37
Ka peggimu te Tahuanan te Kasabutan
(Iks. 25:10-22)
1 Nataman, miggimu si Bisalil te Tahuanan te Kasabutan ligkat te kayu ne akasya. Lalimma ne dangew ka kalayat, wey tatelu ne dangew ka kaluag, wey tatelu ne dangew ka katikang.
2 Imbulitan din te bulawan ka seled wey ka lihawangan te tahuanan, wey inlingut din dayan-dayani te bulawan.
3 Inggimuwan din seini te hep‑at ne derakel ne sising ne bulawan ne intalinga rin iatul diye te hep‑at ne paa te Tahuanan te Kasabutan, eyew egkaatul te sising ka tagse kakiliran te tahuanan.
4 Miggimu degma sikandin te me dullug ne akasya ne igyayung wey imbulitan din te bulawan.
5 Inluglug din seini diye te intalinga ne me sising te tagse kakiliran te tahuanan eyew egkayayungan te me etew.
6 Inggimuwan din man‑e seini te supe ne bulawan ne lalimma ne dangew ka kalayat wey tatelu ne dangew ka kaluag.
7 Migdekdek man‑e sikandin te bulawan wey inggimu rin ne daruwa ne kirubin wey impegdangdang te egtahu diye te ampew te supe.
8 Ka sabeka ne kirubin, diye ipagket te pulipusan te supe, wey ka dangeb, diye ipagket te limang ne pulipusan. In-uney re impagket te supe ka daruwa ne kirubin eyew egpekegsumpul re.
9 Impabekal ka me pakpak te daruwa ne kirubin ne impegtangke, wey naralungan te me pakpak dan ka supe. Ka ulaula te me kirubin, nekeunduk diye te supe.
Ka peggimu te lamisa
10 Miggimu sikandin te lamisa ne akasya, wey hep‑at ne dangew ka kalayat, wey daruwa ne dangew ka kaluag, wey tatelu ne dangew ka katikang.
11 Imbulitan din te bulawan ka lamisa wey inlingut din dayan-dayani te bulawan.
12 Intalingaan din ka tagse kakiliran te lamisa te tabla ne me senge-palad ka kaluag wey inlingut din seini te egdayan-dayan te bulawan.
13 Miggimu degma sikandin te hep‑at ne derakel ne sising ne bulawan ne intalinga rin te tagse pikungan te lamisa, diye te lenged te paa.
14 Diye degma italinga ka me sising te lenged te tabla ne intalinga ne iyan eglugluhan te igyayung te lamisa.
15 Ne iyan din inggimu ne igyayung ka me dullug ne akasya wey imbulitan din te bulawan.
16 Miggimu degma sikandin te bulawan ne me kasangkapan diye te lamisa: Me pinggan, me ubab, me yahung, wey me pitsil ne eg-itisan te igpanubad ne me inumen.
Ka peggimu te tahuanan te sulu
(Iks. 25:31-40)
17 Migdekdek degma si Bisalil te bulawan wey inggimu rin ne tahuanan te sulu. Inggimuwan din seini te pabunsuran wey lawa, wey in-uney rin ded itangen dutu ka me ubab, me ubbus, wey me bulak-bulak eyew egpekegsumpul re langun.
18 Hen‑em ne pakew ka intahu diye te lawa te sulu, tigtatelu te tagse kakiliran.
19 Due tatelu ne ubab ne imparuma te tagse pakew, wey egpekeiling seini te bulak te almindras ne migbukadkad wey migderewun.
20 Ka lawa te tahuanan te sulu, intahuan te hep‑at ne ubab ne egpekeiling te bulak te almindras ne migbukadkad wey migderewun.
21 Ka tatelu ne pakew, due tigsalimbeka ne ubbus ne impaleput diye te diralem wey in-uney red te egtangen. Ne iling ded degma ka tatelu ne pakew diye te limang te lawa, su hen‑em ma langun ka pakew te tahuanan te sulu.
22 In-uney re langun himuwa puun te indekdek ne bulawan ka me ubbus, ka me pakew, wey ka lawa te tahuanan te sulu eyew egpekegsumpul re.
23 Ne miggimu sikandin te pitu ne lamparilya eyew igtahu diye te tahuanan te sulu, wey me sipit, wey me tayaan, wey me bulawan ded degma.
24 Me tatelu ne pulu wey lalimma (35) ne kilu ne bulawan ka nahamit langun te peggimu te tahuanan te sulu wey te me kasangkapan te sulu.
Ka peggimu te altar ne egtutungan te insinsu
(Iks. 30:1-5)
25 Miggimu man‑e si Bisalil te altar ne akasya ne egtutungan te insinsu, wey daruwa ne dangew ka kalayat, wey daruwa ne dangew ka kaluag eyew egkakuwadradu ka altar, wey hep‑at ne dangew ka katikang. Inggimuwan degma seini te me sungey-sungey wey in-uney red itangen diye te altar eyew egpekegsumpul re.
26 Ne imbulitan din ka altar te bulawan wey inlingut din man‑e te egbulit ka kakiliran wey ka me sungey-sungey te altar. Inlingut din man‑e dayan-dayani te bulawan ka altar.
27 Miggimuwan din seini te daruwa ne derakel ne sising ne bulawan ne eglugluhan te me dullug ne igyayung, wey intalinga rin seini diye te diddiralem te indayan-dayan ne bulawan te altar.
28 Kayu ne akasya ka inggimu rin ne me dullug ne igyayung, wey imbulitan din te bulawan.
29 Ne miggimu sikandin te matulus ne lana ne igbaluhu wey insewuhan din te neelin ne insinsu, iling te peggimu te talaggimu te peemut.