60
Ka egginguma ne katelesan te Hirusalim
1 Enew ka, he Hirusalim, layag ka su miggingume e ka kalayag nu
wey migsilaan kad te katelesan te Magbebaye ne Manama.
2 Egmarusilem ka me nasud te kalibutan
piru egsilaan ka te Magbebaye,
wey egkakita due te keykew ka katelesan din.
3 Ne egparani te layag nu ka me nasud,
egkeeyaman te kasil‑ew nu ka me Hari dan.
4 Langas-langas ka wey tengteng ka.
Egliblibulung e sikandan langun
wey egparani keykew.
Eggingume e ka me anak nu ne me lukes ne egpuun diye te mariyu
wey due egpanapipi te me anak nu ne me malitan.
5 Egkahale ka iya ke egkakita nu seini.
Egkahale-gale ka iya
su ka karatuan te me nasud wey te dahat,
eg-uyanen due te keykew.
6 Egkeempet ka tane nu te kamil
ne egpamuun te Midiyan wey te Ipa.
Egginguma ka me matig-Siyiba ne due egpanguyanen ne me bulawan,
wey me meemut ne insinsu,
wey egdeyrayen dan ka Magbebaye.
7 Ne eg-uyanen due te keykew te me matig-Kidar wey te me matig-Nibayut
ka masulug ne me karniru ran;
egkarawat seini isip igpanubad diye te altar ne tutunganan te igpanubad te Magbebaye
wey te sika ne paahi, igpakapabantug ku ka timplu ku.
8 Nekey‑a sika se miglayang iling te gapun,
wey iling te me selepati ne egpeendiye te me ugpaan dan?
9 Me etew sika ne egmanlibulung te derakel ne barku ne egpuun diye te me ilis te dahat
ne in-unturan te keet-etawan te Manama
ne eg-uli diye te me ugpaan dan.
Mig-uyan sikandan te me bulawan wey me pelata
eyew te pegbantug te Magbebaye nu,
ka Matulus ne Manama te Israil tenged su imbantug ke ma nikandin.
10 Migkahi ka Magbebaye,
“Egpaay-ayaran te me lapu ka me matikang wey makepal ne alad ne batu te siyudad,
wey egpamakey e ka me Hari keykew.
Minsan indusaan ku sikeykew tenged te langet ku
piru eglapihan ku red sikeykew su egkeyimenawan e man ded keykew.
11 Ne kenad e eglekeban ka gumawan nu te aldew wey marusilem
su eyew egpanguyanen te me etew due te keykew ka me karatuan te me nasud
ne egdumaan te me Hari ne egluyud.
12 Ne egkengareetan iya ka me nasud
wey ka me migharian ne kene egpamakey keykew.
Egkahuhus iya
ka sika ne me nasud.
13 “Ne egpekeendiyad e te keykew ka me mahal ne kayu te Libanun
ne iyan ka me sipris, platanu, wey maribuhuk,
eyew igdayan-dayan te timplu ku
wey egmateles e ka inged ne diekanan ku.
14 Ne eggendiye te keykew seeye se kabuhalan te migdeeg-deeg keykew
wey egpanimbuel diye te tangkaan nu.
Egpanimbuel degma diye te paa nu seeye se langun ne miglemet keykew,
wey egngaranan ka nikandan te ‘Siyudad te Magbebaye ne Manama’,
wey ke ‘Hirusalim, ka Siyudad te Matulus ne Manama te Israil.’
15 “Minsan in-engkeran ka wey indumutan wey ware migbaye-baye dengan keykew,
eggimuwen ku red sikeykew ne talahuren te ware egtamanan
wey inged ne igkahale te langun ne kabuhalan.
16 Egkaahew nu ka me karatuan te me nasud wey te me Hari dan.
Ne egkanengnengan nu ne sikeddi ka Magbebaye ne Manama
ne iyan ka Manluluwas nu, ka Maresen ne Manama ni Hakub.
17 “Egliwanan ku te bulawan ka burunsi,
wey egliwanan ku te pelata ka putew.
Egliwanan ku te burunsi ka kayu,
wey egliwanan ku te putew ka batu.
Ne egmatarengen kud seeye se me ahalen ne migdeeg-deeg keykew,
wey eg-uyan e sikandan te keupianan.
18 Ne warad e egkarineg ne gubut due te tane nu
wey karereetan diye te inged nu.
Ne eglingut keykew ka kaluwasan ne egpekeiling te matikang wey makepal ne batu ne alad te siyudad,
wey egdeyrey keddi seeye se langun ne egseled te gumawan nu.
19 “Kene kad egkeilangan te layag te aldew wey te bulan.
Ka Magbebaye e ka egkeyimu ne layag nu te ware egtamanan
wey ka Manama ka egkeyimu ne katelesan nu.
20 Kenad eglineb ka aldew wey ka bulan.
Su sikeddiey e ka layag nu te ware egtamanan,
wey kene kad e eglungku.
21 Egmatareng ka langun ne keet-etawan nu,
wey sikandan e ka egpakakamuney te tane te Israil te ware egtamanan.
Inggimu ku sikandan iling te pinamula ne impamula ku eyew egkabantug a.
22 Ka pamilya ne pila-pila re se anak, egkeyimu ne linibu ne me etew,
wey ka subla ne deisek ne punduk te me etew, egkeyimu ne maresen ne nasud.
Eggimuwen ku sika egdagdahawi te eleg ne timpu.
Sikeddi ka Magbebaye ne Manama.”