47
Ka egpangkusan te Babilunya
1 Migkahi ka Magbebaye ne Manama,
“Pamaneug ka wey pinnuu ka diye te tane,
he mengebay ne anak te Babilunya.
Pinnuu ka te tane ne warad trunu,
he malitan ne anak te Kaldiya.
Su kenad egkahi ka etew te meupiya ka
wey mateles.
2 Kuwa ka te galingan ne batu
wey gehaling ka te trigu.
Awaa nu ka bunbun te ulaula nu
wey langisa nu ka saya nu
eyew egkawakisan ka bubun nu te peglapas nu te weyig.
3 Ne egkakita ka ne migpalawas wey egkeyilawan ka.
Egsulian ku sikeykew wey ware iya egsameen ku.”
4 Ka Manluluwas ta ne egngaranan te Amana ne Maresen ne Magbebaye,
iyan ka Matulus ne Manama te Israil.
5 Ne migkahi pad man‑e ka Magbebaye,
“Babilunya, pinnuu ka diye te marusilem wey peeneng-eneng ka
he malitan ne anak te me matig-Kaldiya;
su kene kad e egngaranan te rayna te me migharian.
6 Nabelu a te keet-etawan ku sikan naa ka mig-inniyuhan ku sikandan,
wey in-awe kud ka kabantug dan.
Impatalu kud sikandan keykew,
piru ware nu sikandan ikeyid‑u,
inleig-leig nu minsan ka me buyag e kandan.
7 Migkahi ka,
‘Rayna a te ware egtamanan.’
Purisu ware nu sumsumana seini se inggimu nu
wey ke nekey naa ka egpangkusan nu.
8 Purisu, sikeykew se amana egkeupian te kahalaan, pammineha nu seini.
Migpinnuu ka ne ware igkabantali ne migkahi,
‘Warad iling keddi karesen wey kena a egkabalu
wey kena a egpatayan te me anak.’
9 Piru egtigkew egginguma seini se daruwa:
ka pegpatey te me anak wey ka pegkabalu.
Minsan masulug pad ka pamulingan nu
wey migsuladlad ka te geem te lambus nu.
10 “Egsalig ka amana te mareet ne batasan nu
su kahiyen nu ne ware nakakita keykew.
Ka katagseb nu wey katuenan nu iyan nakalaag keykew wey migkahi ka,
‘Sikeddi de iya—warad lein angin e keddi.’
11 Purisu egginguma keykew ka karereetan ne kene nu egkabalabahan,
wey kene nu seini egkaawaan.
Egginguma re due ka mareet ne ware nu sumsumana.
12 Ne uya, pabulus kad ka egpanpanlambus
wey egpampamulingan iling te inggimu nu puun pad te pegkabate nu.
Kema ke egpanalu ke pad
wey ke egkengaaldek naa ka me kuntere nu.
13 Napelaan kad e te masulug ne me tambag keykew.
Pabulig ka te me etew nu ne mammituen
ne migtagne te tagse bulan ke nekey ka egkeyitabu keykew.
14 “Ka malehet, iling de sikandan te lahami ne mahaan de egkasilabi,
wey kene dan egkaluwas minsan ka pegkeetew ran puun te hapuy ne egkanlabkanlab.
Kene ne hapuy sika ne egginarangan de,
ke kene, hapuy sika ne egpakarereet.
15 Sika ka egkeyitabu te langun ne talagtambag,
ka insalihan nu puun te pegkabate nu.
Eggipanew ka tagse sabeka kandan te minsan hendei
wey ware egpakaluwas keykew.”