20
Ka tabak ni Supar
1 Ne migtabak e man‑e si Supar ne matig-Naama,
2 “Sikan naa Hub ka egpuunan ne kena a egpekegteil,
su amana a iya egkeupian ne egtabak keykew.
3 Meenendue ka me lalag nu ne narineg ku,
piru nakataha a ke egmenuwen ku sikeykew te egtabak.
4 Ware ke bes nakanengneng ne puun pad te bunsuranan
te impeugpe ka etew te kalibutan,
5 ka kahale te me makasesale, egmanlihad de,
wey ka kahalaan te ware migmalintutuu te Manama,
kene de egkalluhey?
6 Minsan egginguma te langit ka kandin ne bantug,
wey egpakasungkul e ka ulu rin te me gapun,
7 egpatey iya sikandin wey kenad egpakalibed minsan ken‑u iling te tei rin.
Ne egpakapamitew kandin ka seeye se nakakita dengan kandin.
8 Egkaawe sikandin iling te taheinep te marusilem,
wey te igmakita ne kenad e egkaabayan egkakita.
9 Ka nakakita kandin, kenad egpakakita pad kandin.
Ka seeye se diye te ugpaan din, kenad egpakalambag kandin.
10 Egpeyid‑u-hid‑u naan de te egkengaayu-ayu ka me anak din,
su ka in-ahew rin ne me karatuan, egpakalibed ded diye te kamuney.
11 Ka kanekal rin te bate pad sikandin,
egpakatapik ded kandin te eglibed te alinepung.
12 “Minsan meupiya para kandin ka peggimu te mareet iling te egkakeen ne meemis,
wey minsan igpariralem din pad seini te dile din,
13 eg-eem-emen din seini te mananey
eyew egkaneem-neem din ka nanam kayi.
14 Piru ke egkaabeleng din e seini,
egmapeit e seini diye te getek din,
wey eggilu e iling te lalas te uled.
15 Ka impangabeleng din ne karatuan, igpangileb din ded.
Minsan diyad te getek din seini, igpeileb ded kandin te Manama.
16 Nekeiling sikandin te migsupsup te lalas te dulepu,
ne iyan ded egpakapatey kandin.
17 Kenad e sikandin egpakakita te katubung te mentika, gatas, wey teneb
ne iling te egtulayas ne beuhan.
18 Ne igpamehey rin ka langun ne seleppi ne nakuwa rin,
wey kenad sikandin egkahale te karatuan din.
19 Su imbaybayaran wey imbalahad din ka egkengaayu-ayu,
wey impangahew rin ka me baley ne ware din himuwa.
20 “Su kene sikandin egkeuralan te minsan nekey;
halamlamen sikandin wey ware egpakaalihu te langun ne igkeupii rin.
21 Ware egkasame ke egkeen sikandin,
purisu kene egkaluhey ka katubung din.
22 Te karakel te karatuan din, layun sikandin egkabantali
wey eg-antus amana sikandin te me keyirapan.
23 Ne taheed te egbulung-bulung sikandin,
egpakaneem-neem sikandin te egpangebel-ebel ne langet te Manama,
wey egpeuranan sikandin te Magbebaye ne Manama te legpad.
24 Minsan egpakapallahuy sikandin puun te panganiban ne putew,
egkasuhat ded sikandin te tunud ne burunsi wey eg-abbas seini te peka rin.
25 Egbaruten ka tunud ne mig-abbas,
wey egtulayas ka langesa diye te iddus te tunud,
wey egkaaldek-haldek sikandin.
26 Egkareetan ka langun ne karatuan din
wey egkatutung sikandin te hapuy ne kene ne etew ka migtemeg
wey ka langun ne nasame diye te kandin.
27 Igpanengneng te langit ka kene ne meupiya ne neyimu rin,
wey egpamalehetan seini te tane.
28 Egkengaanlas te baggiyu ka langun ne karatuan din
te timpu ne igpaneem-neem e kandin ka langet te Manama.
29 Sika ka intahahe te Manama ne egpangkusan te mareet ne etew.”