39
Ka peggimu te igsaluub te me talagpanubad
(Iks. 28:1-14)
1 Ne miggimu si Bisalil wey si Uhuliab te amana ne tetelesi ne kumbale te me talagpanubad ne igsaluub dan te egseled diye te Matulus ne Sinabeng. Impegselet-selet dan ka me hinabel ne meilem, malalab, wey malugtem te peggimu ran te matulus ne me kumbale ni Aarun, su sika iya ka insuhu te Magbebaye ne Manama ki Muwisis.
2 Ne miggimu sikandan te kumbale ne ipud, wey impegselet dan ka imbula-bula ne bulawan, ka me hinabel ne meilem, malalab, wey malugtem, wey ka mahal ne hinabel.
3 Migdekdek sikandan te bulawan wey indereisek dan te egpisang eyew igpeelat dan te impegselet ne me hinabel ne meilem, malalab, wey malugtem, wey te mahal ne hinabel.
4 Miggimuwan dan ka ipud te daruwa ne baba eyew egpekegpegket ka tangkaan wey ka peka.
5 Iyan dan inggimu ne baba te ipud ka impegselet ne hinabel ne impegketan te imbula-bula ne bulawan, wey me hinabel ne meilem, malalab, wey malugtem, wey mahal ne hinabel. Nataman, impegket dan e seeye diye te ipud. Ne sika iya ka insuhu te Magbebaye ne Manama ki Muwisis.
6 Migkuwa sikandan te me batu ne kurnalina wey impakepkep dan te tahuanan ne bulawan. Ingkulitan dan seini te me ngaran te anak ni Hakub iling te eggimuwen te talaggimu te sising ne igkulit ka ngaran diye te batu.
7 Impegket dan seini diye te baba te ipud eyew eggimuwen ne limlimuan ne me batu te me kabuhalan ni Israil, wey sika iya ka insuhu te Magbebaye ne Manama ki Muwisis.
Ka peggimu te hagpi te kumeng
(Iks. 28:15-30)
8 Ne miggimu sikandan te hagpi te kumeng wey impaay-ayaran dan te eggimu iling te ipud. Impegselet dan ka imbula-bula ne bulawan, me hinabel ne meilem, malalab, wey malugtem, wey ka mahal ne hinabel.
9 Ingkuwadradu ran ka hagpi te kumeng wey impeg-akeb man‑e. Senge-rangew ka kalayat wey senge-rangew degma ka kaluag.
10 Intahuan dan seini te hep‑at ne linya te mahal ne me batu: Ka an-anayan ne linya iyan ka me batu ne egngaranan te sardiyus, tupasyu, wey karbungku.
11 Ka igkarangeb ne linya iyan ka me batu ne ismiralda, sapiru, wey diyamanti.
12 Ka igkatatelu ne linya iyan ka me batu ne hasintu, agata, wey amatista.
13 Ka igkeep‑at ne linya iyan ka me batu ne birilu, kurnalina, wey haspi. Ne imbalakes dan ka me batu pakepkepi te bulawan ne iyan egtahuan.
14 Sapulu wey daruwa (12) langun ka me batu, wey ingkulitan dan seini te ngaran te sapulu wey daruwa (12) ne anak ni Hakub. Ka tagse batu ingkulitan te sabeka ne ngaran, iling te eggimuwen te talaggimu te sising ne igkulit ka ngaran diye te batu.
15 Miggimu sikandan te inlubid ne me keddina puun te neelin ne bulawan eyew igsen-ung te hagpi te kumeng.
16 Miggimu sikandan te daruwa ne tahuanan ne bulawan wey daruwa ne sising ne bulawan wey intalinga ran seini diye te sidsid te hagpi te kumeng.
17 Intiyuk dan ka daruwa ne keddina ne inlubid ne bulawan diye te daruwa ne sising ne bulawan ne diye te sidsid te hagpi te kumeng.
18 Ne inggiket dan degma ka daruwa ne pulipusan te me keddina ne bulawan diye te daruwa ne tahuanan te me batu ne bulawan ne impegket diye te baba te ipud.
19 Miggimu e man‑e sikandan te daruwa ne sising ne bulawan wey impakepkep dan diye te diralem ne sidsid te hagpi te kumeng ne egpakarapit te ipud.
20 Miggimu degma sikandan te daruwa ne sising ne bulawan, wey intalinga ran diye te tangkaan ne baba te ipud, diye dapit te pulipusan te baba ne marani te tupuan te libed ne impaay-ayaran te eggimu.
21 Ne inggakut dan ka hagpi te kumeng diye te ipud wey inggiketan dan te meilem ne lubid ka me sising te hagpi wey te ipud eyew kene egpekegsuwey. Sikan naa ka nakaampew e ka hagpi te kumeng diye te libed wey kenad egkaweil. Ne sika iya ka insuhu te Magbebaye ne Manama ki Muwisis.
