15
Ka pegsaad te Manama ki Abram
1 Te ware naluhey, impanengneng si Abram te Magbebaye ne Manama wey migkahiyan,
“Kene ka kaaldek Abram.
Sikeddi ka kalasag nu
wey dakel ka ig-unag ku keykew.”
2 Piru mig-inse si Abram, “Magbebaye ne Manama, egmenuwen ku naa ka ig-unag nu keddi te ware mem pad anak ku? Si Iliisir e ne matig-Damasku ka egpakakamuney te karatuan ku ke egpatey ad.
3 Na, tenged te ware e ma nikeykew behayi te anak, seini se uripen ku ne miglesut kayi te baley ku ka egpakakamuney te karatuan ku.”
4 Ne migkahiyan e man‑e sikandin te Magbebaye ne Manama, “Kene ne iyan egpakakamuney te karatuan nu ka uripen nu, ke kene, ka anak nu iya.”
5 Ne in-uyan e sikandin te Magbebaye ne Manama diye te lihawangan wey migkahiyan, “Leng‑ag ka diye te langit wey seela nu ka me bituen ke egpakaseel ke naa. Iling naa degma due kasulug ka me kabuhalan nu.”
6 Migpalintutuu si Abram te Magbebaye ne Manama. Ne puun due, in-isip din ne matareng si Abram.
7 Ne migkahiyan sikandin te Magbebaye ne Manama, “Sikeddi ka Magbebaye ne mig-uyan keykew ligkat te inged ne Ur ne sakup te me Kaldiya, eyew igbehey ku keykew ka seini ne tane.”
8 Piru mig-inse si Abram, “Magbebaye ne Manama, egmenuwen ku naa te egnengneng ne keddiey en iya seini keureme?”
9 Ne migtabak ka Magbebaye ne Manama, “Uyani a te baka ne ware pad anak, wey kambing, wey lukesan ne karniru ne neelin tigtatelu ne leg‑un se idad, wey uyani a man‑e te tukmu wey selepati.”
10 Ne impanguyan seeye langun ni Abram diye te Manama, wey inggimatayan din ka tagse sabeka ne ayam wey impanuley rin seeye angin e te tukmu wey selepati. Ne immeg-andang din ka tagse suley.
11 Ne due me manuk-manuk ne miglene diye te impanuley rin ne me ayam eyew egkeen perem dutu, piru in-alew seeye ni Abram.
12 Te hapit e eglineb ka aldew, nakalipereng wey naalineknek si Abram, ne due makaaldek-haldek ne migginguma kandin.
13 Ne migkahiyan sikandin te Magbebaye ne Manama, “Eggalin ka me kabuhalan nu diye te inged ne kene ne kandan. Diye egkeuripen sikandan wey egde-deehen seled te hep‑at ne gatus (400) ne leg‑un.
14 Piru eglegparan ku ka nasud ne mig-uripen te me kabuhalan nu. Nataman, egpakaawe sikandan te seeye ne inged wey egpekeuyan sikandan te dakel ne karatuan.
15 Ne meyitenged mule keykew, egkabuyag ke pad, wey egpatey ka keureme ne meupiya ka peglebeng keykew.
16 Ne ka me kabuhalan nu, wey e sikandan egpakalibed kayi ke egkatuman ka hep‑at ne gatus (400) ne leg‑un. Kene ku pad egdeldelen tenged te sale dan ka me Amurihanen ne mig-ugpe kayi, su kene pad eleg ne timpu ne eglegparan sikandan.”
17 Te miglineb e ka aldew wey te migmarusilem e, sahuhune ne due miglepew ne kuren ne mig-eebel wey sulu ne nalegleg. Ne diye seeye migbaye te elat te impanuley rin ne me ayam.
18 Te seeye ne timpu, migsaad ka Magbebaye ne Manama ki Abram ne migkahi, “Igbehey ku te me kabuhalan nu seini se tane ligkat te weyig ne diye te Ihiptu taman te dakel ne Weyig ne Iyupratis.
19 Seini ka inged ne mig-ugpaan te me Kinihanen, me Kinisihanen, me Kadmunihanen,
20 me Hitihanen, me Pirisihanen, me Ripaimhanen,
21 me Amurihanen, me Kanaanen, me Girgasihanen, wey me Hibusihanen.”