3
Ka peg-umew te Manama ki Muwisis
1 Due aldew ne migtanggu si Muwisis te me karniru te anuhang din ne si Hitru, ka talagpanubad diye te Midiyan. In-uyan din ka me karniru diye te limang te disirtu, wey nekeuma sikandin diye te Sinay, ka bubungan te Manama.
2 Ne migpakita ka panalihan te Magbebaye ne Manama kandin ne migbaluy ne hapuy diye te egkalegleg ne sapinit. Ne nakita ni Muwisis ne nalegleg ka sapinit piru ware seeye natutung.
3 Te sikan de, nakakahi si Muwisis, “Kein-inuwan amana sika! Mania te ware natutung sika se sapinit? Egdandaniyan ku la wey egmelmelehan ku.”
4 Te pegkakita te Magbebaye ne Manama ne egparani e si Muwisis eyew egtengteng dutu, in-umew rin e sikandin puun te elat-elat te sapinit te miggenendue, “Muwisis, Muwisis!”
Ne migtabak si Muwisis, “Nekey‑a?”
5 Migkahi ka Manama, “Kene ka dani-rani. Luunga nu ka sandal nu su matulus ka inged ne migsasindehan nu.
6 Sikeddiey ka Manama te amey nu, ka Manama ni Abraham, ka Manama ni Isaak, wey ka Manama ni Hakub.” Seeye de iya, imbukusan e ni Muwisis ka ulaula rin su naaldek sikandin ne egpitew te Manama.
7 Ne migkahi ka Magbebaye ne Manama, “Naay-ayaran ku nakita ka kalasayan te keet-etawan ku diye te Ihiptu, wey narineg ku ka pegpangananey ran tenged te pegleig-leig kandan te migpangulu kandan te pegtrabahu. Neyid‑u a kandan te mig-antus,
8 wey miggendini a eyew egluwasen ku sikandan puun te me matig-Ihiptu, wey eg-uyanen ku sikandan diye te inged ne maluag wey meupiya ka tane wey dakel se eg-uma. Mig-ugpaan seini kuntee te me Kanaanen, me Hitihanen, me Amurihanen, me Pirisihanen, me Hibihanen, wey te me Hibusihanen.
9 Ne kuntee, narineg ku iya ka pegpangananey te me kabuhalan ni Israil wey nakita ku ke immenu sikandan te egbayad-bayad te me matig-Ihiptu.
10 Ne sikeykew naa, igpeendiye ku sikeykew te Paraun ne Hari te Ihiptu eyew eg-angayen nu diye ka keet-etawan ku ne me kabuhalan ni Israil.”
11 Piru migkahi si Muwisis, “Hentew e kun naa ubag seini se eggendiye te Paraun, wey eg-angey te me kabuhalan ni Israil ligkat te Ihiptu?”
12 Ne migkahi ka Manama, “Egdumaan ku re sikeykew, wey seini ka palinneu ne insuhu ku iya sikeykew. Emun ke egkaangey nud e sikandan ligkat te Ihiptu, egsimbeen a nikaniyu kayi te seini ne bubungan.”
13 Ne mig-inse si Muwisis, “Na, emun ke eggendiyaan ku ka me kabuhalan ni Israil wey egkahiyan ku sikandan te insuhu a te Manama te me kabuybuyahan dan, nekey naa ka igtabak ku kandan ke eg-insaan a ke nekey ka ngaran nu?”
14 Ne migtabak ka Manama, “Sikeddiey iya Sikeddi. Seini inangen nu te me kabuhalan ni Israil: Sikandin se egngaranan te ‘Sikeddi,’ iyan migpeendini keddi te kaniyu.”
15 Migkahiyan pad man‑e te Manama si Muwisis, “Ihuhud nu seini te me kabuhalan ni Israil: ‘Ka Magbebaye ne Manama te me kabuybuyahan niyu ne si Abraham, si Isaak, wey si Hakub, ka migpeendini keddi te kaniyu.’ Magbebaye ne Manama ka ngaran ku te ware egkatamanan wey sika ka igngaran keddiey te langun ne kabuhalan keureme.
16 Hipanew kad wey libulunga nu ka me igbuyag te me kabuhalan ni Israil, wey nangeni nu sikandan, ‘Ka Magbebaye ne Manama te me kabuybuyahan niyu ne si Abraham, si Isaak, wey si Hakub, migpakita keddi wey migkahi, “Migtantanuran ku sikaniyu wey nakita ku ka neula-ula niyu kayi te Ihiptu.
17 Ne migsaad ad ne egpangabangan ku sikaniyu se egkalasey kayi te Ihiptu, wey eg-uyanen ku sikaniyu diye te inged ne meupiya ka tane wey dakel se eg-uma ne nangugpaan te me Kanaanen, me Hitihanen, me Amurihanen, me Pirisihanen, me Hibihanen, wey te me Hibusihanen.” ’
18 “Egkabennalan sikandan te iglalag nu wey egmarumeey kew e peendiye te Paraun. Ne nangeni nu ka Paraun, ‘Ka Magbebaye ne Manama te me Hibruwanen, migpakita kanami. Sikan naa ka peyipanawa key ubag nikeykew te tatelu ne aldew peendiye te disirtu eyew egpakapanubad key te Magbebaye ne Manama ney.’
19 Piru nakanengneng a ne kene kew egpeyipanawen te Paraun angin e ke egkapehes sikandin.
20 Purisu eglegparan ku ka me Ihiptuhanen te langun ne me kein-inuwan ne eggimuwen ku diye te kandan. Egkataman, egpeyipanawen kew e te Paraun.
21 “Ne egbulihan ku sikaniyu eyew eg-ay-ayaran kew te me Ihiptuhanen eyew due egkeuyan niyu te peggipanew niyud e.
22 Ka langun ne malitan ne Hibruwanen, egpabuyuen te me kumbale, me mahal ne me balieg, wey me bulawan diye te me sumbaley ran ne me Ihiptuhanen wey te me mahaliyug dan. Ne ipasaluub niyu naa seini te me anak niyu. Ne nekeiling de te impangahawan niyu ka me Ihiptuhanen te me kasangkapan dan.”