35
1 Ne migpabulus-bulus si Ilihu ka migkahi ki Hub,
2 “Kahiyen nu buwa ne eleg ka inlalag nu
ne ware sale nu diye te tangkaan te Manama?
3 Ne mig-inse ka man‑e,
‘Nekey naa ka egkakuwa ku ke ware sale ku?’
4 Egtabaken ku sikeykew
wey ka me alukuy nu.
5 “Leng‑ag ka te langit,
wey tengtengi nu ke mamenu katikang ka me gapun.
6 Ke nakasale ka,
ware de sika diye te Manama;
minsan pad ke kamasulug ka egpakasale,
kene sikandin egkamenu.
7 Ke matareng ka,
nekey naa ka keupianan ne igpakabehey nu te Manama?
8 Iyan de nabaybayaran ka me duma nu tenged te me sale nu.
Ne sikandan de degma ka nabulihan te keupiya nu.
9 “Migpangananey ka me etew tenged te subla ne pegdeeg-deeg kandan.
Migpangananey sikandan ne egluwasen puun te me etew ne maddesen.
10 Piru ware sabeka kandan ne migpangananey te Manama ne miggimu kandan
wey migbehey kandan te keseg te timpu te kalised.
11 Ware sikandan mig-aput diye te Manama ne miggimu kandan ne subla pad ne matagseb
du te me mananap kayi te tane wey te me bayaku diye te aw-awangan.
12 Ne emun ke egpangananey sikandan diye te Manama, kene din sikandan egtabaken
su me hambuhen ma sikandan wey me makasesale.
13 Ware karuan te pegpangananey ran te Manama;
klaru ne kene sikandan egtengtengan
wey ke egpamminehen naa te Maresen ne Manama.
14 “Ne labew e, Hub, ne kene egpamminehen te Manama
ka me pegpangananey nu
su migkahi ke ma te ware nu nakita ne imbulihan ka nikandin te kasu nu
wey iyan nud ugpe se egtetahad.
15 Ne migkahi ke pad iya man‑e te
kene egparusa ka Manama minsan nabelu sikandin,
wey kene din amana eglinglingeen ka mareet ne hinimuwan te etew.
16 Ware karuan te immanlalag nu, Hub;
klaru amana ne ware ka nakasabut te immanlalag nu.”