20
Ka Sapulu ne Balaud
(Diy. 5:1-21)
1 Ne nataman, impanpanayan te Manama ka me etew te migkahi,
2 “Sikeddiey ka Magbebaye ne Manama niyu ne mig-angey kaniyu puun te inged te Ihiptu, wey ka migpaawe kaniyu te neuripen.
3 “Kene kew simba te duma ne me manama, su sikeddi de iya simbaa niyu.
4 “Kene kew himu te larawan te minsan nekey ne diye te langit, diye te tane, wey diye te weyig eyew egsimbeen niyu.
5 Kene kew panimbuel wey ke egsimba naa rue, su sikeddi se Magbebaye ne Manama niyu, talikuren a ne Manama; igkeupii ku ne sikeddi de ka egsimbeen. Iglagkes ku te egparusa ka me anak tenged te sale te me amey ran, peendiye te apu dan te mata, tenged su eg-apul sikandan keddiey.
6 Piru igpakita ku ka geyinawa ku ne kene egkabalbalawan diye te libu-libu ne kabuhalan ne miggeyinawa keddi wey migtuman te me suhu ku.
7 “Kene niyu gamita ka ngaran te Magbebaye ne Manama niyu te mareet ne tuyu. Su egdusaan ku iya seeye se eggamit te ngaran ku te mareet ne tuyu.
8 “Tantanuri niyu layun ka Aldew te Peggimeley, wey iteil niyu seini para keddi.
9 Trabahu kew te hen‑em ne aldew, wey himuwa niyu ka langun ne eggimuwen niyu,
10 piru ka igkapitu ne aldew, Aldew sika te Peggimeley, wey iteil niyu para te Magbebaye ne Manama niyu. Kene kew trabahu te minsan nekey, sikaniyu langun se taltalaanak, minsan ka me suluhuanen niyu ne lukes wey malitan, wey ka me ayam niyu, wey ka me mahaliyug niyu ne miglapu due te kaniyu.
11 Su te hen‑em ne aldew, inggimu te Manama ka langit wey ka tane, ka dahat, wey ka langun ne nakatahu dutu. Te igkapitu ne aldew, miggimeley e sikandin, sikan naa ka impanalanginan din ka Aldew te Peggimeley wey inteil din para kandin.
12 “Tahura niyu ka amey wey iney niyu su eyew egmalayat ka umul niyu diye te tane ne igbehey te Magbebaye ne Manama niyu.
13 “Kene kew himatey.
14 “Kene kew panlibug.
15 “Kene kew panakew.
16 “Kene kew uubat ka egpamalehet eyew igdakesel ka duma ne etew.
17 “Kene kew keimma te baley te duma ne etew, te asawa rin, te me suluhuanen din ne me lukes wey me malitan, te me ayam din, wey te minsan nekey ne kandin.”
Ka pegkaaldek te me etew
(Diy. 5:22-33)
18 Nangelkel te liyas ka me etew te pegkarineg dan te luhung wey te dahing te trumpita, wey te pegkakita ran te kilat wey te bubungan ne mig-eebel. Ne diye de iya sikandan nanasindeg te mariyu.
19 Ne migkahiyan dan si Muwisis, “Sikeykew re ka egpakiglalag kanami, ne egpammineg key, kene de ne ka Manama su kema ke egpamatey key.”
20 Ne migkahiyan sikandan ni Muwisis, “Kene kew kaaldek su miggendini ka Manama eyew eg-el-elehan kew, wey eyew due pegkaaldek niyu kandin eyew kene kew e eggimu te sale.”
21 Ne diye ded man‑e nanasindeg ka me etew te mariyu, ne si Muwisis, sasangan e ne egparani te makepal ne gapun ne neugpaan te Manama.
Ka balaud meyitenged te pegpanubad
22 Ne migkahiyan te Magbebaye ne Manama si Muwisis, “Inangen nu seini diye te me Hibruwanen: ‘Nakita niyud ne migpakiglalag a kaniyu puun te langit.
23 Kene kew himu te me manama ne pelata wey ke bulawan naa eyew iglagkes niyu keddi te egsimba.
24 Himuwi a nikaniyu te altar ne tane, wey duen niyu ipanubad ka egtutungen ne me dasag niyu para te keupianan. Iyan niyu ipanubad ka me karniru wey me baka. Diya a man‑e nikaniyu simbaa te inged ne igpanulu ku kaniyu, wey egbayaan ku sikaniyu wey egpanalanginan.
25 Ne emun ke eggimuwan a nikaniyu te altar ne batu, kene niyu sapsapi ka me batu, su kene ne likes ne eghalaran sika keddi ke eggamitan niyu te igpanapsap ka peggimu te altar.
26 Kena a nikaniyu himuwi te altar ne due haheran, su egkakita ka me lebut niyu ke egpamaneyik kew te haheran.’ ”