25
Ka duma ne me kabuhalan ni Abraham
(1 Kru. 1:32-33)
1 Ne mig-asawe e man‑e si Abraham te senge-malitanan ne migngaranan ki Kitura.
2 Nakaanak sikandin ki Simran, si Huksan, si Midan, si Midiyan, si Isbak, wey si Sua.
3 Si Huksan ka amey ni Siyiba wey ni Didan, wey si Didan ka migligkatan te me tribu ne egngaranan te Asurimanen, Litusimanen, wey Liyumimanen.
4 Due degma me anak ni Midiyan ne egngaranan ki Ipa, si Ipir, si Hanuk, si Abida, wey si Ildaa. Sikandan langun ka me kabuhalan ni Kitura ne asawa ni Abraham.
5 Ne imbehey ni Abraham ki Isaak ka langun ne karatuan din
6 te ware pad sikandin migpatey. Piru impamehayan din degma te dasag ka me anak te me duwey rin, wey impeendiye din e sikandan te igsile eyew egpakariyu-diyu te anak din ne si Isaak.
Ka pegpatey wey ka pegsabal ki Abraham
7 Migginguma te 175 ne leg‑un ka idad ni Abraham, wey te seeyad e ka kabuyahi rin
8 migpatey e sikandin ne meupiya se peg-ugpe, wey miglemung e ka gimukud din te gimukud te me apu din ne migpatey e.
9 Insabal e sikandin enni Isaak wey ni Ismail diye te sulung te Makpila ne diye te igsile ligkat te Mamri. Seeye ka sulung ne diye te kamet ni Iprun ne anak ni Suhar ne Hitihanen
10 ne imbeli ni Abraham diye te me Hitihanen. Ne diye degma isabal si Sara dengan.
11 Te namatey e si Abraham, impanalanginan te Manama si Isaak ne anak din ne diye mig-ugpe te marani te belun ne Biirlahayruy.
Ka me kabuhalan ni Ismail
(1 Kru. 1:28-31)
12 Ne seini ka me kabuhalan ni Ismail, ka anak ni Abraham ki Hagar ne matig-Ihiptu ne uripen ni Sara.
13 Seini ka ngaran te me lukes ne anak ni Ismail ligkat te panganey peendiye te igkalitan—si Nibayut, si Kidar, si Adbiil, si Mibsam,
14 si Misma, si Duma, si Masa,
15 si Hadad, si Tima, si Hitur, si Napis, wey si Kidima.
16 Sikandan langun ka me lukes ne anak ni Ismail. Neyimu sikandan ne me pangulu te sapulu wey daruwa (12) ne tribu ne nangugpe diye te nalein-lein ne me inged dan. Te ware naluhey, migngaranan ka me tribu ran sumale te ngaran te me pangulu ran.
17 (Ne migpatey si Ismail te 137 ka idad din, wey miglemung e degma ka gimukud din te gimukud te me kaap-apuan din ne migpatey e.)
18 Nangugpe ka me kabuhalan din ligkat te inged te Habila peendiye te Sur, ne diye te igsile te Ihiptu ne egpeendiye te Asirya. Ne ingkuntere dan ka langun ne karumaan dan ne kabuhalan ni Isaak.
Ka pegkeetew ni Isaw wey ni Hakub
19 Seini ka pangguhuren meyitenged te me anak ni Isaak, ne anak ni Abraham.
20 Hep‑at ne pulu (40) ka idad ni Isaak te nakaasawa sikandin ki Ribika, ne anak ni Bituil wey atebey ni Laban. Matig-Aramiya ensi Bituil wey Laban wey diye sikandan mig-ugpe te Padan-aram.
21 Tenged te kene egpakaanak si Ribika, mig-ampu si Isaak te Magbebaye ne Manama eyew egpakaanak sikandin. Ne intabak te Manama ka peg-ampu din, sikan naa ka naberes e si Ribika.
22 Migseseppingan sikandin piru te ware pad miglesut ka me bate, migpakeyisey ran e diye te getek din. Migkahi si Ribika, “Mania te egkeyitabu seini keddi?” Sikan naa ka mig-insaan din ka Magbebaye ne Manama meyitenged dutu.
23 Ne migkahiyan sikandin te Magbebaye ne Manama,
“Daruwa ne nasud
ka due te getek nu.
Eg-anak ka te daruwa
ne egpekegkuntere.
Egkeyimu ne manekal ka sabeka
te duma rin,
wey egkeyimu ne suluhuanen ka kakey
te hari rin.”
24 Te miggingume e ka aldew ne eglesutan e si Ribika, migsesepingan iya sikandin.
25 Ka an-anayan ne miglesut malalab wey bulbulen, sikan naa ka ingngaranan sikandin ki Isaw.
26 Te ware pad miglesut ka sepping, miggen-genan din ka palu ni Isaw, sikan naa ka migngaranan sikandin ki Hakub. Ne hen‑em ne pulu (60) ka idad ni Isaak te miglesut sikandan.
Ka pegbelegye ni Isaw te katenged din isip panganey
27 Te migtulin e ka me bate, neyimu ne meinges ne mannitingen si Isaw. Egkeupian sikandin ne egleug-leug diye te me kamet, piru si Hakub, maleman mule wey diye de eg-uugpe te baley.
28 Pinalangge ni Isaak si Isaw su egkeupian sikandin ne egkeen te keingesan din, piru pinalangge degma ni Ribika si Hakub.
29 Sabeka ne aldew, mig-uli si Isaw ka migpanitingen ne eggutasan e amana, wey nakasalengan sikandin te migsusuba si Hakub te malalab ne bengag ne insabawan.
30 Migkahiyan din si Hakub, “Pakeena a nikeykew te sika se malalab ne insabawan nu su eggutasan ad amana.” (Purisu in-imuan si Isaw ki Idum.)
31 Piru migtabak si Hakub, “Wey ku re egpakeena sikeykew ke igbehey nu keddi ka katenged nu isip panganey.”
32 Ne migkahi si Isaw, “Uya, igbehey ku! Nekey ka karuan te katenged ku isip panganey ke egkapatey a te gutas kuntee?”
33 Migtabak si Hakub, “Pahunlibet ke pa ne igbehey nu keddi ka katenged nu.”
Sikan naa ka nakapahunlibet si Isaw ne igbehey rin e diye ki Hakub ka katenged din isip panganey.
34 Ne imbehayan e sikandin ni Hakub te paan wey te insabawan din ne bengag. Te nakakeen wey nekeinum e si Isaw, miggipanew e sikandin. Iling due ka pegbalahad ni Isaw te katenged din isip panganey.