IGKATELU NE BAAD:
28
(28:1-28)
Indayan ka katagseb
1 Due immanlungahan ne tane ne egpamitawan te pelata,
wey due me tutunganan te bulawan eyew egkeyimu ne telek.
2 Egpangaliyen te me etew ka me putew puun te tane,
wey eglenayen dan ka me burunsi puun te me batu.
3 Ne egmanusulu sikandan ka egmangekali diye te diralem te tane;
egmangekali sikandan taman te egkeumaan dan,
wey egpanlekaten dan ka me batu diye te diralem te lungag ne durusilemi.
4 Egmangekali sikandan diye te bangalug ne ware nangugpe,
wey ware nanengnengi te me etew.
Ne egmamaneug sikandan diye te inlungahan dan ne egbitin-bitin te lubid ne egkatali-tali.
5 Ne kayi te dibabew te tane, egtubu ka pinamula ne egkakeen,
piru diye te diralem, subla ne meinit iling te hapuy.
6 Ne ka me batu kayi te tane, due me sapiru,
wey ka me alinepung, due me bulawan.
7 Ne ware uwak ne nakanengneng te dalan peendiye te inlungahan ne pamulawanan,
wey ke banug naa ne nakakita kayi.
8 Ne ware degma me leew ne mananap wey ke liyun naa
ne egpakabaye te seeye ne dalan.
9 Egmanlupeten te me etew ka me makehal ne batu,
wey egpanempahen dan ka igtubu te me bubungan.
10 Ne taheed te egmanlulungag sikandan te me makehal ne batu,
egmakakita sikandan te nalein-lein ne klasi te me mahal ne batu.
11 Ne egsubungen dan ka weyig eyew kene egtulayas,
wey igpahawa-hawa ran ka nenekeeles ne karatuan.
12 “Piru hendei naa egkakita ka katagseb,
wey ka salabutan?
13 Ware ka katagseb diye te etew,
wey ware minsan sabeka ne nakanengneng ke mamenu seini kamahal.
14 Kene egkakita ka katagseb
minsan diye te diralem te dahat.
15 Ne kene seini egkabeli te pelata
wey te neelin ne bulawan.
16 Ne minsan ka neelin ne bulawan ne egpuun te Upir,
wey ka me mahal ne batu ne egngaranan te uniks wey sapiru, kene egpekeiling kayi kamahal.
17 Subla pad seini ne mahal
du te bulawan wey te meupiya ne bildu,
wey kene seini egkabayaran te me alahas ne bulawan.
18 Subla pad ne mahal ka katagseb du te me mahal ne batu puun te dahat,
te kristal wey ke pirlas naa
19 wey te amana ne mahal ne tupasyu puun te Kus,
wey kene seini egkabeli te neelin ne bulawan.”
Ka pegkaaldek te Manama iyan katagseb
20 “Ne hendei naa egkakita ka katagseb,
wey ka salabutan?
21 Ware minsan sabeka te eggeheyinawa
ne egpakakita kayi,
minsan ka me bayaku diye te aw-awangan.
22 Ne minsan ka seeye se diye te inged te me minatey,
migkahi ma te me guhud-guhud de ka narineg dan meyitenged te katagseb.
23 Ka Manama re ka nakanengneng te dalan peendiye te katagseb,
wey sikandin de ka nakanengneng ke hendei seini egkakita,
24 su egkakita rin ma mule
minsan ka kinamariyuan ne baad te kalibutan,
wey ka langun ne nakatahu kayi.
25 Imbehayan te Manama te kanekal ka kalamag,
wey intakes din ka me karakel te uran.
26 Inteil rin e ka egkeuranan,
wey ka egkaheteban te kilat.
27 Seeye ne timpu ne impakita rin ka katagseb
wey ka keimpurtanti kayi.
Neugsi-ugsi rin e seini
wey napamalehetan.”
28 Ne migkahi sikandin diye te me etew, “Pammineg kew, ka pegkaaldek te Magbebaye ne Manama, iyan sika se katagseb,
wey ka pegpariyu te mareet ne hinimuwan, iyan sika se salabutan.”