31
Si Bisalil wey si Uhuliab
(Iks. 35:30–36:1)
1 Ne migkahiyan te Magbebaye ne Manama si Muwisis,
2 “Pammineg ka. In-alam ku puun te me kabuhalan ni Huda si Bisalil ne anak ni Uri wey apu ni Hur.
3 Innipenu ku sikandin te Panisingan ku wey imbehayan ku sikandin te katuenan wey katagseb, wey egkateu sikandin te langun ne kapandayan.
4 Sikandin ka eggimu te me meupiya ne kapandayan ne bulawan, pelata, wey burunsi.
5 Sikandin man‑e ka egsapsap te igdayan-dayan ne me batu, wey eggeli te me kayu, wey eggimu te langun ne kapandayan.
6 Ne in-alam ku degma si Uhuliab ne anak ni Ahisamak ne egpuun te me kabuhalan ni Dan eyew egbulig ki Bisalil. Imbehayan ku degma te katuenan ka langun ne mangngateu eyew egkeyimu ran ka langun ne insuhu ku keykew.
7 Ipeyimu nu kandan ka balungbalung,
ka Tahuanan te Kasabutan wey ka supe,
ka langun ne kasangkapan te balungbalung,
8 ka lamisa wey ka me kasangkapan te lamisa,
ka bulawan ne tahuanan te sulu wey ka me kasangkapan te sulu,
ka altar te insinsu,
9 ka altar ne tutunganan te igpanubad wey ka langun ne kasangkapan te altar,
ka pelenggana ne lu‑luanan wey ka egpapinnuuwan te pelenggana,
10 ka mateles ne me kumbale te me talagpanubad, ka matulus ne me kumbale ni Aarun wey te me anak din ne me talagpanubad ne igsaluub dan ke egtrabahu e sikandan,
11 ka lana ne ig-itis,
wey ka meemut ne insinsu para te Matulus ne Sinabeng.
Keilangan ne eggimuwen dan seini langun sumale te insuhu ku keykew.”
Ka Aldew te Peggimeley
12 Ne migkahiyan te Magbebaye ne Manama si Muwisis,
13 “Nangeni nu ka me kabuhalan ni Israil te keilangan ne egtantanuran dan ka Aldew ku te Peggimeley su sika ka tuus te kasabutan ku kaniyu peendiye te me kabuhalan niyu keureme. Ke egtantanuran niyu sika, egkanengnengan niyu ne sikeddiey ka Magbebaye ne Manama ne iyan egmatulus kaniyu.
14 Tantanuri niyu ka Aldew te Peggimeley su matulus seini diye te kaniyu. Eggimatayan seeye se eg-apul, wey kenad e eg-ileen ne sakup pad te keet-etawan ku seeye se egtrabahu te Aldew te Peggimeley.
15 Due hen‑em niyu ne aldew eyew egtrabahu, piru ka igkapitu ne aldew iyan seini ka Aldew te Peggimeley, su matulus seini diye te Manama. Eggimatayan seeye se egtrabahu te sika ne aldew.
16 Keilangan ne egtantanuran te me kabuhalan ni Israil ka Aldew te Peggimeley wey kene eg-apulen minsan te me kabuhalan dan. Tulumanen dan seini te ware egtamanan.
17 Sika ka tuus te kasabutan ku kaniyu te ware egtamanan, su inggimu ku ka langit wey ka tane te hen‑em ne aldew, wey te igkapitu ne aldew, migpeeneng-eneng a wey miggimeley a.”
18 Te neimpusan e lalahi te Manama si Muwisis diye te Bubungan ne Sinay, imbehey rin e kandin ka daruwa ne malumpayag ne batu ne in-un-unayan din te egsulat te kasabutan.