22
Ka balaud meyitenged te me karatuan
1 “Emun ke due migpanakew te baka wey ke karniru naa, keilangan ne egliwanan din ka tinakew rin minsan ke miggimatayan din ka tinakew rin wey ke imbelegye naa. Lalimma ne baka ka igliwan te sabeka ne baka, wey hep‑at ne karniru ka igliwan te sabeka ne karniru.
2 Ne emun ke nasapenan ka takawen ne diye te kandin ka tinakew rin ne baka wey ke asnu wey ke karniru naa, keilangan ne daruwa ka ayam ne igbayad din te sabeka ne tinakew rin. Ke ware igbayad din, igbelegye e sikandin ne uripen eyew due igbayad te tinakew rin.
3 Ne emun ke nasapenan sikandin te marusilem ka migpanakew wey neyimatayan sikandin, keilangan ne kene egguusey ka nekeyimatey.
4 Piru ke maaldew e sikandin neyimatayi, keilangan ne egguusey ka nekeyimatey.
5 “Emun ke nakaawe ka ayam te sabeka ne etew wey migpanabtab e te pinamula te senge-etew, keilangan ne egliwanan te kamuney ka nareetan te subla ne meupiya ne behas te pinamula rin diye te kamet din.
6 “Emun ke due migsisilab wey migdalapdap ka hapuy peendiye te kamet te senge-etew wey nasilaban e ka me pinamula rin, keilangan ne egbayaran te migsisilab ka langun ne nareetan ne pinamula, minsan ka sikan pad migtubu wey ka nahaani e wey ka diyad te lelapeng.
7 “Emun ke igtahu te sabeka ne etew ka seleppi din wey minsan nekey ne karatuan din diye te senge-etew, wey egkatarin seini su intakew diye te baley, keilangan ne egpabayaren te dubli ka migtakew ke egkarakep sikandin.
8 Piru ke kene egkarakep ka migtakew, keilangan ne eg-uyanen diye te tangkaan te Manama ka kamuney te baley eyew egkanengnengan te me talewusey ke sikandin naa ka mig-angey dutu wey se kene.
9 “Minsan nekey ne apulanan meyitenged te pegpaag-ahawey te baka, asnu, karniru, manggad, wey minsan nekey pad ne me kasangkapan, keilangan ne eg-uyanen diye te tangkaan te Manama eyew eggusayen. Seeye se egkewukuman ne egpangangken de, keilangan ne egbayad te dubli diye te malehet ne kamuney.
10 “Emun ke egpatey, egkapalian, wey ke egkalaag ka impaalimaan ne asnu wey ke baka, wey ke karniru naa, wey minsan nekey ne ayam, wey ware nakakita te neyitabu,
11 keilangan ne eggendiye te tangkaan te Magbebaye ne Manama ka etew ne mig-alima wey egpahunlibet ne ware kalintahaan din te neyitabu. Keilangan ne egpalintutuuwan seeye te kamuney wey kene din egpabayaren ka mig-alima.
12 Piru ke intakew ka ayam, keilangan ne egbayaran te mig-alima ka kamuney te ayam.
13 Piru ke indawi te mahintalunan ka ayam, keilangan ne igpakita te mig-alima ka same eyew due pamalehet, wey kenad sikandin egpabayaren.
14 “Ke egsambey ka sabeka ne etew te ayam te senge-etew, wey egkapalian seini wey ke egpatey ne ware nakakita ka kamuney, keilangan ne egbayaran seini te migsambey.
15 Piru ke due ka kamuney, kene ne keilangan ne egbayad ka migsambey. Emun ke in-abangan ka insambayan ne ayam, iyan e mahabayad ka seleppi ne in-abang te ayam.”
Ka balaud meyitenged te peg-ugpe
16 “Emun ke egtintalen te lukes wey egguliran ka mengebay ne ware pad egpangasawa, keilangan ne eg-asaween din ka malitan wey egbehey te pantun.
17 Piru ke kene eg-uyun ka amey te malitan ne eg-asaween ka anak din, keilangan ne egduwad ded ka lukes te eleg ne pantun.
18 “Keilangan ne eggimatayan ka egmahehane ne me malitan.
19 “Keilangan ne eggimatayan ka minsan hentew ne eggilabet te mananap.
20 “Keilangan ne eggimatayan ka minsan hentew ne egpanubad diye te me manama, su sikeddi de ka eleg ne egpanubaran.
21 “Kene niyu ay-ayuwa wey le-leiha ka me lapu, su nakalapu kew red degma dengan diye te Ihiptu.
22 Kene niyu ang-anggei ka me balu wey ka me ilu.
23 Ke eg-ang-anggaan niyu sikandan, egtabaken ku sikandan ke egpangananey keddi.
24 Ne eggimatayan ku sikaniyu tenged te egmangebel-ebel ne langet ku kaniyu. Egkataman, egkengabalu ka me asawa niyu wey egkengeilu ka me anak niyu.
25 “Emun ke egpasambey kew te seleppi te duma niyu ne egkaayu-ayu, kene niyud e paanaki ka seleppi niyu iling te eggimuwen te egpasambey te seleppi.
26 Emun ke eg-angayen niyu ka kumbale te sabeka ne etew eyew igpalenged te utang din, keilangan ne ig-uli niyu kandin ka kumbale te kene pad eglineb ka aldew.
27 Su seeye de iya ubag ka igpakabukus din te lawa rin, wey warad iya uulesenen din te peglipereng din. Ne emun ke egpangananey sikandin keddiey, egbulihan ku sikandin su hiid‑uwen a.
28 “Kene kew lalag te mareet diye te Manama wey kene niyu dilusa ka pangulu te inged niyu.
29 “Kene kew kannuhun ne egdasag keddi te egkahaani niyu, wey te binu te behas te paras, wey te lana te ulibu.
“Ihalad niyu keddi ka panganey niyu ne me lukes,
30 wey ka panganey ne me anak te me baka wey me karniru. Iparuma niyu pa te iney ka nati ne iyam pad miglesut taman te pitu ne aldew human niyu idasag keddi.
31 “In-alam ku sikaniyu eyew egkeyimu ne matulus ne keet-etawan ku. Purisu kene kew keen te ngalap te ayam ne indawi. Ipakeen niyu seini te me asu.”