16
Ka mana wey ka me puhu
1 Ne mig-awe e ka langun ne kabuhalan ni Israil diye te Ilim wey miggendiyad sikandan te disirtu ne egngaranan te Sin ne neelat te Ilim wey te Sinay. Migginguma sikandan diye te igkasapulu wey lalimma (15) ne aldew te ikarangeb ne bulan ligkat te peg-awe dan diye te Ihiptu.
2 Ne diye, migsagsahukul e ka langun ne keet-etawan ki Muwisis wey ki Aarun.
3 Migkahi sikandan, “Meupiya pad perem ke impangimatayan key e te Magbebaye ne Manama diye te Ihiptu. Egpakapanaman-taman key pad mule egpakakeen diye. Piru kuntee, in-uyan key nikaniyu kayi te disirtu eyew egpatey key langun te gutas.”
4 Nataman migkahiyan te Manama si Muwisis, “Egpeuranan ku sikaniyu te paan. Keilangan ne egmanlihawang ka me etew tagse aldew eyew eglilimud te egkakeen dan ne eleg de te sika ne aldew. Duen ku egkakita ke egtumanen dan naa ka balaud ku kandan.
5 Te igkeen‑em e ne aldew, keilangan ne eglilimud sikandan te egkakeen ne eleg te daruwa ne aldew.”
6 Purisu migkahiyan ni Muwisis wey ni Aarun ka langun ne kabuhalan ni Israil, “Egkanengnengan niyu kuntee te marusilem ne ka Magbebaye ne Manama iyan migpaawe kaniyu puun te Ihiptu.
7 Ne egkakita niyu te egkaliwaswas e ka katelesan te Manama, su narineg din ka pegsagsahukul niyu kandin. Su hentew key naan de iya ubag seini se egsagsahukulan niyu?”
8 Ne migkahi pad man‑e si Muwisis, “Egbehayan kew te Manama te ngalap ne egkakeen niyu te marusilem wey paan ne egkakeen niyu te maaldew su narineg din ka pegsagsahukul niyu kandin. Su hentew key naan de iya ubag seini se egsagsahukulan niyu? Kene ne sikanami ka egsagsahukulan niyu, su ka Manama.”
9 Ne migkahiyan ni Muwisis si Aarun, “Nangeni nu ka langun ne kabuhalan ni Israil te egpeparaniyen diye te tangkaan te Magbebaye ne Manama su narineg din ka pegsagsahukul ran.”
10 Te sasangan pad ne egpangguhud si Aarun te keet-etawan, migtengteng sikandan diye te disirtu wey sahuhune ne miglepew diye te gapun ka katelesan te Manama.
11 Ne migkahiyan te Manama si Muwisis,
12 “Narineg ku ka pegsagsahukul te me kabuhalan ni Israil. Kahii nu sikandan te egpakakeen sikandan te ngalap te egkasagkup e, wey egpakapanaman-taman sikandan egpakakeen te paan te egkapawe e. Ne egkanengnengan niyu ne sikeddiey ka Magbebaye ne Manama niyu.”
13 Te nasagkup e, nanlepew e ka susuluhi ne me puhu wey nekeempet te kampu ran. Te maselem e, nalingut te demmug ka kampu ran.
14 Te nammare e ka demmug, iyan dan e nakita ka dereisek wey memaangkag diye te tane ne egpekeiling te beug.
15 Seeye de iya, migmein-inseey e sikandan langun, “Nekey‑a sika?” Su ware sikandan nakanengneng ke nekey seeye.
Ne migkahiyan ni Muwisis sikandan, “Imbehey sika te Magbebaye ne Manama eyew egkeenen niyu.
16 Egpalilimuren kew langun nikandin te eleg de ne egkaamin niyu, me senge-hantang ka tagse etew. Ne al-alahaa niyu re ke mamenu kew kasulug diye te leeb niyu.”
17 Sikan naa ka nanguwa dutu ka me kabuhalan ni Israil; ka duma dakel ka ingkuwa, ka duma deisek de.
18 Te pegpanakug dan e, nekeg-iling de iya ka nakuwa te tagse etew. Ka dakel se inlimud wey ka deisek se inlimud, eleg-eleg de iya kandan wey warad egkasame dan te egkeen.
