26
Ka ulahingen te kapanaluwan
1 Egginguma ka timpu ne eg-ulahingen e te keet-etawan diye te Huda ka seini ne ulahingen:
Malig‑en ka siyudad ta!
Ka Magbebaye ne Manama ka matikang wey makepal ne alad ta ne batu,
wey inlingutan ki te geem din.
2 Lukati niyu ka me gumawan
eyew egpakaseled ka matareng ne nasud—
ka nasud ne matinumanen te Magbebaye ne Manama.
3 He Magbebaye ne Manama, egbehayan nu te malehet ne keupianan
seeye se etew ne nasabeka se suman-suman ne eggimu ke nekey ka eleg,
su migsalig ma sikandin keykew.
4 Salig kew layun te Magbebaye ne Manama,
su sikandin ka batu ne aputanan ne ware egtamanan.
5 Impariralem din seeye se me hambuhen,
wey indereetan din ka siyudad dan taman te nalundus e seini taman te neyimu e ne alinepung.
6 Indi-diekan seini te egkengaayu-ayu
wey te ware egkengeyimu.
7 Impatag nu paay-ayari ka dalan te me matareng,
immateles nu iya ka dalan ne egbayaan dan.
8 He Magbebaye ne Manama, impakita ney ka pegsalig ney keykew pinaahi te pegtuman te me balaud nu.
Ka amana ney igkeupii ne egkareyrey ka ngaran nu.
9 Te timpu te marusilem, amana a egkeupian keykew;
emun ke egdusaan nud ka me etew ne maddeet se hinimuwan kayi te kalibutan,
egpakanengneng e sikandan te pegkamatareng.
10 Minsan impapitew nud ka hid‑u nu te maddeet ne me etew,
kene ded iya man e sikandan egpakanengneng te pegkamatareng.
Minsan mig-ugpe sikandan te inged te me matareng,
migpabulus ded iya man‑e sikandan te mareet ne hinimuwan dan,
wey ware dan ilaa ka kabantug nu.
11 He Magbebaye ne Manama, ingkayew nu ka belad nu
eyew te pegdusa te maddeet ne me etew,
piru ware sikandan miglinga-linga kayi.
Egkatutung perem sikandan te hapuy ne intahahe nu te me kuntere nu.
Papitawa nu sikandan te dakel ne geyinawa nu te keet-etawan nu
eyew egkeyilawan sikandan.
12 Magbebaye ne Manama, sikeykew ka egbehey kanami te keupianan.
Neyimu ney ka langun tenged te bulig nu.
13 He Magbebaye ne Manama ney,
immanduan key te lein ne me ahalen piru sikeykew re ka Magbebaye ney.
14 Nammatey e sikandan wey kenad e egkeuyag
kenad sikandan eglibed puun te inged te me minatey.
Indusaan nu wey indereetan nu sikandan,
wey warad e egpakasuman-suman kandan.
15 Piru imbuhal key nikeykew se keet-etawan nu, he Magbebaye ne Manama,
wey impamaluag nu ka tane ney, wey sika ka nakabantug keykew.
16 He Magbebaye ne Manama, migpamitew keykew ka keet-etawan nu te neyirapan sikandan.
Mig-ampu sikandan keykew te indisiplina nu sikandan.
17 Impeiling key nikeykew Magbebaye
te malitan ne egbaletikan ne migpanguleyi
tenged te kasakit.
18 Mig-antus key te amana ne masakit,
piru migpalelesut key re te kalamag.
Ware key migpanalu te pegpakiggira,
warad en iya meupiya ne impangkusan te langun ne inggimu ney.
19 Piru egkeuyag ka keet-etawan nu ne nammatey e,
wey eg-enew red ka me lawa ran.
Himata kew se diye te lebeng niyu
wey ulahing kew te kahale.
Sikeykew se Magbebaye ne Manama ka egpekeuyag te me minatey
iling te demmug ne egpakasubid te tane eyew egtubu ka me pinamula.
Ka pegdusa te Manama te maddeet ne etew wey ka pegluwas te Israil
20 He keet-etawan ku, seled kew te me sinabeng niyu wey lekebi niyu ka me gumawan. Heles kew pa dagdahew taman te egkabewu e ka langet te Manama.
21 Eggendini ka Magbebaye ne Manama puun te ugpaan din eyew te pegdusa te keet-etawan te kalibutan tenged te me sale dan. Igpahawa-hawe e te tane ka langesa te seeye se impangimatayan te me etew, purisu kenad e seini igpekeeles.