23
Ka tabak ni Hub ki Ilipas
1 Ne migtabak si Hub,
2 “Taman kuntee amana pad ka pegsagsahukul ku te Manama.
Impaantus a nikandin patamtamani minsan pad te me pegdeg-uy ku.
3 Ke nakanengneng e re perem ke hendei ku sikandin egkakita,
ke egkeendiyaan ku re perem sikandin te ugpaanan din,
4 igguhud ku iya mule kandin ka pegsagsahukul,
wey me katarengan ku.
5 Egkeupian a ne egpakarineg te tabak din,
wey egkeupian a ne egpakasabut te eglalahen din.
6 Eggamiten naa te Manama ka karesen din te egpakig-apul keddi?
Kene! Egpamminehen a iya nikandin.
7 Kena a ne limbungen ne etew,
purisu egpakapangatarengan a diye te Manama,
wey egbehayan a te ware egtamanan ne kaligwangan.
8 Purisu miggendiya ad te igsile wey iglineb,
piru ware ku nakita diye ka Manama.
9 Miggendiya ad te igkakawanan wey igkahibang ne balabahan,
piru ware ku red man‑e sikandin nakita.
10 Piru nakanengneng ka Manama ke nekey ka inggimu ku.
Ne emun ke egkeel-elehan ad nikandin,
egkanengnengan din e ne telek a iling te bulawan.
11 Mapahetpet ka peg-ikul ku te dalan ne in-alam te Manama,
wey wara ad iya migsuwey-suwey.
12 Intuman ku layun ka me suhu din,
wey intines ku kayi te pusung ku ka me lalag din.
13 “Piru kene egkaalin-halin ka suman-suman din,
wey ware minsan hentew ne egpakabalabag ke nekey ka igkeupii rin ne eggimuwen.
14 Purisu egtumanen din ke nekey ka implanu rin para keddi,
wey masulug pad ka planu rin keddi.
15 Purisu naaldek a diye te tangkaan din.
Ne minsan egsumsumanen ku re seeye, egkaalatan a iya.
16 Inggimu a iya te Maresen ne Manama ne egmahuye
wey egkalilliyasan.
17 Piru wara a migpeeneng-eneng
minsan hendue te nabunbunan a te subla ne delem.”