19 Ne migkahiyan ni Muwisis ka keet-etawan, “Kene kew same para kaaselem.”
20 Piru ware migpammineg ka duma ki Muwisis wey migsesame mule sikandan para te seup ne aldew. Te napawe e, in-uleran e ka insame dan wey migngareg e. Seeye naa ka nabelu si Muwisis kandan.
21 Miglilimud sikandan te tagse maselem te eleg ne egkakeen dan, ne emun ke egmeinit e amana ka aldew, egkaleney e ka nasame diye te tane.
22 Te igkeen‑em ne aldew, miglilimud sikandan te egkakeen ne eleg te daruwa ne aldew; me daruwa ne gantang ka nalimud te tagse etew. Ne miggendiye ki Muwisis ka langun ne pangulu te me etew wey mig-inse meyitenged dutu.
23 Ne migkahiyan ni Muwisis sikandan, “Seini ka suhu te Magbebaye ne Manama: ‘Kaaselem ka Aldew te Peggimeley, su matulus seini ne aldew diye te Manama. Sikan naa, hilutua niyu kuntee ka igkeupii niyu ne eggilutuen wey ge-gaa niyu ka igkeupii niyu ne egge-geen, wey itines niyu ka same niyu eyew egkeenen niyu kaaselem.’ ”
24 Purisu intines dan ka same eyew egkeenen dan te seup ne aldew su sika iya ka insuhu ni Muwisis kandan, wey ware seeye namewu wey ware iyasi.
25 Ne migkahi si Muwisis, “Keena niyud sika su Aldew te Peggimeley kuntee te Magbebaye ne Manama. Warad egkakeen ne egkakita niyu kuntee.
26 Egpakalilimud kew te egkakeen te hen‑em ne aldew, piru te igkapitu ne aldew ne iyan ka Aldew te Peggimeley, warad egkakita niyu ne egkakeen.”
27 Te igkapitu ne aldew, due duma ne me etew ne migleug-leug eyew egpamitew te egkakeen piru ware nakita ran.
28 Ne migkahiyan te Magbebaye ne Manama si Muwisis, “Ken‑u bu pad egtuman ka seini ne me etew te me suhu ku wey me balaud ku?
29 Sumsumana niyu ne sikeddiey ka migbehey kaniyu te Aldew te Peggimeley, sikan naa ka tagse igkeen‑em ne aldew, egbehayan ku sikaniyu te egkakeen ne eleg te daruwa ne aldew. Keilangan ne eg-uugpe de iya ka langun ne etew te igkapitu ne aldew, wey ware egleleug eyew egpamitew te egkakeen.”
30 Purisu miggimeley ka me etew te igkapitu ne aldew.
31 Ne migngaranan te me kabuhalan ni Israil te mana ka seeye se egkakeen. Egpekeiling seini te dereisek ne beni ne memaangkag, wey egpekeiling ka nanam din te manipis ne paan ne insewuhan te teneb.
32 Ne migkahi si Muwisis, “Migsuhu ka Magbebaye ne Manama ne egpatinesen ki te mana eyew igpakita te me kabuhalan ta keureme, su eyew egkakita ran ka keenen ne impakeen din kanta kayi te disirtu te timpu ne impaawe ki nikandin diye te Ihiptu.”
33 Migkahiyan ni Muwisis si Aarun, “Angey ka te tahuanan wey tahui nu te senge-hantang ne mana, wey itahu nu diye te tangkaan te Manama eyew igpakita te me kabuhalan ta keureme.”
34 Purisu intuman ni Aarun ka insuhu te Magbebaye ne Manama ki Muwisis wey intahu din ka mana diye te tangkaan te Tahuanan te Kasabutan eyew igtines.
35 Ne mana re iya ka keuyahan te me kabuhalan ni Israil te hep‑at ne pulu (40) ne leg‑un, taman te nekeume e sikandan diye te eg-ugpaan dan, ka inged te Kanaan.
36 (Me senge-hantang ne mana ka egkalimud te sabeka ne etew tagse aldew.)