17
Ka pegdusa te Manama te Damasku
1 Seini ka lalag te Magbebaye ne Manama ne igpanengneng ne egkeyitabu diye te Damasku: “Pammineg kew! Kenad e ne siyudad ka Damasku; eglatambu e seini te egkagguhus ne me baley.
2 Ne warad e eg-ugpe diye te me siyudad te Aruwir te ware egtamanan. Egkeyimu seini ne panabtaban te me mananap, wey warad e egginaaldek kandan.
3 Egkaawe e ka malig‑en ne me baley ne me matikang diye te Israil, wey egkaawe e ka migharian te Damasku. Ne pila-pila naan de ka nasame ne keet-etawan te Sirya, iling te seeye se nenasame ne keet-etawan te Israil. Sikeddi se Amana ne Maresen ne Magbebaye ka miglalag kayi.”
4 “Te sika kangkuwa ne aldew, egkataman e ka kabantug te Israil wey egkaayu-ayu e seini.
5 Egpekeiling e ka Israil te kamet ne warad trigu. Masulug dan dengan iling te pinamula diye te bangalug te Ripaim, piru pila-pila ran naan de kuntee iling te kamet ne impanlimud pad minsan se neneulug ne me trigu.
6 Deisek naan de ka egkasame te keet-etawan din. Iling te kayu ne ulibu ne napamupuwan e—daruwa wey ke tatelu naan de ne behas ka nasame diye te matikang ne sugpang. Ne pila-pila bu naan de degma ka nasame diye te lein ne me sugpang. Sikeddi se Magbebaye ne Manama te Israil ka miglalag kayi.”
7 Te sika kangkuwa ne aldew, eg-aput ka me etew diye te miggimu kandan, ka Matulus ne Manama te Israil.
8 Kenad e sikandan egsalig te me altar ne immangimu ran eyew egpanubaran wey egtutungan te me insinsu para te me diyus-diyus dan wey ke sungkaleg naa ne larawan ni Asira.
9 Te sika kangkuwa ne aldew, ka malig‑en ne me siyudad dan egpekeiling e te inged te me Hibihanen wey me Amurihanen ne in-engkeran dan te pegginguma te me matig-Israil wey warad etew diye.
10 Inlingawan niyud ka Manama ne Manluluwas niyu wey ware niyud sumsumana sikandin se migpangabang kaniyu. Purisu minsan egpamula kew te meupiya ne pinamula iling te paras ne egpuun te lein ne inged,
11 wey minsan ke egtubu seini wey sahuhune ne egpamulak te aldew te pegpamula niyu kayi, kene kew egpakapupu te behas. Iyan niyu re egkahaani ka pegkalaggew wey ka egkasakitan te ware egtamanan.
Ka pegkatalu te me kuntere ne me nasud
12 Keyey! Mahulub ka masulug ne sundalu ne eglusud kaniyu ne egpekeiling te lehes te dakel ne bunlud.
13 Piru minsan pad due, egsaparan sikandan te Manama, wey egmakapallahuy diye te mariyu. Egmakapallahuy sikandan iling te ukaba ne eglayap te kalamag wey iling te alinepung ne egkeuyan te balisusu.
14 Te marusilem, egpangelkelen e te liyas ka me matig-Israil, piru egkengaddeetan ka me kuntere dan te kene pad egkapawe. Sika ka egpangkusan te migpanlusud wey migpanulis kandan.