangulu te me pamilya wey ka nenallista duma kandan ne mig-uli duma keddi puun te Babilunya te timpu ne si Artasirsis ka Hari:
2 Si Hirsum, ne puun te me kabuhalan ni Pinihas; si Danyil, ne puun te me kabuhalan ni Itamar; si Hatus ne anak ni Sikaniyas, ne puun te me kabuhalan ni Dabid;
3 si Sakariyas, ne puun te me kabuhalan ni Parus wey ka sabeka ne gatus wey lalimma ne pulu (150) ne me lukes ne nalista duma kandin.
4 Si Iliyuhinay ne anak ni Sirayas, ne puun te me kabuhalan ni Pahatmuwab duma te daruwa ne gatus (200) ne me lukes.
5 Si Sikaniyas ne anak ni Dihasil, ne puun te me kabuhalan ni Satu duma te tatelu ne gatus (300) ne me lukes.
6 Si Ibid ne anak ni Diyunatan, ne puun te me kabuhalan ni Adin duma te lalimma ne pulu (50) ne me lukes.
7 Si Hisayas ne anak ni Ataliya, ne puun te me kabuhalan ni Ilam duma te pitu ne pulu ne (70) ne me lukes.
8 Si Sibadiyas ne anak ni Maykil, ne puun te me kabuhalan ni Sipatiyas duma te walu ne pulu (80) ne me lukes.
9 Si Ubadiyas ne anak ni Hihil, ne puun te me kabuhalan ni Huwab, duma te 218 ne me lukes.
10 Si Silumit ne anak ni Husipiyas, ne puun te me kabuhalan ni Bani, duma te 160 ne me lukes.
11 Si Sakariyas ne anak ni Bibay, ne puun te me kabuhalan ni Bibay, duma te daruwa ne pulu wey walu (28) ne me lukes.
12 Si Diyuhanan ne anak ni Hakatan, ne puun te me kabuhalan ni Asgad, duma te 110 ne me lukes.
13 Ensi Ilipilit, si Hiyuwil wey si Simaya, ne egpuun te me kabuhalan ni Adunikam, ka namewuriyan ne migginguma, duma te hen‑em ne pulu (60) ne me lukes.
14 Ensi Utay wey si Sakur, ne puun te me kabuhalan ni Bigbay, duma te pitu ne pulu (70) ne me lukes.
Ka peg-alam ni Isra te me Libita para te timplu
15 Ne inlibulung ku diye te weyig ne migpeendiye te Ahaba seeye se langun ne egduma keddi wey migkekampu key diye seled te tatelu ne aldew. Te pegpitew ku te listaan te me etew wey te me talagpanubad, ware nakita ku diye ne me Libita.
16 Ne impeumew ku ka me pangulu ne ensi Ilisir, si Aryil, si Simaya, si Ilnatan, si Harib, si Ilnatan, si Natan, si Sakariyas, wey si Misulam, wey ka me talagpanulu ne ensi Huwiyarib wey Ilnatan,
17 wey impeendiye ku sikandan ki Idu, ka pangulu te inged te Kasipiya. Impanulu ku sikandan te iglalag dan ki Idu wey te me karumaan din ne me suluhuanen te timplu su eyew egpeuyanan key te me suluhuanen ne eggimu te me himu te timplu te Manama ney.
18 Tenged te keyid‑u te Manama kanami, impeuyan dan kanami ka mangngateu ne etew ne si Siribiyas, duma te sapulu wey walu (18) ne me anak din wey me karumaan din ne me lukes. Egpuun si Siribiyas te me kabuhalan ni Mali ne apu ni Libi, ne anak ni Israil.
19 Impeuyan dan degma si Hasabiyas duma ki Hisayas, ne puun te me kabuhalan ni Mirari, wey duma rin ka daruwa ne pulu (20) ne me karumaan din wey anak din ne me lukes.
20 Migpeuyan pad man‑e sikandan te daruwa ne gatus wey daruwa ne pulu (220) ne me suluhuanen te timplu ne nalista ka langun ne ngaran dan. Ka me suluhuanen te timplu, inggimu dengan ni Hari Dabid wey te me upisyal rin eyew te pegbulig te me Libita.
