42
Ka pegbuyu ni Hub te pasaylu te Manama
1 Ne migtabak si Hub te Magbebaye ne Manama,
2 “Nakanengneng a ne egpekeyimu ka te langun
wey ware minsan hentew ne egpakabalabag keykew.
3 Mig-inse ka keddi,
‘Hentew kaa se migduwa-ruwa te katagseb ku
pinaahi te pegpanlalag nu te ware nu nasabut?’
Malehet iya ne migpanlalag a te ware ku nasabut,
meyitenged te derakel ne kein-inuwan ne ware ku nanengnengi.
4 Ne ingkahiyan a nikeykew,
‘Pammineg ka su eglalag a!
Egpanginsaan ku sikeykew, wey keilangan ne egpanabaken nu seini.’
5 “Dengan ne me timpu, nakarineg e re puun te duma meyitenged keykew.
Piru kuntee, nakita kud iya mule sikeykew.
6 Purisu neyilew a te langun ne nalalag ku meyitenged keykew,
wey mig-inniyuhan kud e seini pinaahi te pegpinnuu te tane wey abu.”
IGKAPITU NE BAAD: Katamanan ne lalag
(42:7-17)
Ka pegtuman enni Ilipas, Bildad, wey ni Supar te Manama
7 Te nekeimpus e ka Magbebaye ne Manama ne migpakiglalag ki Hub, ingkahiyan din e si Ilipas ne matig-Timan, “Nabelu a keykew wey te daruwa ne alukuy nu su ware kew nahud miglalag te kamalehetan meyitenged keddi, iling te inlalag ni Hub ne suluhuanen ku.
8 Purisu kuwa kew te pitu ne turu ne baka, wey pitu degma ne lukesan ne karniru. Ne uyana niyu naa seini ki Hub eyew igpanubad niyu ne egtutungen. Si Hub ka eg-ampu para kaniyu wey egtabaken ku ka peg-ampu din, wey kene kud sikaniyu eglegparan te eleg perem te me keungelan niyu pinaahi te peglalag niyu te kene ne eleg meyitenged keddi; kene mule ne iling te inlalag ni Hub ne suluhuanen ku.”
9 Ne intuman ni Ilipas, ni Bildad, wey ni Supar ka insuhu kandan te Magbebaye. Ne intabak te Magbebaye ka peg-ampu ni Hub.
Ka pegpanalanginan ki Hub te dubli pad du te an-anayan
10 Ne nataman, te nakaampu e si Hub para te me alukuy rin, imparatu e man‑e sikandin te Magbebaye; imbehayan sikandin te Magbebaye te dubli pad du te naangken din dengan.
11 Ne migsahakeen si Hub para te langun ne suled din, me atebey rin, wey para te me alukuy rin dengan. Ne migpangendiye langun sikandan te baley rin ka migtambung te sahakeen. Ne inliliwang dan si Hub tenged te impeula-ula te Magbebaye kandin. Ne migbehey te seleppi wey bulawan ne ariyus ka tagse sabeka kandan.
12 Impanalanginan te Magbebaye ka mewuri ne me aldew te umul ni Hub, subla pad te an-anayan ne naangken din. Nakaangken sikandin te sapulu wey hep‑at ne libu (14,000) ne karniru, hen‑em ne libu (6,000) ne kamil, daruwa ne libu (2,000) ne baka, wey sabeka ne libu (1,000) ne beyan ne asnu.
13 Ne nakaanak pad man‑e si Hub te pitu ne lukes wey tatelu ne malitan.
14 Ingngaranan din ka panganey ne malitan ki Himima, Kisiya ka hari, wey Kirin-Hapuk ka kinaariyan.
15 Ware me malitan ne iling kateles te me anak ni Hub te intiru ne kalibutan. Ne impamehayan degma sikandan ni Hub te me karatuan ne egkapanunud dan iling te me maama ran.
16 Ne puun te nakalibed e ka karatuan ni Hub, neuyag pad sikandin taman te 140 ne leg‑un, wey nakakita pad sikandin te me apu din te buel.
17 Ne migpatey e sikandin ne buyag e amana.