3
Ka pegsupak te etew te Manama
1 Na, due uled ne iyan ka amana ne utekan te langun ne mananap ne inggimu te Magbebaye ne Manama. Mig-insaan te uled ka malitan, “Ingkenaan kew bes te Manama ne egkeen te langun ne behas te me kayu kayi te pinamulaan?”
2 Ne migtabak ka malitan, “Egkaayun key ne egkeen te behas te minsan nekey ne kayu kayi te pinamulaan
3 gawas te behas te kayu ne kayi te taliware. Impanpanayan key te Manama ne kene egpakeenen wey minsan egsamsam naan de te behas te sika ne kayu eyew kene key egkapatey.”
4 Piru migkahi ka uled, “Kene ne malehet ne egkapatey kew.
5 Nakahi sika te Manama su nakataha sikandin ne emun ke egkeen kew due, egkapuwasan ka isip niyu wey egpekeiling kew kandin ne egpakataha ke nekey ka meupiya wey ke nekey ka mareet.”
6 Te pegkakita te malitan ne mateles ka kayu wey mananam buwa ne egkeenen ka behas, neeyaman sikandin ne egpupu eyew egpakakuwa te katuenan. Purisu, migpupu e sikandin wey ingkeen din e. Ne imbehayan din ka asawa rin wey migkeen e degma sikandin.
7 Te nakapenge e sikandan ka migkeen, napuwasan e ka isip dan wey nakamaan-maan e sikandan ne migpalawas bes sikandan. Tenged due, migkuwa sikandan te me dewun te kayu ne iggira wey impaneyi dan e seini eyew igbebaag dan.
8 Te egkasagkup e, nakarineg sikandan te pegderahebdeb te Magbebaye ne Manama diye te pinamulaan, ne dutu miggeles e sikandan diye te kakayuwan.
9 Piru in-umew te Magbebaye ne Manama ka lukes, “Hendei kad e?”
10 Ne migtabak ka lukes, “Nakarineg a te pegderahebdeb nu kayi te pinamulaan wey miggeles ad e su naaldek a tenged su migpalawas a.”
11 Ne mig-inse ka Manama, “Hentew‑a ka mignangen keykew ne migpalawas ka? Migkeen ka te behas te kayu ne ingkene ku keykew?”
12 Ne migtabak ka lukes, “Ka malitan ne imbehey nu keddi ka migbehey keddiey te behas te kayu. Sikan naa ka nakakeen a.”
13 Ne mig-insaan te Magbebaye ne Manama ka malitan, “Mania te inggimu nu seini?”
Ne migtabak ka malitan, “In-akalan a te uled. Sikan naa ka nakakeen a te behas te kayu.”
Ka peglegpad te Manama tenged te sale
14 Ne migkahiyan te Magbebaye ne Manama ka uled,
“Tenged su inggimu nu sika, eglegparan ku sikeykew. Te langun ne mananap, sikeykew re ka egdilusen. Ligkat kuntee, egdul‑ug kad e wey egkeen kad te alinepung taman te egpatey ka.
15 Egpegkuntereen ku sikaniyu te malitan wey ka me kabuhalan niyu degma. Egdekdeken te kabuhalan din ka ulu nu wey egkahaten nu degma ka palu rin.”
16 Ne migkahiyan te Manama ka malitan,
“Tenged te inggimu nu sika, egtimulan ku ka peg-antus nu te peg-anak nu wey masakit ka egkaheram nu ke eglesutan ka. Piru minsan pad due, dakel red ka isip nu te asawa nu wey sikandin ka egbuut keykew.”
17 Ne migkahiyan te Manama ka lukes ne si Adan,
“Tenged te mig-alak ka te asawa nu wey migkeen ka te behas te kayu ne ingkene ku keykew, egdilusen ku ka tane.
Ligkat kuntee, wey re egpanubu ka pinamula nu ke egkabaybayaran ke pad ne egbasuk.
18 Egpanubu te tane ka me hilamunen wey ka me duhi, wey egkeen ka te me pinamula ne egpanubu diye te kamet.
19 Ne wey ka egpakahaani te pinamula nu ke egkabaybayaran ke pad ne egbasuk, wey egtihis pad ka limuseng nu. Egkataman, egpakalibed ka diye te tane ne migligkatan nu. Su inggimu ka ligkat te tane ne egpakalibed ke red diye te tane.”
20 Nataman, migngaranan ni Adan ka asawa rin ki Iba su sikandin ma ka iney te langun ne etew.
21 Ne inggimuwan te Magbebaye ne Manama ensi Adan wey si Iba te manggad ne migligkat te mananap wey impakumbalaan din e sikandan.
Ka pegdeldel ki Adan wey ki Iba ligkat te pinamulaan
22 Ne migkahi ka Magbebaye ne Manama, “Kuntee, nekeiling e ka etew kanta ne nakataha ke nekey ka meupiya wey ke nekey ka mareet. Keilangan ne kene egpakapupu wey egpakakeen sikandan te behas te kayu ne egpakabehey te umul, su keilangan ne kene egkeuyag sikandan te ware egtamanan.”
23 Sikan naa ka indeldel e sikandan te Magbebaye ne Manama ligkat te pinamulaan te Idin wey egpabasuken e si Adan te tane ne migligkatan din.
24 Ne impaawe e te Manama ka alunggun, wey intahuan din e te me talagtameng ne panalihan ne egngaranan te kirubin ka diye dapit te igsile te pinamulaan te Idin. Ne imparuma rin ka kampilan ne egkalegleg wey egkatileng eyew ware etew ne egpakarani-rani te kayu ne egpakabehey te umul.