43
Ka saad te pegluwas
1 Piru kuntee he keet-etawan te Israil, seini ka ingkahi te Magbebaye ne miggimu kaniyu ne sabeka ne nasud,
“Kene kew kaaldek su egluwasen ku sikaniyu.
In-umew ku sikaniyu wey sikeddi ka kamuney kaniyu.
2 Ke eglapas kew te me weyig, egdumaan ku sikaniyu
wey kene kew iya egkalened.
Ke egbaye kew te hapuy, kene kew egkatutung;
wey kene kew egkasinalaban te legleg kayi.
3 Su sikeddi ka Magbebaye ne Manama niyu,
ka Matulus ne Manama te Israil ka migluwas kaniyu.
Igbehey ku diye te lein ne nasud ka Ihiptu,
Itiyupiya, wey Siba eyew igliwan kaniyu.
4 Pinalangge ku sikaniyu, imbantug, wey inggeyinawaan.
Sikan naa ka igbehey ku ka duma ne keet-etawan eyew re egkaluwas kew.
5 Kene kew kaaldek su egdumaan ku sikaniyu!
Eg-uyanen ku sikaniyu keet-etawan te Israil puun te igsile wey iglineb
wey eglibulungen ku sikaniyu langun.
6 Ne egbanasalan ku ka me nasud diye te igkahibang ne balabahan
wey diye te igkakawanan ne balabahan,
‘Peulia niyud sikandan.’
Egpeulien kud e ka keet-etawan ku puun te maddiyu ne inged te kalibutan.
7 Sikandan ka keet-etawan ku ne in-umew ku
ne inggimu ku ne sabeka ne nasud para te katelesan ku.”
Ka peg-umew te Manama te Israil isip talagpamalehet
8 Migkahi ka Manama,
“Pangumawa niyu ka keet-etawan
ne due mata piru kene egpakakita,
due talinga piru kene egpakarineg!
9 Palibulunga niyu ka keet-etawan te me nasud.
Hentew te me diyus-diyus dan ka egpakatagne ke nekey ka egginguma
wey egpakahuhud te egkeyitabu kuntee?
Parurumaa niyu sikandan te me talagpamalehet ke eleg ma ka eglalahen dan;
pepammineha niyu sikandan wey palalaha niyu ne malehet seini.
10 “Keet-etawan te Israil, sikaniyu ka me talagpamalehet ku
wey me suluhuanen ne in-alam ku
eyew egpekeila kew keddi wey egpalintutuu
wey egpakasabut ne sikeddi ka Manama.
Warad e manama ne nekewun‑a wey ke egpakasinundul naa keddi.
11 “Sikeddi iya ka Magbebaye ne Manama,
wey warad lein ne manluluwas angin e keddi.
12 Sikeddiey ka migtagne te neneyitabu.
Impangabangan ku sikaniyu iling te ingguhud ku kaniyu.
Ne ware diyus-diyus ne nekeyimu te iling dutu.
Ne sikaniyu ka me talagpamalehet ku,”
migkahi ka Magbebaye.
13 “Puun pad dengan, sikeddiey en iya ka Manama.
Ware egpakapanalliya te geem ku,
wey ware egpakabalabag te eggimuwen ku.”
Ka peglegpad te Babilunya
14 Seini ka ingkahi te Magbebaye ne talagluwas kaniyu, ka matulus ne Manama te Israil:
“Eyew egkaluwas kew, egpalusuran ku ka Babilunya
wey igpahuhus ku ka me gumawan te siyudad.
Ne ka pegpanguleyi te kahale te me matig-Kaldiya, egkeyimu e ne pegpandalawit.
15 Sikeddi ka Magbebaye, ka matulus ne Manama niyu.
Sikeddi ka miggimu te Israil, wey sikeddi ka Hari niyu.”
16 Sika ka ingkahi te Magbebaye ne Manama ne miggimu te bayaanan diye te dahat,
ka dalan ne diye te elat-elat te bubuyahen ne weyig,
17 ne iyan migdereet te me karwahi, me kudde,
me sundalu, wey me bahani te Ihiptu.
Ne warad iya sikandan nekeenew;
iling sikandan te sulu ne neebukan.
18 Piru migkahi ka Manama,
“Kene niyud e sumsumana seeye se miglihad
wey lingawi niyud e ka neyitabu e.
19 Pitew kew, eggimu a te iyam ne minsan nekey;
ne kuntee eglepew en iya seini wey egkakita niyud.
Eggimu a te dalan diye te inged ne ware mig-ugpe,
wey egpatulayasan ku degma ka disirtu.
20 Egtahuren a te me mahintalunan ne me mananap wey me manuk-manuk,
su egpatulayasen ku ma ka weyig diye te inged ne ware mig-ugpe wey diye te disirtu
eyew due egkeinum te in-alam ku ne keet-etawan.
21 Keet-etawan ku iya sikandan ne inggimu ku,
eyew egdeyrey keddi.”
Ka sale te keet-etawan te Israil
22 Migkahi ka Manama,
“Piru ware kew migpangananey keddi, he keet-etawan te Israil,
nasi kew re iya napeleyi keddi!
23 Wara a uyani nikaniyu te me karniru ne egtutungen ne igpanubad keddi
wey wara a tahura nikaniyu pinaahi te igmanubad niyu.
Ware ku ma perem sikaniyu buyui te subla-subla ne me halad wey ke subla-subla naa ne me meemut ne insinsu.
24 Wara a belii nikaniyu te insinsu
wey ke nabulung naa te kalambeg te immanubad niyu.
Piru nasi a mule pabehati nikaniyu te me sale niyu
wey nasamuk a te pegkamasinupaken niyu.
25 Piru sikeddi iya ka mig-awe te sale niyu.
Na puun su Manama a, kene kud en iya seini egsumsumanen pad.
26 “Egsumsumanen ta ka miglihad
wey pangatarengan kew eyew te pegpamalehet ne ware sale niyu.
27 Nakasale keddi ka me kabuybuyahan niyu
wey nakasale keddi ka me pangulu niyu.
28 Purisu impeyilawan ku ka me talagpanubad
wey egtuhutan ku ne egkareetan ka Israil, wey egkeyilawan.”