Ka peggimu te duma pad ne me kumbale
(Iks. 28:31-43)
22 Ne miggimu si Bisalil te malayat ne kumbale ne eg-akeban te ipud, wey in-elin ne meilem ne hinabel.
23 In-ay-ayaran din te eggimu ka lieg te kumbale wey inlingut te egteyi ka ulang eyew kene egkahisi.
24 Inlingut din man‑e ka kumbale te me palungpung ne egpekeiling te behas te prutas ne granada. Iyan din inggimu ne palungpung ka me hinabel ne meilem, malalab, wey malugtem, wey ka mahal ne hinabel.
25 Ne immegselet din te egtahu ka me saliyew ne bulawan wey ka me palungpung palingut te sidsid te kumbale.
26 Sikan naa ka nakalingut de iya ka me saliyew ne bulawan wey ka me palungpung ne egpekeiling te granada diye te sidsid te kumbale ne nekegselet. Seini ne kumbale ka igsaluub te egtrabahu diye te Manama, wey sika iya ka insuhu te Magbebaye ne Manama ki Muwisis.
27 Ne migtuhul sikandan te mahal ne me hinabel wey inggimu ran ne me kumbale ne mallayat se belad eyew igpakumbale ki Aarun wey te me anak din.
28 Ne migpangimu sikandan te salakey, me kalu, wey me kumbale ne igpariralem, wey iyan dan inggamit ka mahal ne hinabel.
29 Miggimu man‑e sikandan te me libed ne impegselet ka me hinabel ne meilem, malalab, wey malugtem, wey mahal ne hinabel, wey inteyi-teyian dan seini. Ne sika iya ka insuhu te Magbebaye ne Manama ki Muwisis.
30 Ne miggimu sikandan te matulus ne balieg ne malibusen wey neelin ne bulawan. Ingkulitan dan seini te egpekeiling te silyu ne “Inhalad seini diye te Magbebaye ne Manama.”
31 Imbanggut dan seini diye te tangkaan te salakey wey iyan dan inggiket ka meilem ne lubid, su sika iya ka insuhu te Manama ki Muwisis.
Ka pegkapenga te peggimu te balungbalung
(Iks. 35:10-19)
32 Nataman, neimpusan e te eggimu ka matulus ne balungbalung ne in-alad, wey in-ikul iya te me kabuhalan ni Israil ka langun ne insuhu te Magbebaye ne Manama ki Muwisis.
33 In-uyan dan diye ki Muwisis ka balungbalung wey ka langun ne kasangkapan te balungbalung: Ka me sanggatanan, ka me tukeg, ka me dullug, ka me sungkaleg, ka me pabunsuran,
34 ka laplap te lukesan ne karniru ne imbatek te malalab, ka laplap te kambing, ka hinabel ne ig-elet te me sinabeng,
35 ka Tahuanan te Kasabutan wey ka me dullug ne igyayung, ka supe te tahuanan,
36 ka lamisa wey ka me kasangkapan te lamisa, ka paan ne impanubad diye te Manama,
37 ka tahuanan te sulu ne bulawan, ka me lamparilya wey ka me kasangkapan te sulu, ka lana ne igtubil te me sulu,
38 ka bulawan ne altar, ka lana ne ig-itis te ulu, ka meemut ne insinsu, ka hinabel ne igdingding te gumawan te balungbalung,
39 ka burunsi ne altar wey mahalat ne egtuuhan te igpanubad, ka me dullug ne igyayung wey ka me kasangkapan te altar, ka pelenggana wey ka egpapinnuuwan te pelenggana,
40 ka me hinabel ne ig-alabat te alad te lama, ka me sungkaleg ne ig-alad, wey ka me pabunsuran te me sungkaleg, ka hinabel ne igdingding te gumawan te alad, ka me hiket te balungbalung wey ka igpakpak te tane ne eggiketan, wey ka langun ne egkeilanganen diye te balungbalung,
41 ka mateles ne me kumbale te talagpanubad ne egtrabahu diye te Matulus ne Sinabeng, ka matulus ne me kumbale ni Aarun ne talagpanubad, wey ka me kumbale te me anak din ne igsaluub dan ke egkeyimu e ne me talagpanubad.
42 In-ikul iya te me kabuhalan ni Israil te eggimu ka langun ne insuhu te Mabebaye ne Manama ki Muwisis.
43 Ne intengtengan ni Muwisis ka langun ne inggimu ran wey nakita rin ne neyimu ran iya ka langun wey in-ikul dan ka insuhu kandin te Magbebaye ne Manama. Ne impanalanginan din sikandan.