Ka pegpuasa wey peg-ampu enni Isra
21 Ne diye te ilis te weyig te Ahaba, migsuhu a ne egpuasa su keilangan ne egpariralem key te pegkeetew ney diye te tangkaan te Manama wey eghangyu ne meupiya ka peggipanew ney, te me anak ney, duma te me karatuan ney.
22 Su neyilew a ne eghangyu te Hari te me sundalu rin wey te egmangudde eyew egbantey kanami puun te me kuntere ney diye te deralanen, su inlalahan ney ka Hari ne egpangabang ka Manama te langun ne egsalig kandin piru eglegparan din ka langun ne eg-engked kandin.
23 Sikan naa ka migpuasa key wey migpeyimmimenew te Manama ney ne egbantayan key, wey intabak din ka me peg-ampu ney.
Ka me dasag para te timplu
24 Ne in-alam ku ka sapulu wey daruwa (12) ne talagpanubad ne migmangulu duma engki Sarabiyas, ki Hasabiyas wey ka sapulu (10) te me karumaan dan ne me lukes.
25 Ne imbehey ku diye te kandan ka pelata, bulawan, me kasangkapan ne indasag te Hari, te me talagtambag din, te me upisyal rin, wey te langun ne Israilita para te timplu te Manama ney.
26 Intimbang ku wey imbehey kandan ka daruwa ne pulu wey daruwa ne libu (22,000) ne kilu ne pelata, wey tatelu ne libu wey hep‑at ne gatus (3,400) ne kilu ne kasangkapan ne pelata, wey tatelu ne libu wey hep‑at ne gatus (3,400) ne kilu ne bulawan,
27 daruwa ne pulu (20) ne yahung ne bulawan ne walu ne kilu se kabehat langun, wey daruwa ne yahung ne burunsi ne iling ded ka bali te bulawan.
28 Ne ingkahiyan ku sikandan, “Sikaniyu wey ka seini se me kasangkapan inlein e para te Magbebaye ne Manama. Ne ka pelata wey bulawan ne igdasag diye te Magbebaye ne Manama, ka Manama te kaap-apuan niyu,
29 bantayi niyu wey itines niyu seini diye te seled te sinabeng te timplu te Magbebaye ne Manama diye te Hirusalim taman te egkatimbang niyu seini diye te tangkaan te me pangulu te me talagpanubad, te me Libita, wey te me pangulu te me Israilita.”
30 Sika naa, in-uyan te me talagpanubad wey te me Libita ka natimbang e ne pelata wey bulawan, wey me kasangkapan eyew eg-uyanen diye te timplu te Manama ney diye te Hirusalim.
Ka peg-uli diye te Hirusalim
31 Ne migligkat key te igkasapulu wey daruwa (12) ne aldew te an-anayan ne bulan puun te Weyig te Ahaba peendiye te Hirusalim. Ne migpangabang kanami ka Manama wey impariyu key nikandin puun te me kuntere ney wey puun te egmanggepas diye te dalan.
32 Te nekeuma key e te Hirusalim, miggimeley key pad diye te tatelu ne aldew.
33 Te igkeep‑at ne aldew, intimbang ney e diye te seled te timplu te Manama ney ka pelata wey bulawan wey ka me kasangkapan ney, wey impiyal ney e seini ki Mirimut ne anak ni Uriyas, ka talagpanubad. Ne iyan din duma si Iliyasar ne anak ni Pinihas, wey ka me Libita ne si Husabad ne anak ni Hiswi, wey si Nuwadiyas ne anak ni Binuy.
34 Ne inseel ka langun wey intimbang, wey inlista ka langun ne kabehat.
35 Ne nataman, ka nekeuli puun te pegkarakep, migbehey te igmanubad diye te Manama te Israil. Ne migpanubad sikandan te sapulu wey daruwa (12) ne turu ne baka para te langun ne Israilita, siyam ne pulu wey hen‑em (96) ne lukesan ne karniru, wey pitu ne pulu wey pitu (77) ne nati te karniru. Ne migpanubad man‑e sikandan te sapulu wey daruwa (12) ne lukesan ne kambing para te me sale dan. Intutung seini langun isip igpanubad diye te Magbebaye ne Manama.
36 Ne imbehey ran degma ka insulat te Hari ne suhu diye te labew ne me upisyal wey diye te me gubirnadur te prubinsya ne kayi te talipag te Weyig ne Iyupratis, wey imbulihan te seini ne me pangulu ka me etew wey ka timplu te Manama.