36
Ingginalatan te Asirya ka Hirusalim
(2 Hari 18:13-27; 2 Kru. 32:1-19)
1 Te igkasapulu wey hep‑at (14) ne leg‑un te peghari ni Isikiyas diye te Huda, inlusuran te Hari te Asirya ne si Sinakirib ka langun ne siyudad te Huda ne in-alad te matikang wey makepal ne batu, wey naahew rin seini langun.
2 Ne taheed te diye te Lakis si Sinakirib ne Hari te Asirya, impeendiye din ka labew ne upisyal din duma te susuluhi ne sundalu diye te Hirusalim diye ki Isikiyas. Ne diyad sikandan mig-uugpe te weyig ne diye te dibabew te linew ne lenged te dalan ne peendiye te pi‑pianan.
3 Ne iyan migsinug-ung kandan ka anak ni Hilkiyas ne si Iliyakim ne sinalihan te palasyu, si Sibna ne sikritari, wey si Huwas ne talagsulat ne anak ni Asap.
4 Ne ingkahiyan sikandan te labew ne upisyal, “Kahii niyu si Isikiyas te mig-inse ka mabantug ne Hari te Asirya, ‘Nekey bes ka amana nu salihi?
5 Kahiyen nu buwa ne egpanalu ka te pegpakiggira te lalag de wey kene ne pinaahi te katuenan wey keseg te me sundalu nu? Hentew bes ka insalihan nu? Mania te migribildi ka keddi?
6 Migsalig ke buwa te Ihiptu ne iling de te laye ne tuked ne nabagbag ne egpakapali te belad te seeye se eggen-gen kayi? Iling due ka Hari te Ihiptu ke due egsalig kandin.
7 Piru ke egkahi kew se me upisyal te Huda te migsalig kew te Magbebaye ne Manama niyu, na, kene naa ne si Isikiyas ded ka migpahuhus te me simbaanan wey me altar te Magbebaye diye te me panubaran diye te bubungan? Ne ingkahiyan din ka nangugpe diye te Hirusalim wey diye te duma ne siyudad te Huda te diye de sikandan egsimba te halaran diye te Hirusalim.’ ”
8 Ne migpabulus migkahi ka labew ne upisyal, “Pakigsabut ka te ahalen ku ne iyan ka Hari te Asirya. Egbehayan ku sikeykew te daruwa ne libu (2,000) ne me kudde ke due etew nu ne daruwa ne libu (2,000) ne egmangudde kayi.
9 Egmenuwen nu naa te egsukul te seeye se minsan subla ne deisek se katungdanan ne suluhuanen te ahalen ku ke egsalig ke re te me karwahi wey me sundalu ne igbehey keykew te Ihiptu?
10 Timul pad due, ka Magbebaye ka migduma keddi te miggendini eyew te pegdereet te seini ne nasud. Ka Magbebaye ka migkahi keddi ne eglusuran ka seini ne nasud wey egdereetan.”
11 Ne ingkahiyan enni Ilyakim, Sibna, wey ni Huwas ka labew ne upisyal, “Iyan nu re ubag gamita ka Aramayik ne linalahan su egpakasabut key ma kayi. Kene de ne Hibruwanen su kema ke egpakarineg wey egkasabut ka me etew ne sika te matikang wey makepal ne batu ne alad te siyudad.”
12 Piru migtabak ka labew ne upisyal, “Insuhu a te ahalen ku ne igpanengneng seini te langun ne nangugpe te Hirusalim, kene ne diye de te kaniyu wey te Hari niyu. Egmanggutasan kew langun wey egkammaraan te timpu ne eglusuran ney e sikaniyu. Ne egmangeen kew e te tei niyu wey egmanginum e te ihi niyu.”
13 Ne migsasindeg ka labew ne upisyal wey migpanguleyi ne miglalag te Hibruwanen, “Pammineha niyu ka inlalag te maresen ne Hari te Asirya!
14 Kene kew paakal ki Isikiyas. Kene sikandin egpakaluwas kaniyu!
15 Kene kew patipu kandin ne egsalig te Magbebaye ne egkahi, ‘Egluwasen ki iya te Magbebaye. Kene egkaahew te Hari te Asirya ka seini ne siyudad.’
16 “Kene kew pammineg ki Isikiyas! Seini ka ingkahi te Hari te Asirya: Pakiggusey kew e keddi wey hural kew e! Ne egpakakeen kew e langun te behas te paras niyu wey iggira, wey egpekeinum te weyig te me belun niyu.
17 Ne egkataman, eg-angayen kud e sikaniyu wey eg-uyanen diye te tane ne iling ded te tane niyu ne masulug se pamulaan te paras wey trigu.
18 Bantey kew su kema ke eg-akalan kew ni Isikiyas te egkahi, ‘Egluwasen ki te Magbebaye.’ Duen naa me manama te minsan hendei ne nasud ne nakaluwas kandan puun te Hari te Asirya?
19 Hendei bes ka me manama te siyudad te Hamat, Arpad, wey Siparbayim? Naluwas naa te me manama ka siyudad ne Samarya puun te geem ku?
20 Hentew‑a te me manama te sika ne me nasud ka nakaluwas te nasud dan puun keddi? Purisu, egmenuwen te Magbebaye te egluwas ka Hirusalim puun te geem ku?”
21 Piru migpeeneng-eneng de ka me etew su ingkahiyan ma sikandan ni Hari Isikiyas te kene egpatabaken.
22 Ne miggendiye ki Isikiyas si Iliyakim ne sinalihan te palasyu wey anak ni Hilkiyas, si Sibna ne sikritari, wey si Huwas ne talagsulat wey anak ni Asap. Ne impanggisi dan ka me kumbale dan tenged te peglungku wey innangenan dan si Isikiyas te impanlalag te labew ne upisyal.