2
Ka igkarangeb ne peg-eleg-eleg ni Meibulan ki Hub
1 Ne duen e man‑e aldew ne miglibulung ka me panalihan diye te tangkaan te Magbebaye ne Manama, wey migtambung ded man‑e si Meibulan te seeye ne kalibulungan.
2 Ne mig-inse ka Magbebaye ki Meibulan, “Hendei ka migpuun?”
Ne migtabak si Meibulan, “Migleug-leug a diye te kalibutan.”
3 Ne migkahi e man‑e ka Magbebaye, “Ew. Ne nakabantey ke naa te suluhuanen ku ne si Hub? Ware egpekeiling kandin diye te ampew te tane—matareng sikandin wey ware igkarew‑ey, wey due pegkaaldek din keddi, wey migpariyu sikandin ne eggimu te mareet. Migmatinumanen ded iya man‑e sikandin keddi minsan ke ingginalig a nikeykew ne egtuhutan ku sikeykew ne egpasakitan sikandin te ware egpuunan.”
4 Ne intabak ni Meibulan ka Magbebaye, “Egkarawat iya te etew ne egkaawe ka langun basta egkeuyag de sikandin.
5 Kema pasakiti nu ma ka lawa rin—pitawen ta ke kene ka nikandin egbaliyungan te egpanlalag te mareet.”
6 Ne migkahi ka Magbebaye, “Uya, egtuhutan ku sikeykew ne eggimu te minsan nekey ne igkeupii nu diye te kandin, piru kene nu re sikandin himatayi.”
7 Seeye naa, mig-awe e si Meibulan diye te tangkaan te Magbebaye, wey impasalerep din e si Hub te mangune-kune ne kehang. Migbunsud de iya diye te palapala ni Hub ka kehang taman te pulu din.
8 Ne migpinnuu si Hub diye te abu, wey migkuwa te me tepik te napese ne banga wey iyan din ingkutkut te me kehang din.
9 Ne ingkahiyan sikandin te asawa rin, “Egpabulus-bulus ke naan ded ubag ne egmatinumanen? Panlalag ka te mareet diye te Manama eyew egpatey kad.”
10 Ne migtabak si Hub, “Egpekeiling ka be‑be nu te be‑be te me malitan ne egkeungel-ungel. Iyan te bes de egdawaten puun te Manama ka meupiya, wey kene ka mareet?”
Ne minsan ke neiling e dutu, ware iya man‑e nakasale si Hub, wey ware miglalag te mareet diye te Manama.
Ka tatelu ne alukuy ni Hub
11 Ne due tatelu ne alukuy ni Hub ne ensi Ilipas ne matig-Timan, si Bildad ne matig-Suwa, wey si Supar ne matig-Naama. Te pegkarineg dan te masumpit ne neula-ula ni Hub, nenekeg-uyun sikandan ne eggendiyaan si Hub eyew eg-unungan wey egliwangen dan sikandin.
12 Te egpalinggumaan e sikandan, nakita ran e sikandin piru ware dan neileyi. Te namelmelehan dan e ne sikandin bes seeye, migpandalawit e sikandan wey inggisi dan ka kumbale dan wey imbukbukan dan te alinepung ka me ulu ran.
13 Ne in-unungan dan e sikandin ka migpinpinnuu diye te tane te pitu ne aldew wey pitu ne marusilem. Ne ware dan lalahi sikandin su nakita ran ne subla ne masumpit ka egkeula-ula rin.