29
Ka pegginguma ni Hakub diye te baley ni Laban
1 Ne migpabulus si Hakub ka miggipanew taman te nekeuma rin e diye te inged te matig-igsile.
2 Te diyad e sikandin, due nakita rin ne tatelu ne punduk te karniru ne migbuluku diye te lenged te belun ne egsaksakuhan te igpeinum te me ayam. Ne ka belun, intel-eban te dakel ne batu.
3 Due batasan dan ne emun ke egkalibulung e ka langun ne karniru, human pad egbekara te me talagtameng te karniru ka batu ne intel-eb te belun. Ke egpekeimpus e sikandan ka egpeinum te me karniru, iglibed dan ded man‑e igtel-eb ka batu diye te belun.
4 Mig-insaan ni Hakub ka me talagtameng, “Me suled, hendei kew ne mahinged?” Migtabak sikandan, “Matig-Haran key.”
5 Mig-insaan din e man‑e sikandan, “Nekeila kew naa te etew ne egngaranan ki Laban ne apu ni Nahur?”
Migtabak sikandan, “Uya.”
6 Mig-insaan din e man‑e sikandan, “Menua sikandin?” Ne migtabak sikandan, “Meupiya ma. Pitew ka, sikan bes en iya ka anak din ne si Rakil ka eg-uyan te karniru te amey rin.”
7 Migkahi si Hakub, “Kene pad ne eleg ne timpu ne eglibulungen ka me karniru su maaldew pad, meupiya pad ke egpeinumen niyud kuntee wey egpepanabtaben pad man‑e.”
8 Piru migtabak sikandan, “Kene ney pad egpeinumen ka me karniru ke kene pad egkalibulung langun. Ke egkalibulung e langun, henduen pad ne egbekaren ney ka batu ne intel-eb te belun eyew egpeinumen ka me karniru.”
9 Te sasangan pad ne egpalalahey sikandan, nekeume e si Rakil ka mig-uyan te me karniru te amey rin, su sikandin ma ka talagtameng te karniru.
10 Te pegkakita ni Hakub te atebey rin ne si Rakil ne anak te anggam din ne si Laban, wey te me karniru rin, miggendiyad sikandin te belun wey imbekad din e ka batu ne intel-eb dutu wey impeinum din e ka me karniru te anggam din.
11 Nataman, miggarekan din si Rakil wey nakasinehew sikandin ka neyinghingesa.
12 Ne migkahiyan din si Rakil, “Maama a nikeykew su anak a ni Ribika ne atebey te amey nu.”
Sikan naa ka mig-uli e si Rakil ne migpallahuy wey migpangguhuran din e ka amey rin.
13 Te pegkarineg ni Laban meyitenged te peglepew ni Hakub, migpallahuy e degma sikandin ka egsinug-ung te anaken din. Migkepkepan din si Hakub wey miggarekan, wey induma rin e diye te baley. Te nekeuma ran e diye, migpanugtulan e ni Hakub si Laban te langun ne neula-ula rin.
14 Nataman, migkahi si Laban, “Ew, amana ki bes pad iya!”
Ka peg-asawa ni Hakub engki Liya wey ki Rakil
Te senge-bulan e si Hakub ka mig-ugpe diye,
15 migkahiyan sikandin ni Laban, “Minsan anaken ku sikeykew, kene egkaayun ne ware igbayad ku te peggimu nu kayi. Na, kahii a ke nekey ka igkeupii nu ne igbayad ku keykew?”
16 Ne due daruwa ne anak ni Laban ne mengebay; si Liya ka kakey wey si Rakil ka hari.
17 Mateles ka mata ni Liya, piru si Rakil, pangngawakan wey subla pad ne mateles.
18 Tenged te due geyinawa ni Hakub ki Rakil, migtabak sikandin, “Eggimu a kayi te keykew seled te pitu ne leg‑un ke igpaasawa nu keddi si Rakil.”
