5
Ka pegpakiglalag enni Muwisis te Paraun ne Hari te Ihiptu
1 Nataman, miggendiyad si Muwisis wey si Aarun te Paraun ne Hari te Ihiptu wey migkahi, “Seini ka ingkahi te Magbebaye, ka Manama te me kabuhalan ni Israil: ‘Peyipanawa nu ka keet-etawan ku peendiye te disirtu eyew egpakasahakeen sikandan keddiey.’ ”
2 Piru migkahi ka Paraun, “Hentew bes ka Magbebaye? Mani kun ubag te egpalintutuu a kandin ne egpeyipanawen ka me kabuhalan ni Israil? Wara a nekeila kandin, wey kene ku iya egpeyipanawen ka me etew.”
3 Migkahi si Muwisis wey si Aarun, “Ka Manama te me Hibruwanen, migpakigkita kanami. Peyipanawa key ubag nikeykew te tatelu ne aldew peendiye te disirtu eyew egpakapanubad key te Magbebaye ne Manama ney. Emun ke kene, egguleen key nikandin eggimatayi te gutas wey ke egpamunuen key naa nikandin.”
4 Piru migtabak ka Paraun, “Mania te egtalehenen niyu ka me etew te himu ran? Liberi niyud ka eggimuwen niyu diye.
5 Kema pitawa niyu kamenu kasulug ka me etew ne egtalehenen niyu te himu ran!”
6 Te seeye ded ne aldew, insuhu te Paraun ka me pangulu te me etew te egtrabahu wey ka kepatas dan te migkahi,
7 “Kene niyud e behayi ka me etew te lahami ne eggamiten dan te eggimu te tisa. Peun-unaya niyud sikandan pepammitawa.
8 Piru keilangan ne iling ded kasulug te hun‑a ka eggimuwen dan ne tisa, wey keilangan ne kene egdeisek. Me pehulen sikandan, sikan naa ka egpeyid-hid‑u ne egpeyipanawen ku eyew egpakapanubad te Manama ran.
9 Patamtamani niyu patrabahuwa ka me lukes eyew egkatabikes sikandan te me himu ran wey kenad egpakapammineg te ubat ne me guhuren.”
10 Purisu miggendiyaan dan ka me etew wey migkahiyan, “Migkahi ka Paraun te kene kew e egpabehayan te lahami.
11 Uney-uney kew e pamitew te lahami minsan hendei, piru iling ded kasulug te hun‑a ka eggimuwen niyu ne tisa.”
12 Sikan naa, neempet te me etew ka inged te Ihiptu te egpanguwa te lahami.
13 Ne indalusung sikandan te me pangulu te egtrabahu ne migkahi, “Keilangan ne egkatimpad niyu ka kasulug te tisa ne eggimuwen niyu tagse aldew iling te miglihad ne imbehayan kew pad te lahami.”
14 Ne impanlampesan te me pangulu te egtrabahu ka in-alam dan ne me kepatas te me kabuhalan ni Israil, wey mig-insaan dan sikandan, “Mania te ware niyu natimpad taman kuntee ka kasulug te tisa ne eggimuwen niyu iling te egkeyimu niyu te miglihad ne me aldew?”
15 Ne miggendiyad te Paraun ka me kepatas wey migsagsahukul sikandan ne migkahi, “Mania te eg-ilingen key nikeykew kayi se me suluhuanen nu?
16 Warad lahami ne imbehey kanami piru iling ded ka kasulug te tisa ne impeyimu kanami, wey impanlampesan key pad iya man‑e! Seyyup ma perem seini te me etew nu.”
17 Piru migkahi ka Paraun, “Subla kew iya ne me pehulen, sikan naa ka egkahi kew, ‘Peyipanawa key su egpanubad key te Magbebaye ne Manama.’
18 Na, liberi niyud ka eggimuwen niyu! Warad lahami ne igbehey kaniyu, piru iling ded ka kasulug te tisa ne eggimuwen niyu.”
19 Nakita te me kepatas te me kabuhalan ni Israil ne egkahunaan iya sikandan su eggaheen sikandan te egpeyimu te tisa ne egpeg-ilingen pe ma ka kasulug tagse aldew.
20 Ne mig-awe e sikandan diye te Paraun wey nakita ran si Muwisis wey si Aarun ne migtetahad kandan.
21 Ne dutu, migkahiyan dan ensi Muwisis, “Kene perem egbalaharen te Magbebaye ne Manama ka inggimu niyu kanami wey eglegparan kew nikandin! Su sikaniyu ka egpuunan ne nalangetan kanami ka Paraun wey ka me suluhuanen din. Sikaniyu ka egpuunan ne eggimatayan key nikandan.”
Ka pegsagsahukul ni Muwisis diye te Manama
22 Ne migpangananey e man‑e si Muwisis diye te Magbebaye ne Manama wey migkahi, “Magbebaye, mania te imbaybayaran nu te iling kayi ka me etew? Mania te impeendini e pad iya nikeykew?
23 Imbayaan ku ka Paraun wey innangenan ku te igpepangguhud nu keddi, piru nasi din de iya baybayari ka seini ne keet-etawan, wey ware nu sikandan pangabangi.”