32
Ka matareng ne Hari
1 Ne due keureme Hari ne matareng ne eghari wey ka me upisyal rin, egmandu ne egdumaan te eleg ne peggukum.
2 Ka tagse sabeka kandan, egpangabang te me etew, iling te paandilunganan ke due makeseg ne kalamag wey baggiyu. Egpekeiling degma sikandan te beuhan diye te mammara ne inged ne kene egkeugpaan wey ke dakel naa ne batu ne egpakaralung puun te mangune-kune ne meinit.
3 Ne egpakakite e sikandan ke nekey ka malehet wey egpakarineg e te me lalag te Manama.
4 Ne seeye se me etew ne an-aneen, egpakaayad-ayad e egpakasuman-suman ke nekey ka eggimuwen. Ne seeye se me etew ne kene amana egkateu-teu ne eglalag, meupiye e ne egpamminehen ke eglalag.
5 Ka seeye se ungel, kenad e egleng-ahen, wey ka me limbungen, kenad e egtahuren.
6 Su ka ungel, keungelan de ka egmanlalahen wey maddeet ka egsumsumanen. Ne ka langun ne eggimuwen din wey egmanlalahen din, pegbaley-baley re te Magbebaye. Kene sikandin egpakeen te inggutasan wey kene egpeinum te nammaraan.
7 Mareet ka himu te akalen. Eggimuwen din ka minsan nekey re ne mareet eyew te pegdereet te me etew, minsan ka egkaayu-ayu ne ware neyimu ne seyyup.
8 Piru ka etew ne eleg ne egtahuren, eleg degma ne egtahuren ka me planu rin, wey sika iya layun ka eggimuwen din.
Ka peggukum wey kaligwangan
9 Pammineg kew te iglalag ku kaniyu me malitan ne ware pegkalaggew tenged te meupiya ne peg-ugpe niyu kuntee.
10 Te seup ne leg‑un, egkelkelen kew e se me malitan ne ware igkalaggew tenged su kenad e egpamehas ka me paras, wey warad en iya egkapupu niyu.
11 Mig-ugpe kew ne ware igkabantali wey ware igkalaggew, piru egkelkelen kew e kuntee tenged te kaaldek. Luluung kew wey hehamit kew te saku.
12 Pandabiya niyu ka me kumeng niyu tenged te kalaggew su nareetan e ka meupiya ne me kamet wey ka mabehas-behas ne me parasan.
13 Kalaggew kew tenged te tane ne imbehey ku kaniyu su egpanubuan e seini te me balunseri wey me hilamunen. Sinehew kew su egkengallundus e ka me baley niyu ne egmanggal-galaan niyu kuntee, wey egkataman e ka me kahalaan te siyudad niyu.
14 Su eg-engkeran e te me etew ka palasyu wey siyudad ne mahulub. Ne egkeyimu e ne warad eg-ugpe te ware egtamanan ka in-alad ne labuntud wey ka pantawanan. Ne iyan e egmamalpallahuy ka me leew ne asnu, wey diyad egmanabtab ka me karniru.
15 Egkeyitabu seini taman te igpeuyan e te Manama kayi te kanta ka Panisingan din puun te langit. Ne ka disirtu, egkeyimu e ne kamet ne egkeuyahan te me pinamula ne susuluhi amana. Ne ka susuluhi ne pinamula egkeyimu e ne iling te puwalas.
16 Ne diye te disirtu dengan, wey diye te me inged ne egkeuyahan te memeupiya ne pinamula, eg-ugpe e ka me etew ne egpekeikul ke nekey ka eleg wey katareng.
17 Ne iyan egpangkusan te katareng ka keupianan, wey pegsabeka te ware egtamanan.
18 Ne eg-ugpe ka keet-etawan te Manama ne malinawen, ware igkaaldek, wey eggimhimeley ne ware igkabantali.
19 Ne minsan pad ke egkengareetan e ka me puwalas tenged te mangune-kune ne peg-uran te apiyew wey egkapatag e ka siyudad,
20 egpanalanginan ded iya te Manama seeye se migmamula te minsan hendei. Ne igpakapalayud dan ka me mananap dan minsan hendei.