28
Ka pegpaney-paney te Samarya
1 Mekeyid‑u-hid‑u ka Samarya, ka siyudad ne impeggasal te me talewubug ne pangulu te Israil! Impasasindeg ka sika ne siyudad diye te meupiya ne napu, piru egpekeiling de seini kateles te bulak ne egkalanes, wey ware karuan para te me etew ne iyan e ugpe se egkengewubug-hubug te binu!
2 Pammineg kew! Due manekal wey maresen ne insuhu te Magbebaye ne Manama. Iling sikandin te apiyew, te mangune-kune ne kalamag wey uran, ne egpakasawile diye te tane.
3 Ne egdi-diekan din ka Samarya ne igpaambug te me talewubug ne pangulu te Israil.
4 Ka seini ne siyudad, diye nakatahu te meupiya ne napu piru egkaawe ka katelesan din iling te egkalanes ne bulak. Egsalukagmiten seini iling te behas te iggira ne hun‑a ne neyinuhan ne egpupuwen te egpakakita kayi wey egkeenen.
5 Te seeye kangkuwa ne timpu, egpekeiling e ka Amana ne Maresen ne Manama te tetelesi ne kuruna para te nenasame ne keet-etawan din.
6 Egbehayan din ka me talewukum te kabagget te peggukum ke nekey ka eleg. Egbehayan din te keseg seeye se migbantey te gumawan te siyudad ke due me kuntere ne eglusud.
Si Isayas wey ka me talewubug ne prupita
7 Ne egpakatilistilis minsan ka me talagpanubad wey me prupita tenged su nenewubug sikandan te egpekewubug ne binu wey kenad e ne eleg ka peggukum dan. Ne kenad egpakasabut ka prupita te impakita te Manama kandan. Ne kenad e ne meupiya ka peggukum te me talagpanubad te eggusayen dan.
8 Egkeempet te me ileb dan ka me lamisa ran, wey warad iya nasame ne malinis.
9 Ne migsagsahukul sikandan keddi ne migkahi, “Hentew buwa ka egpanuluen din wey hentew buwa ka egpasabuten din te inlalag din? Seeye buwa se me bate ne iyam pad nalutas!
10 Egpekeiling ka me panulu din te egpanlalahen te me bate ne kene pad egpekeutas.”
11 Ne kuntee, egpakiglalag ka Magbebaye ne Manama te keet-etawan din pinaahi lein ne linalahan ne iyan ka linalahan te me lapu.
12 Seini ka ingkahi rin, “Seini ka inged ne himelayanan. Himelayan seini te nabeley. Kayi egkakita ka keyimelayan.” Piru ware sikandan migpammineg.
13 Egpekeiling ka me panulu din te egpanlalahen te me bate ne kene pad egpekeutas. Ne egpakaley-ang sikandan ke eggipanew. Egkapalian sikandan, egkasahilut, wey egkarakep.
Ka pabunsuranan para te Siyun
14 Purisu pammineg kew te egkahiyen te Magbebaye ne Manama, sikaniyu se me pangulu te keet-etawan te Israil ne miglemet te lalag din.
15 Tenged su migkahi kew, “Due kasabutan ney te kamatayen wey te Siyul, sikan naa, emun ke egginguma ka karereetan kene key egkamenu su iyan ney aputanan ka ubat wey limbung.”
16 Purisu migkahi ka Magbebaye ne Manama, “Pitew kew, igtahu ku diye te Hirusalim ka pabunsuranan ne batu ne makehal wey naheraman e. Mahal seini ne batu ne pabunsuranan wey egkasalihan: ka egsalig kayi, kene egkewukag.
17 Eggimuwen ku ne iling te igseked ka eleg ne peggukum, wey iling te tuntun ka pegkamatareng. Egpangaween ku ka ubat ne insalihan niyu wey impaalindungan iling te eg-anlasen te baggiyu.
18 Ne warad karuan te kasabutan niyu te kamatayen wey te Siyul. Ne emun ke egginguma ka karereetan iling te baggiyu, egkareetan kew iya.
19 Ne tagse aldew, maselem wey marusilem, eggingumaan kew iya te karereetan.”
Emun ke egkasabut niyu seini, egkaaldek kew iya.
20 Su ka insalihan niyu, egpekeiling de te malepet ne hibatanan wey te malig-et ne ulesen ne kene de egpakapules.
21 Ka malehet, eglusud ka Magbebaye ne Manama iling te inggimu rin diye te Bubungan te Pirasim wey diye te napu te Gibyun. Purisu te seini ne timpu, iyan egkeyitabu ka ware niyu im-imana.
22 Su migkahi ka Amana ne Maresen ne Magbebaye ne Manama te egdereetan din ka intiru ne nasud. Purisu, kene kew e panampele su kema ke egdakel pad ka parusa niyu.
Ka katagseb te Manama
23 Ayad-ayad kew pammineg te igkahi ku kaniyu.
24 Egpabulus-bulus naan de iya ka talagbasuk ne egdaru te ware egtamanan? Kene.
25 Ke andam e ka tane, egsaweran din e te behas te me leggu ne egngaranan te dil wey kumin, wey diye din igpamula te eleg ne egpamulaan ka trigu wey sibada. Ne egpamulaan din te lein ne klasi te sibada ka ilis te kamet din.
26 Nakataha ka talagbasuk ke nekey ka eleg ne eggimuwen din, tenged su impanulu sikandin te Manama.
27 Ne kene sikandin eggamit te mabehat ne balsaan eyew te pegdiek te leggu ne dil wey kumin, ke kene, egpanlampesan din de seini te maagkap ne kayu.
28 Ne eglupeten din ka trigu ne eggimuwen ne paan piru kene din seini eglibliberan te eglupet. Egpalihisan din seini te balsaan piru kene din de egpatamtamanan te eglupet.
29 Ka seini ne katuenan egpuun te Amana ne Maresen ne Magbebaye. Subla sikandin ne meupiya ne talagtambag wey amana ne matagseb.