24
Ka peggehet te kasabutan
1 Nataman, migkahiyan te Magbebaye ne Manama si Muwisis, “Takereg ka kayi te keddi te bubungan, wey dumaa nu si Aarun, si Nadab, si Abihu, wey ka pitu ne pulu (70) ne igbuyag te Israil. Ne simbaa a nikaniyu diye te bayew re madmariyu keddi.
2 Sikeykew re Muwisis ka egpakarani keddi, ne ka duma, keilangan ne egpariyu de keddi. Ne kene egkaayun ne egduma ka me etew keykew te egtakereg kayi.”
3 Seeye naa, inggendiyaan e ni Muwisis ka me etew wey ingguhuran din e sikandan te langun ne insuhu te Manama. Ne naamin-amin de iya sikandan langun ka migkahi, “Eggimuwen ney ka langun ne inlalag te Magbebaye ne Manama.”
4 Ne insulat ni Muwisis ka langun ne inlalag te Manama. Te napawe e, migselem-selem sikandin mig-enew wey miggimu te altar diye te pabunsuran te bubungan, wey migtahu degma sikandin te sapulu wey daruwa (12) ne batu eyew eggimuwen ne limlimuan te tagse me kabuhalan te sapulu wey daruwa (12) ne anak ni Israil.
5 Migsuhu man‑e sikandin te me kanakan ne egpatutungen te me dasag diye te Manama wey te igpanubad dan para te keupianan.
6 Ne ingkuwa rin ka liware te langesa te me ayam wey intahu din diye te me yahung, ne ka same, insawig din diye te altar.
7 Ne ingkuwa rin ka Libru te Kasabutan wey imbasa rin te meemen diye te keet-etawan. Ne migkahi ka me etew, “Eggimuwen ney ka langun ne inlalag te Magbebaye ne Manama wey egtumanen ney sikandin.”
8 Ne ingkuwa ni Muwisis ka langesa wey insawig din diye te me etew wey migkahi sikandin, “Seini ka langesa ne migpamalehet te kasabutan ne inggimu te Magbebaye ne Manama kanta sumale te inlalag din kanta.”
9 Nataman, migtakereg e te bubungan si Muwisis, si Aarun, si Nadab, si Abihu, wey ka pitu ne pulu (70) ne igbuyag te Israil,
10 wey nakita ran diye ka Manama te Israil. Ne due egpekeiling te impabunsud ne batu ne sapiru diye te indiekan din ne iling keilem te langit.
11 Ne ware dereeti te Manama ka me igbuyag te Israil. Nakita ran sikandin, wey nangekeen e sikandan wey nangiinum.
Ka pegtalun ni Muwisis diye te Bubungan ne Sinay
12 Ne migkahiyan te Magbebaye ne Manama si Muwisis, “Takereg ka kayi te keddi te bubungan wey kene ka mahaan awe, su igbehey ku keykew ka malumpayag ne me batu ne nasulatan te langun ne Balaud. Insulat ku seini eyew igpanulu te me keet-etawan.”
13 Sikan naa ka migtaggel e si Muwisis wey ka suluhuanen din ne si Huswi, wey migtakereg e sikandan diye te bubungan te Manama.
14 Te ware pad sikandan nakaligkat, impanagtahaan pad ni Muwisis ka me igbuyag te miggenendue, “Tahad kew re kayi taman te egpakalibed key. Kayi re si Aarun wey si Hur te kaniyu. Ke due igkasamuk niyu, diye kew parani kandan.”
15 Nabunbunan te gapun ka bubungan te pegtakereg enni Muwisis dutu.
16 Migtulen ka katelesan te Magbebaye ne Manama diye te Bubungan ne Sinay, wey nabunbunan seini te gapun te hen‑em ne aldew. Te igkapitu ne aldew, in-umew e si Muwisis te Manama puun te gapun.
17 Ne nakita te me kabuhalan ni Israil ka katelesan te Manama ne egpekeiling te egkanlabkanlab ne hapuy diye te ampew te bubungan.
18 Ne migtale e si Muwisis te gapun wey migtakereg e te bubungan. Ne neep‑atan ne pulu (40) ne aldew wey marusilem sikandin diye te bubungan.