30
1 Ne migpabulus-bulus si Hub ka migkahi,
“Piru kuntee, inderali-dian ad e te me etew ne me hari ku re
wey kene egkasalihan se me amey.
Egkasalihan pad ka me asu te pegbantey te me karniru ku.
2 Me ware karuan dan ne me etew
su magguye wey kene egkaayun ne egtrabahu para keddi.
3 Egkengaayu-ayu sikandan wey maggase naan de iya tenged te gutas.
Te timpu te marusilem, egmangebkeb naan de sikandan te naggangu ne dalid te me hilamunen
diye te inged ne ware mig-ugpe.
4 Ne egmamarut sikandan te me hilamunen diye te inged ne ware mig-ugpe
eyew egkeenen dan, minsan ka me dalid te pinamula ne eggimuwen ne limas ne ware nanam.
5 Impandeldel sikandan te langun
wey impanguleyian iling te me takawen.
6 Ne diye naan de sikandan mig-ugpe te kalandihan te bubungan,
diye te me batuwen, wey diye te me lungag te tane.
7 Ne egmanliblibulung sikandan diye te mabbenes,
wey maggulub naan de iya ka egmanlelalag iling te me mananap.
8 Me ware karuan dan ne me etew;
ware sikandan neneileyi
wey impandeldel puun te tane dan.
9 Piru kuntee, egsusumpaliten ad e te me anak dan ne eg-uulahing te pegdali-di keddi;
inggimu ad e nikandan ne kangisiyan.
10 Igkekalindit ad e nikandan
wey migpariyu e sikandan keddi.
Ne kenad e sikandan eg-ulung-ulung ne egpangulepa te ulaula ku.
11 Tenged su impamahuya ad ma te Manama wey ware egpakabulig,
inggimu ran e kayi te keddi ka langun ne igkeupii ran.
12 Inlulusuran a te seini se maddeet ne punduk;
intahuan dan te sahilut ka egbayaan ku,
wey migpakannekal sikandan ne eggimatey keddi.
13 Imbalabahan dan ka egbayaan ku
eyew te pegdereet keddi,
wey ware nakabalabag kandan.
14 Inlulusuran a nikandan
iling te me sundalu ne migsuleddu diye te malluag ne lungag te naggebe ne alad.
15 Ne iyan e migdapit keddi ka liyas;
naawe e ka pegkatalahuren ku iling de te miglayap te kalamag,
wey ka karatuan ku iling de te gapun ne miglihad.
16 Ne kuntee, egkapatey ad e.
Warad keepusan te peg-antus ku.
17 Egmemasakit se me tul‑an ku ke marusilem,
wey kene egpeeneng-eneng ka eg-al-al.
18 Hendue te eggulipisan te Manama ka ulang te kumbale ku
wey hendue te egkaleklek ad e.
19 Ne in-antug a nikandin diye te basak
wey nekeiling ad e te alinepung wey abu.
20 “Migpangumew a keykew Manama
piru wara a nikeykew tabaka;
mig-ampu a, piru wara a nikeykew linglingaa.
21 Migmabulut kad e keddi
wey imbaybayaran ad e nikeykew pinaahi te geem nu.
22 Impeenat a nikeykew te kalamag wey impalayap a nikeykew,
wey impaantug-antug a nikeykew te bagyu minsan hendei.
23 Nakanengneng a ne eg-uyanen ad e nikeykew diye te inged te me minatey;
ka inged ne intahahe nu para te langun.
24 Piru mania te egpaantusen e pad nikeykew se warad egkeyimu,
ke kene, iyan naan de se pegpangananey?
25 Migsinehew a tenged te seeye se egkengabbaybayaran
wey te seeye se egkengaware-ware.
26 Mig-iman-iman a te keupianan,
piru nasi mareet ka migginguma keddi;
mig-iman-iman a te kalayag, piru nasi marusilem ka migginguma keddi.
27 Ware tamanan te masakit ne naheram ku
wey tagse aldew egginguma keddi ka me peg-antus.
28 Migmeitem ad e ne kene ne tenged te keinit te aldew,
ke kene, tenged te dalu.
Mig-atubang a te keet-etawan wey migsinehew a ka egpangananey kandan.
29 Ne ka laheng ku te egsinehew, makalulunu naan de iya
ne egpekeiling e te laheng te egteteul ne mananap ne egpekeiling te asu,
wey te eglalag ne ekang.
30 Migmeitem e ka laplap ku wey egkengalleke e
wey mangune-kune ka lusung ku.
31 Ne ka dahing dengan te alpa ku te kahale, naliwanan e te dahing te peglungku,
wey ka dahing te pulendag, naliwanan e te kahulub te pegpandalawit.”