49
Ka himu te suluhuanen te Manama
1 Pammineg kew keddi, sikaniyu se due te me ilis te dahat
wey sikaniyu se diye nangugpe te maddiyu ne me inged.
Te diye e pad te aanakan te iney ku, in-alam ad te Magbebaye ne Manama.
2 Inggimu rin ka me lalag ku ne mahalang iling te kampilan.
Impangabangan a nikandin pinaahi te geem din,
wey inggimu a nikandin ne egpekeiling te mahalang ne tunud ne intines
ne andam e ne eggamiten.
3 Ne ingkahiyan a nikandin,
“Suluhuanen ku sikeykew, Israil,
wey tenged keykew egkabantug a.”
4 Piru migkahi a,
“Ware karuan te trabahu ku! Nahamit ku ka keseg ku te ware karuan wey ware katuyuan.”
Piru minsan pad due, ka eleg ne peggukum diye de te Magbebaye ne Manama
wey sikandin ka egdasag keddi.
5 Ka Magbebaye ne Manama ka miggimu keddi diye te aanakan te iney ku
eyew egkeyimu ne suluhuanen din
wey egpalibed wey eglibulung te me matig-Israil diye te kandin.
Imbantug a te Magbebaye ne Manama,
wey sikandin ka migbehey keddi te keseg.
6 Migkahi ka Magbebaye ne Manama,
“Sikeykew se suluhuanen ku, dakel pad ka himu ne igpeyimu ku keykew
du te pegpalibed te me matig-Israil ne impangabangan ku.
Eggimuwen ku sikeykew ne kalayag te kene ne me Hudiyu
eyew pinaahi keykew, egkaluwas ka intiru ne kalibutan.”
7 Ingkahiyan te Magbebaye ne Manluluwas, wey Matulus ne Manama te Israil
ka etew ne indeeg-deeg wey insamsamilian te me nasud, ne suluhuanen te me pangulu,
“Egkakita te me Hari wey me pangulu ke hentew kaa iya
ne egpanasindeg sikandan ka egtahud keykew ke egparani ka, wey egpanimbuel sikandan diye te tangkaan nu.
Egkeyitabu seini tenged keddi te Magbebaye ne Manama ne matinumanen
ne iyan ka Matulus ne Manama te Israil.
Sikeddi ka mig-alam keykew.”
8 Seini ka ingkahi te Magbebaye ne Manama,
“Egginguma ka eleg ne timpu ne egluwasen ku sikeykew;
egtabaken ku ka me peg-ampu nu, wey egbulihan ku sikeykew.
Egpangabangan ku sikeykew
wey eggimu a te kasabutan duma te me etew pinaahi keykew,
eyew iglibed nu ka tane te Israil ne nareetan,
wey igtalad-talad nu seini diye te keet-etawan ku.
9 Ne egkahiyan nu ka me matig-Israil ne nenaprisu,
‘Lihawang kew e!’
Ne egkahiyan nu degma seeye se diye te marusilem,
‘Hendiye kew e te malayag.’
Egpekeiling sikandan te me karniru ku ne egpanabtab diye te ilis te dalan,
wey egkeyimu ne panabtaban dan ka masalad e ne me bubungan.
10 Kene eggutasan sikandan,
wey ke egkammaraan naa.
Kene egkatutung sikandan te meinit ne kalamag
wey te meinit ne aldew.
Su ka egtanud kandan egpanulu te eleg ne egbayaan
wey eg-uyan kandan diye te sebseb.
11 “Ne eggimuwen ku ne dalan ku ka me bubungan,
wey egpatikangen ku ka malluag ne me dalan.
12 Ne egginguma ka keet-etawan ku puun te mariyu;
puun te igkahibang ne balabahan wey puun te iglineb.
Ne egpuun ka duma te inged te Sinim ne dapit te igkakawanan ne balabahan.”
13 He langit wey tane, ulahing kew te kahale.
Ulahing kew me bubungan
su egliwangen te Magbebaye ne Manama ka keet-etawan din ne mig-antus.
14 Piru migkahi ka keet-etawan te Hirusalim,
“In-engkeran key e te Magbebaye ne Manama,
wey inlingawan key e nikandin.”
15 Piru migkahi ka Magbebaye,
“Egkalingawan naa te iney ka anak din ne egsusu pad?
Kene din naa igkeyid‑u ka bate ne miglesut mismu kandin?
Ne minsan egkalingew sikandin,
piru kena a iya mule egkalingew kaniyu!
16 He Hirusalim insulat ku ka ngaran nu te palad ku.
Layun ku egkasuman-suman
ka nahuhus ne me alad ne batu te Hirusalim ne matikang wey makepal.
17 “Mahaan e egginguma ka egbalew-balew ne egpasasindeg keykew,
wey egpariyu ka migguhus keykew.
18 Langas-langas ka wey pitew ka;
Eggendini ka me kabuhalan nu eyew eglibulung kayi te keykew.
Ne kahi te Magbebaye, ‘Sikeddi se ware egpatayan,
egsaad a pinaahi te umul ku
ne ka me kabuhalan nu ka egpuunan ne egpakapeggasal kew
iling te mahal ne igdayan-dayan.’
19 “Nareetan ka wey warad mig-ugpe,
piru kuntee, eggulisek e man‑e ka me etew te inged nu.
Ne egpakapariyu e seeye se migdereet keykew.
20 Ka keet-etawan ne neetew te timpu te peglungku nu, egkahi keykew,
‘Malig-et de amana seini ne inged para kanami.
Behayi key te maluag ne inged ne egkeugpaan ney.’
21 Ne egpekeinse ka te suman-suman nu,
‘Hentew buwa ka migpalelesut te seini ne me bate para keddiey?
Nenammatey man e ka me anak ku
wey impandakep e ka duma wey impanguyan diye te lein ne me nasud.
Ne sikan naa ka sabeka ku naan de te nahaat.
Purisu hendei buwa namuun seini ne me bate,
wey hentew buwa ka migpatulin kandan?’ ”
22 Seini ka ingkahi te Magbebaye ne Manama, “Pammineg kew!
Egtingyasan ku ka me nasud
wey iglibed dan due te keykew ka keet-etawan nu
ne egpekeiling te me bate ne impanapipi wey impangutuk.
23 Egpamakey keykew ka me Hari wey me rayna te me nasud,
iling te me amey wey me iney ne egtanggu te me anak dan.
Eglangkeb sikandan diye te tane, diye te tangkaan nu,
wey egpariralem sikandan diye te tangkaan nu.
Seeye se migsalig keddi kene iya egkeyilawan.”
24 Egkaawi naan ded ka immangahew te me bahani?
Egkaluwas naan ded ka impandakep te me mabbulut ne me etew?
25 Ne migtabak ka Magbebaye,
“Uya, egkaluwas ded ka impandakep te mabbulut ne me sundalu
wey egkaawi ded ka immangahew ran.
Tenged su egpakig-ehet a te seeye se egpakig-ehet keykew,
wey egluwasen ku ka keet-etawan nu.
26 Igpakeen ku te seeye se migdeeg-deeg keykew ka me lawa ran.
Ne egkengewubug sikandan te me langesa ran iling te binu.
Ne egpekeila ka langun ne keet-etawan ne sikeddi ka Magbebaye ne Manluluwas niyu,
ka Amana ne Maresen ne Manama ni Hakub.”