24
Ka pegdusa te Manama te kalibutan
1 Pammineg kew, egdereetan e te Magbebaye ne Manama ka kalibutan. Egguhusen din ka ula-ula te tane, wey igmegsuwey-suwey rin ka nangugpe kayi.
2 Ne eg-antus ka tagse sabeka—me talagpanubad wey ka me etew, me ahalen wey ka me suluhuanen, me talagbebeli wey ka me talagbelegye, me talagpeutang wey ka me talag-utang.
3 Egkareetan iya egkatamtamani ka kalibutan wey warad e minsan nekey ne egkasame. Sika ka ingkahi te Magbebaye ne Manama.
4 Egpekeiling e ka tane te eglungku ne balu ke egkengaggangu e ka langun ne pinamula wey warad e egtubu ne minsan nekey. Ne egmahuye e ka kalibutan, wey egkallanes e ka me pinamula, wey egmagguye e degma ka me etew ne derakel se katungdanan kayi te ampew te tane.
5 Inlinditan te me etew ka kalibutan su ware dan ma tumana ka me suhu wey me Balaud te Manama, wey mig-inniyuhan dan ka ware egtamanan ne kasabutan te Manama duma kandan.
6 Purisu egdilusen te Manama ka kalibutan wey eg-antus ka nangugpe kayi tenged te me sale dan. Purisu nenasilaban ka nangugpe te kalibutan wey deisek naan de ka nasame ne neuyag.
7 Egkaggangu ka me paras wey egkaamin e ka binu. Ne eglungku e seeye se nenaggale.
8 Ne warad e egkarineg ne mahalew-galew ne dahing te tamburin wey me alpa su egkataman man e ka kahulub te pegsahakeen dan.
9 Ne kenad e egmangul-ulahing ka me etew ne egmangiinum te binu. Ne egkapeitan e te egpekewubug ne inumen seeye se eg-iinum.
10 Nenatamtamanan e nareeti ka siyudad. Nallekeban e ka gumawan te me baley wey warad e egpakalasud kayi.
11 Ne due egmanguleyi diye te deralanen tenged su warad e binu. Egkasubalan ka kahalaan te peglungku. Warad e peggale-gale kayi te kalibutan.
12 Nareetan de due ka siyudad, wey nalundus ka me gumawan te alad kayi ne matikang wey makepal ne batu.
13 Egkeyimu e ne pila-pila naan de ka me etew te me nasud, iling te egpanlampesan ne me ulibu ne egkengeulug ka me behas, wey iling te napakilalawan e ne parasan.
14 Ne eg-ulahing ne egkahale-gale ka me etew ne nenasame. Ne egsaye te kabantug te Magbebaye ne Manama ka me etew ne diye te iglineb.
15 Purisu egsaye te Magbebaye ne Manama te Israil ka me etew ne diye te igsile wey ka me diye te ilis te dahat.
16 Ne egkarineg ta minsan diye te diriyui e ne baad te kalibutan ka eg-ulahing ne eggenendue, “Katelesan te seeye se Matareng!”
Piru migmahuya ad e wey miggasa ad e puun te peglugku ku, tenged su taman kuntee migpabulus pad migmangeakal ka masulug ne me akalen.
17 He keet-etawan te kalibutan, egtetahad kaniyu ka liyas, bitu, wey sahilut.
18 Ka egpallahuy tenged te kaaldek, egkeulug te bitu, wey ka egpakalihawang puun te bitu, egkasahilut. Egginguma ka makeseg ne bagyu, wey egkawelwel ka pabunsuranan te kalibutan.
19 Ne egbekabeka ka tane wey egkaperi e seini, wey egkaantag egkatamtamani.
20 Egkaweil-weil seini iling te egkewubug ne egpakatilis-tilis, wey egkawelwel iling te baley ne ingkalamahan. Mabehat e amana ka sale te me etew ne nababa te kalibutan, purisu egkahuhus e seini, wey kenad e egpakasasindeg.
21 Te sika kangkuwa ne timpu, egdusaan te Magbebaye ne Manama ka seeye se maddesen diye te langit ne migsukul kandin, lagkes ka me Hari te kalibutan.
22 Ne eglibulungen sikandan, wey egprisuwen diye te bitu. Ne egkataman egdusaan e sikandan.
23 Ne egmarusilem e ka bulan wey kenad e amana egmeinit ka aldew tenged te katelesan te Amana ne Maresen ne Magbebaye ne eghari diye te Bubungan ne Siyun, diye te Hirusalim. Ne egpakakita te katelesan din ka me pangulu te keet-etawan din.