19 Ne mig-uyun si Laban ka migkahi, “Meupiya pad ke sikeykew ka igpaasawa ku kandin du te duma ne lukes. Purisu, uugpe kad iya kayi te keddiey.”
20 Sikan naa ka migpanganuhang e si Hakub seled te pitu ne leg‑un eyew egkaasawa rin si Rakil. Piru tenged te dakel ka geyinawa rin ki Rakil, iling te pila re ne aldew ka kaluhayan diye te isip ni Hakub.
21 Nataman, migkahiyan ni Hakub si Laban, “Ibehey nud keddi ka anak nu eyew egpekeg-asawa key e, su natuman e ka pitu ne leg‑un.”
22 Sikan naa ka migsahakeen si Laban wey ingginggat din ka langun ne mig-ugpe te seeye ne inged.
23 Piru te seeye ne marusilem, si Liya ka in-uyan ni Laban eyew egpewuliran ki Hakub, wey kene ne si Rakil.
24 (Ne imbehayan ni Laban si Liya te uripen din ne malitan ne si Silpa ne igpeuripen kandin.)
25 Te pegkamaselem e, iyan igkateu-teu ni Hakub te si Liya bes ka newuliran din. Ne migkahiyan din si Laban, “Mania te neyimu nu seini keddiey? Si Rakil ka impanganuhangan ku keykew. Mania te inlimbungan a nikeykew?”
26 Ne migtabak si Laban, “Ware batasan ney kayi ne eggun‑aan egpaasawei ka hari du te kakey.
27 Tahad ke pa ne egkeimpusan ka senge-simana ne sahakeen te seini ne kasal su igpaasawa ku red iya keykew si Rakil. Piru wey re ke eg-uyun ka ne egpanganuhang ke pad man‑e seled te pitu red ne leg‑un.”
28 Ne mig-uyun si Hakub ne egpanganuhang pad man‑e seled te pitu ne leg‑un. Te neimpusan e ka senge-simana ne pegsahakeen te kasal ran ki Liya, impaasawe e man‑e ni Laban ki Hakub si Rakil.
29 (Imbehayan ni Laban si Rakil te malitan ne uripen din ne si Bilha eyew igpeuripen kandin.)
30 Sikan naa ka migpewulirey e degma si Hakub ki Rakil, wey subla pad ka geyinawa rin ki Rakil du te geyinawa rin ki Liya. Migpabulus sikandin ka migpanganuhang ki Laban seled te pitu pad man‑e ne leg‑un.
Ka me anak ni Hakub
31 Nakita te Magbebaye ne Manama ne ware geyinawei ni Hakub si Liya, sikan naa ka impaanak din si Liya. Piru ware din paanaka si Rakil.
32 Ne naberes si Liya wey nakaanak te lukes. Migngaranan din ka bate ki Rubin su migkahi sikandin, “Nakakita ka Magbebaye ne Manama te keyirapan ku, wey kuntee, eggeyinawaan ad te asawa ku.”
33 Nataman, naberes e man‑e si Liya wey nakaanak ded man‑e te lukes. Migngaranan din ka bate ki Simyun su migkahi sikandin, “Tenged su narineg te Magbebaye ne Manama ne ware e pad geyinawei te asawa ku, imbehayan e red nikandin te igkarangeb ne anak ne lukes.”
34 Nataman, naberes e man‑e si Liya wey lukes ded man‑e ka anak din. Migngaranan din ka bate ki Libi su migkahi sikandin, “Kuntee, egkasabeka key e ka alunggun, su nakaanak key e te tatelu ne lukes.”
35 Nataman, naberes e man‑e si Liya wey lukes ded man‑e ka anak din. Migngaranan din ka bate ki Huda su migkahi sikandin, “Kuntee, egsayeen ku ka Magbebaye ne Manama.” Nataman, ware pad man‑e mig-anak sikandin.