41
Egbulihan te Manama ka Israil
1 Migkahi ka Manama,
“Peeneng-eneng kew wey pammineg kew keddi se keet-etawan due te ilis te dahat!
Pakannekal kew wey parani kew keddi
wey lalag kew naa.
Egliblibulung ki diye te hukumanan.
2 Kene naa ne sikeddi ka egbagget te etew puun te igsile eyew egtuman te matareng ne suhu ku?
Igpatalu ku kandin ka me nasud eyew egkaridiekan e ka me Hari dan.
Ne egpekeiling e sikandan te alinepung wey ukaba.
3 Impanalukunan din ka me kuntere din wey ware iya nakabalabag kandin.
Meiyal amana sikandin ne migpallahuy
iling te warad nakaragket te tane ka paa rin.
4 Hentew‑a ka miggimu kayi?
Hentew‑a ka migtuhut te langun ne neyitabu puun pad dengan te an-anayan ne me kabuhalan?
Sikeddi ka Magbebaye ne duen e te bunsuranan pad
wey te katammanan.
5 “Nakakita te inggimu ku seeye se me etew diye te me ilis te dahat.
Nenaaldek wey nangelkel seeye se me etew diye te diriyui ne me inged.
Ne miglibulung e sikandan,
6 wey migpabulbulihey ka tagse sabeka wey migpabagbaggetey.
7 Ne imbagget te panday seeye se talagdekdek te bulawan
wey imbagget te talagpasilak te diyus-diyus seeye se talaglansang.
Ne migkahi sikandan, ‘Meupiya ne pegpegket,’
wey inlansang dan ka diyus-diyus diye te tahuanan kayi eyew kene egkaweil.
8 “Piru in-alam ku sikeykew Israil, ne suluhuanen ku,
ka kabuhalan te alukuy ku ne si Abraham.
9 In-umew ku sikeykew wey in-angey
puun te diriyui ne baad te kalibutan
wey ingkahiyan ku sikeykew, ‘Suluhuanen ku sikeykew.’
In-alam ku sikeykew, wey kene ku egdeldelen.
10 Kene ka kaaldek su egduma a keykew!
Manama a nikeykew, purisu kene ka kalaggew.
Egbehayan ku sikeykew te keseg,
egbulihan, egpangabangan, wey egluwasen.
11 “Egkeyilawan wey egkalemetan ka langun ne migdumut keykew,
wey egpatey seeye se egpakig-ehet keykew.
12 Egpamitawen nu ka me kuntere nu
piru kene nud e sikandan egkakita;
egkengaawe ka langun ne kuntere nu.
13 Sikeddi ka Magbebaye ne Manama nu.
Eglig‑enen ku sikeykew wey egkahiyan,
‘Kene ka kaaldek su egpangabangan ku sikeykew.’ ”
14 Migkahi ka Magbebaye ne Manama,
“Kene ka kaaldek Israil
minsan iling ke re karakel wey kahuye te liwati
su egbulihan ku sikeykew.
Sikeddi se Matulus ne Manama te Israil
iyan ka manluluwas nu.
15 Eggimuwen ku sikeykew ne egpekeiling te
mahalang wey iyam ne ngipen te karas ne igdiriek.
Egdieken nu wey eglupeten nu ka me bubungan
wey eggimuwen nu ne egpekeiling te ukaba ka me labuntud.
16 Egpasiliyen nu sikandan
wey eglayap e sikandan diye te mariyu,
wey egtalagtahen sikandan te bagyu.
Piru egkahale kew su sikeddi ma ka Magbebaye niyu,
wey egdeyrayen a nikaniyu se Matulus ne Manama te Israil.
17 “Ne emun ke egpamitew te weyig seeye se egkengaayu-ayu wey seeye se egkengaware-ware, wey egmammare e se abelengan dan,
egbulihan ku iya sikandan ke ware egkakita ran.
Sikeddi ka Manama te Israil, kene ku iya eg-engkeran sikandan.
18 Ne egpatulayasen ku ka me weyig diye te me bubungan ne warad e me kayu,
wey me sebseb diye te me bangalug.
Ne eggipenuen ku te weyig ka disirtu,
egpalepawan ku te me weyig ka mammara ne tane.
19 Egpamula a te kayu ne sidar, akasya, mirtul, wey ulibu diye te mammara ne tane
wey egkeempet ka disirtu te kayu ne me sipris, platanu, wey ahuu.
20 Egkakita seini te me etew, egkanengnengan,
wey egkasabut ne sikeddi se Magbebaye,
ka matulus ne Manama te Israil iyan ka miggimu kayi.”
Ka pegsapad te Magbebaye te me diyus-diyus
21 Ne migkahi ka Magbebaye te Israil,
“Sikaniyu se me diyus-diyus te me nasud,
nekun la iya sumbung kew diye te hukumanan
wey pangatarengan kew.
22 Hendini kew! Ipapitew niyu ne egpakatagne kew.
Ne ipanengneng niyu ke nekey ka intagne niyu dengan
eyew egkanengnengan ney ke migpangguhud kew naa te malehet.
Ne panagne kew man‑e ke nekey ka egkeyitabu.
23 Nangeni key ke nekey ka egginguma keureme,
eyew egpakanengneng key ne me manama kew bes iya.
Himu kew te egpakameupiya wey ke egpakarereet naa
eyew egkeinu-inu key wey egkaaldek.
24 Piru ka malehet, ware me karuan niyu wey ware iya egkeyimu niyu,
wey igkalindit ku iya seeye se migsimba kaniyu.
25 “Mig-alam a te etew ne egpuun diye te igkahibang ne balabahan.
Eglepew sikandin diye te igsile.
Egdawit sikandin te ngaran ku,
wey egdi-diekan din ka me Hari ne iling de te pegdiek-diek te talaggimu te kuren.
26 Hentew kaniyu ka migkahi dengan ne egkeyitabu seini
su eyew egpakakahi key te eleg sikandin?
Warad iya minsan sabeka kaniyu ne egpakapanengneng,
wey ware minsan sabeka ne nakarineg ne due inlalag niyu.
27 Sikeddiey se Magbebaye ka an-anayan ne migpanengneng ne duen e te dalan ka egbulig te Siyun!
Sikeddi ka migpanengneng te sika ne meupiya ne guhuren diye te Hirusalim.
28 Ware minsan sabeka te me diyus-diyus ne migguhud kaniyu due.
Ware minsan sabeka kandan ne migtabak te me inse ku.
29 Ware iya karuan te langun ne diyus-diyus
wey ware iya egkeyimu ran.
Magguye sikandan wey ware geem.”