39
Si Husi wey ka asawa ni Putipar
1 Ne si Husi, in-uyan e te me Ismailita diye te Ihiptu. Imbeli e sikandin ni Putipar ne sabeka ne upisyal te Hari te Ihiptu wey ahalen te me talagtameng te palasyu.
2 Migdumaan iya te Magbebaye ne Manama si Husi wey migbulig kandin te langun. Diye sikandin mig-ugpe te baley te ahalen din ne matig-Ihiptu.
3 Nakita ni Putipar ne migdumaan te Magbebaye ne Manama si Husi wey migbulihan sikandin te langun ne miggimu rin.
4 Sikan naa ka ingkabennali rin si Husi. Impiyalan din si Husi diye te baley rin wey te langun ne karatuan din.
5 Ligkat te seeye ne timpu, impanalanginan te Magbebaye ne Manama si Putipar tenged ki Husi. Impanalanginan te Magbebaye ne Manama ka langun ne ki Putipar, ka diye te baley rin wey ka diye te me kamet din.
6 Impiyal ni Putipar ka langun ki Husi, wey tenged kandin, warad e lein ne igkasasew rin su ka keenen din naan de iya.
Ne mateles wey makeseg-keseg ne kanakan si Husi.
7 Te ware naluhey, naalihan e kandin ka asawa ni Putipar wey migkahi, “Egpewulirey ki.”
8 Piru mig-apul si Husi ka migtabak, “Impiyalan a te ahalen ku te langun kayi te baley wey warad e igkabantali rin su kayi ad.
9 Nekeg-iling ka katenged ney te seini ne baley, wey impiyal rin keddi ka langun angin e keykew su asawa ke ma nikandin. Purisu, kena a egpekeyimu te sika ne dereeti ne himu, wey kena a egkeupian ne egpakasale te Manama.”
10 Minsan tagse aldew ne egginggaten te asawa ni Putipar si Husi eyew egpewulirey sikandan, piru warad iya sikandin migparuma-ruma.
11 Piru sabeka ne aldew, migseled si Husi diye te baley eyew eggimu diye, wey nakasalengan seeye te ware duma rin ne me suluhuanen.
12 Ne dutu, miggen-genan te asawa ni Putipar ka kumbale ni Husi te migkahi, “Na, huliri a kuntee!” Te sikan de, migpallahuy e si Husi ne miglihawang te baley, piru nahaat ka kumbale din ne nahen-genan te malitan.
13 Te nakita te malitan ka kumbale ne nahen-genan din su neengkeran ni Husi te migpallahuy ka miglihawang,
14 in-umew rin e ka me lukes ne suluhuanen dan wey migkahi, “Pitew kew! Egpeyilawan ki te Hibruwanen ne in-uyan te asawa ku kayi te kanta. Migseled sikandin kayi te sinabeng ku eyew egleheng perem keddi, piru migpanguleyi a.
15 Te nasahimanu rin ne migpanguleyi a, migpallahuy e sikandin wey neengkeran din e seini se kumbale din.”
16 Ne intetahu te malitan ka kumbale ni Husi taman te nekeuli e ka asawa rin.
17 Ne migkahiyan din e ka asawa rin ne si Putipar, “Sika se uripen ne Hibruwanen ne in-uyan nu kayi te kanta, migseled sikandin te sinabeng ku eyew eglehengen a perem,
18 piru migpanguleyi a. Te sikan de, migpallahuy e sikandin ka miglihawang wey neengkeran din ka kumbale din kayi te keddi.”
19 Te narineg te ahalen ni Husi ka guhuren te asawa rin, nangebel-ebel e se langet din.
20 Imparakep din si Husi wey impalemung diye te impamirisu te Hari te Ihiptu.
21 Piru tenged te indumaan wey impapitew te Magbebaye ne Manama ka geyinawa rin ne kene egkabalbalawan ki Husi, ingkabennali sikandin te talagtameng te prisuwan.
22 Sikan naa ka impiyal te talagtameng ki Husi ka katenged te egtanggu te langun ne naprisu wey te langun ne eggimuwen seled te prisuwan.
23 Warad nabantali ka talagtameng te prisuwan te impiyal rin ki Husi su indumaan ma sikandin te Magbebaye ne Manama, wey imbulihan sikandin te langun ne eggimuwen din.