8
Ka pegkeetew te anak ni Isayas ne lukes
1 Ne ingkahiyan a te Magbebaye ne Manama, “Kuwa ka te sulatanan wey isulat nu te derakel ka seini ne lalag, ‘Ki Mahir-Salalhasbas seini.’ ”
2 Ne migkuwa a te egkasalihan ne me etew ne iyan si Uriyas ne talagpanubad wey si Sakariyas ne anak ni Hibirikyas eyew egpamalehet meyitenged kayi.
3 Ne miggulid a te asawa ku, ne nataman, naberes e sikandin wey nakaanak e te lukes. Ne ingkahiyan a te Magbebaye ne Manama, “Ngarani nu sikandin ki Mahir-Salalhasbas.
4 Su te kene pad egpekeutas ka bate ne egkahi ‘Amey ku’ wey ke ‘Iney ku,’ eg-ahawen e te Hari te Asirya ka karatuan te Damasku wey ka nenaahew te Samarya puun te duma ne nasud.”
Ka peglusud te Hari te Asirya
5 Ne ingkahiyan ad e man‑e te Magbebaye ne Manama,
6 “Tenged su insamsamilian ma te seini ne me etew ka pegpangabang te Manama wey tenged su nahale sikandan engki Hari Risin wey ki Hari Pika,
7 egpalusuran ku ka Huda te Hari te Asirya wey te me sundalu rin ne mabbulut wey susuluhi. Eglusud sikandan ne egpekeiling te Weyig ne Iyupratis ne egbaggiyu ne egpanlapey.
8 Ne egkalapey kayi ka Huda wey egkeempet seini iling te imbaggiyuwan ne nataman te lieg se karalem.”
Piru duma ta ka Manama. Igpabekal rin ka pakpak din wey egbantayan din ka inged ta.
9 He me nasud, libulung kew te pegkaaldek.
Ne pammineg kew se diye te maddiyu ne me inged;
Pangandam kew te gira piru egkaliyasan kew red!
Andama niyu ka me panganiban niyu piru egpangelkelen kew red!
10 Sabut-sabut kew ke nekey ka eggimuwen niyu
piru kene kew eglampus.
Lalag kew te minsan nekey
piru ware karuan due su duma ney ka Manama.
Ka pegpaney-paney te Magbebaye te prupita
11 Ne impegpehetan a panpanayi te Magbebaye ne Manama ne kena a egpeilingen te me hinimuwan te seini ne me etew. Migkahi sikandin,
12 “Kene kew apil te me planu ran wey kene niyu ikaaldek ka igkaaldek dan wey kene kew kasasew.
13 Sumsumana niyu, matulus a se Amana ne Maresen ne Magbebaye, wey sikeddi ka eleg ne igkaaldek niyu.
14 Ne egkeyimu a nikaniyu ne matulus ne aputanan. Piru ke egsamsamilian a nikaniyu, egpekeiling a te batu ne egkasipaan niyu me matig-Israil wey me matig-Huda. Ne iling a te ahipis wey batul ne egsaharan te mahinged te Hirusalim.
15 Masulug kandan ka egpakasipe, egpakarugsu, wey egkareetan. Egkabatul sikandan wey egkarakep.”
Ka pegpaney-paney meyitenged te peg-inse te saping
16 Sikaniyu se migdawat te me panulu ku, bantayi niyu wey itines niyu ka me sinulat ne me pegpanulu wey ka me suhu ne imbehey te Manama keddi.
17 Mig-inniyuhan te Magbebaye ne Manama ka keet-etawan te Israil, piru migsalig a wey migpallateng kandin.
18 Pammineg kew, seini a duma te me anak ne imbehey keddi te Magbebaye ne Manama. Me tuus key te Israil puun te Amana ne Maresen ne Magbebaye ne mig-ugpe te Hirusalim.
19 Piru ke egpeinseen kew te keet-etawan diye te me etew ne egpakiglalag te me saping wey me etew ne egpekeumew te me saping ne egmuteg-muteg de due, kene niyu himuwa sika. Inse kew te Manama niyu. Mania te eg-inse kew te me saping meyitenged te me mallenggew?
20 Keilangan ne egkahiyan niyu sikandan, “Pammineg kew te impanulu te Magbebaye kaniyu! Su ke due etew ne eglalag te minsan nekey ne ware nekeikul te impanulu te Magbebaye, ware naa nalayahi ka suman-suman te sika ne etew.”
Ka timpu te pegkalaggew
21 Ne egleug-leug ka me etew te inged ne eglungku wey eggutasan. Ne tenged te gutas dan, egkabelu-belu sikandan wey egdilusen dan ka Hari dan wey Manama ran. Ne ke egleng‑ag sikandan diye te langit
22 wey ke egpitew naa diye te tane, iyan dan de egkakita ka keyirapan, karusileman, wey mangune-kune ne kalaggew, wey igdegpak sikandan diye te subla ne durusilemi.