4
Ka an-anayan ne pegpalalahey
(4:1–14:22)
1 Ne migkahi si Ilipas ne matig-Timan,
2 “Kene ke re keenendueni ke due igkalalag ku keykew.
Su kene egkaayun ne egpeeneng-eneng e re.
3 Pammineg ka, masulug e ka napanulu nu ne me etew,
wey inlig‑en nu seeye se me magguye.
4 Nakabagget ka me lalag nu te seeye se nenasaligkat,
wey nakalig‑en te seeye se magguye ne egmangelkelen e se me buel.
5 Ne kuntee te sikeykew e ka egkabaybayaran,
mahaan ke re egkeupul;
te sikeykew e ka nasakitan,
egkaaldek kad e.
6 Due pegkaaldek nu te Manama
purisu salig ka kandin.
Ware igkarew‑ey keykew,
purisu due egkapallateng nu.
7 Sumsumana nu seini: duen naa matareng ne etew
wey ke ware sale ne egsahap?
8 Sumale te natahaan ku, seeye se egpamula te mareet wey egsawed te kahubut,
mareet degma wey kahubut ka eggaaniyen.
9 Egkengareetan ka maddeet ne etew te senge-hiyup de te Manama;
egkammatey sikandan tenged te langet din ne egpekeiling te bagyu ne egpakarereet.
10 Egpekeiling sikandan te mabbulut ne me liyun ne egginihel,
piru egpamingawan sikandan wey egpape-peenengen te Manama.
11 Nekeiling e sikandan te me liyun ne warad egkarawi.
Ne egkammatey sikandan
wey egmekegsuwey-suwey e ka me anak dan.
12 “Ne due lalag ne narineg ku te heles de;
innaas-naas de seini keddi
13 diye te mareet ne nataheinep ku te marusilem,
taheed te newulep-hulep ka me etew.
14 Ne nangelkel a te mangune-kune ne liyas.
15 Ne due iling te kalamag ne nakakiyab te ulaula ku
wey migpamalukagkag ka bulbul te tengel ku.
16 Due migsasindeg kayi te egkatangkaan ku
piru kene ku egkamelmelehan ke nekey seeye.
Ne migpeeneng-eneng de seeye.
Ne due narineg ku ne meyimulung ne laheng ne migkahi:
17 ‘Duen naa etew ne matareng diye te Manama?
Duen naa etew ne ware sale diye te tangkaan te Talaggimu kandin?’
18 Minsan te me suluhuanen din ware pegsalig din,
wey minsan te me panalihan din, duen ded igkarew‑ey rin kandan.
19 Ne iyan din naan pa iya salihi ka me etew
ne inggimu re puun te tane, wey iling de kalemu ne eglupeten te kalibangbang.
20 Manekal pad ka etew te maselem
piru senge-kakuwa ne egpatey e te kene pad egkasagkup
egkengaawe e te ware egtamanan
wey ware minsan sabeka ne egpakanengneng kayi.
21 Egkaawe ka langun ne diye te kandin,
wey egpatey sikandin ne ware katagseb.”